COVID-19
ជាតិ
សុខភាព
អ្នកជំងឺកូវីដ-១៩ នៅសល់៥០នាក់ទៀត ដោយ ៤០នាក់ជាអ្នកពាក់ព័ន្ធព្រឹត្តិការណ៍២៨ វិច្ឆិកា
× ភ្នំពេញ៖ ស្ត្រីនិងបុរសខ្មែរ២នាក់ បានជាសះស្បើយពីកូវីដ-១៩ហើយ។ ការជាសះស្បើយពីជំងឺកូវីដ-១៩របស់អ្នកទាំងពីរនេះ បានធ្វើឱ្យកម្ពុជា កើនអ្នកជាសះស្បើយ៣០៩នាក់ ខណៈអ្នកជំងឺ៥០នាក់ទៀត កំពុងសម្រាកព្យាបាលនៅតាមមន្ទីរពេទ្យសាធារណៈនានា។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាល នាព្រឹកថ្ងៃទី១៤ ធ្នូ។
ជនជាតិខ្មែរទាំង២នាក់ ដែលបានជាសះស្បើយពីកូវីដ-១៩នោះ មានស្ត្រីវ័យ៣៥ឆ្នាំម្នាក់ មានអាសយដ្ឋាននៅ ស្រុកទឹកឈូ ខេត្តកំពត។ ស្ត្រីរូបនេះ បានធ្វើដំណើរមកពីប្រទេសចិន ហើយមកដល់កម្ពុជា កាលពីថ្ងៃទី១៨វិច្ឆិកា ឆ្នាំ២០២០។ រីឯ អ្នកជាសះស្បីយពីកូវីដ-១៩ម្នាក់ទៀត ជាបុរសខ្មែរ-អាមេរិក មានវ័យ៤៩ឆ្នាំ មានអាសយដ្ឋានស្នាក់នៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។ បុរសរូបនេះ ត្រូវបានក្រសួងសុខាភិបាល រកឃើញមានជំងឺកូវីដ-១៩ កាលពីថ្ងៃទី៤ធ្នូ បន្ទាប់ពីធ្វើដំណើរមកពីសហរដ្ឋអាមេរិក ហើយបន្តជើងហោះហើរនៅប្រទេសចិន។
ដោយឡែក ក្នុងព្រឹត្តិការណ៍២៨វិច្ឆិកា សម្រាប់នាថ្ងៃទី១៤ធ្នូនេះ ក្រសួងសុខាភិបាលប្រកាសថា មិនមានករណីថ្មីនៃការឆ្លងជំងឺកូវីដ-១៩នេះឡើយ។ ក្រសួងសុខាភិបាល ដោយបញ្ជាក់ថា សំណាក ៣,៨៣៨ នៃអ្នកពាក់ព័ន្ធដោយផ្ទាល់ និងប្រយោលនៅក្នុងព្រឹត្តិការណ៍២៨វិច្ឆិកា ត្រូវបានវិភាគដោយវិទ្យាស្ថានប៉ាស្ទ័រកម្ពុជា កាលពីថ្ងៃទី១៣ ធ្នូ ដោយលទ្ធបង្ហាញថាអវិជ្ជមានកូវីដ-១៩ទាំងអស់។ សម្រាប់សំណាកនៅសល់ជាង ៣,០០០ទៀត មន្ត្រីជំនាញនឹងបន្តវិភាគរកមេរោគកូវីដ-១៩ នាថ្ងៃទី១៤ធ្នូនេះ ។
អ្នកជំងឺកូវីដ-១៩ ដែលក្រសួងសុខាភិបាលរកឃើញនៅក្នុងព្រឹត្តិការណ៍២៨វិច្ឆិកា មានចំនួន៤០នាក់។ ក្នុងនោះប្រុស២១នាក់ និងស្រីមាន១៩នាក់។ សម្រាប់កម្ពុជាទាំងមូល អ្នកជំងឺកូវីដ-១៩ ចំនួន៣៥៩នាក់ ដោយក្នុងនោះមានអ្នកជាសះស្បើយ៣០៩នាក់ និង៥០ទៀតកំពុងសម្រាកព្យាបាលជំងឺនៅមន្ទីរពេទ្យមិត្តភាពខ្មែរ-សូវៀត, នៅមណ្ឌលសុខភាពចាក់អង្រែលើ និងនៅមជ្ឈមណ្ឌលជាតិប្រយុទ្ធប្រឆាំងនឹងជំងឺរបេង និងហង់សិន៕
© រក្សាសិទ្ធិដោយ thmeythmey.com