Neymar របួសធ្ងន់ ខណៈ PSG ចាញ់ Lyon

កីឡាអន្តរជាតិ

អន្តរជាតិ

Neymar របួសធ្ងន់ ខណៈ PSG ចាញ់ Lyon

14, Dec 2020 , 2:29 pm

រូបភាព

ដោយ: ទេព ពិទូរ្យ

Neymar ទទួលរងរបួសជើងធ្ងន់ធ្ងររហូតត្រូវសែងចេញពីទីលាន ក្នុងការប្រកួតដែល Paris St-Germain ចាញ់ Lyon ១-០ ក្នុងពានរង្វាន់ Ligue 1 នៅរាត្រីថ្ងៃទី១៣ ខែធ្នូ។

ខ្សែប្រយុទ្ធសញ្ជាតិប្រេស៊ីលរូបនេះ បានស្រែកយំ និងដេកឱបជើងដែលរងរបួសក្រោយប៉ះទង្គិចគ្នាជាមួយកីឡាករ Thiago Mendes របស់ Lyon ដែលត្រូវបានកាត់ក្រហមបណ្តេញចេញ នៅក្នុងម៉ោងបន្ថែមវគ្គទី២។

PSG បានចាញ់ក្នុងដីខ្លួនឯងដោយលទ្ធផល ១-០ តាមរយៈការស៊ុតបញ្ចូលទីរបស់កីឡាករ Tino Kadewere នៅនាទី៣៥ ដើម្បីជួយ Lyon ទទួលបាន៣ពិន្ទុបន្ថែម។ តាមរយៈជ័យជម្នះនេះ Lyon បានឡើងទៅចំណាត់ថ្នាក់ទី២ក្នុងតារាងលីគកំពូលបារាំង ហើយ PSG ធ្លាក់ទៅលេខ៣ដោយខុសគ្នា១ពិន្ទុ។ Lille ឈរកំពូលតារាងមាន២៩ពិន្ទុ ស្មើគ្នាជាមួយ Lyon ដ្បិតមានសំណល់គ្រាប់ស៊ុតល្អជាង។

បន្ទាប់ពីក្រុមបរាជ័យ ហើយ Neymar ដែលជាកីឡាករសំខាន់ត្រូវរបួសផង អ្នកចាត់ការទូទៅលោក Thomas Tuchel ព្រួយបារម្ភយ៉ាងខ្លាំង។ លោក Tuchel ថា ខ្សែបម្រើឆ្នើមរបស់លោកនឹងត្រូវធ្វើតេស្តដើម្បីបញ្ជាក់ថា តើរបួសនោះធ្ងន់ធ្ងរប៉ុណ្ណា?

អ្នកចាត់ការសញ្ជាតិអាល្លឺម៉ង់បានប្រាប់ទូរទស្សន៍បារាំង Telefoot ថា Neymar កំពុងស្ថិតនៅជាមួយគ្រូពេទ្យ ហើយត្រូវរង់ចាំការធ្វើតេស្តនៅថ្ងៃស្អែក។ កីឡាករវ័យ២៨ឆ្នាំរូបនេះ ជាកំលាំងស្នូលក្នុងការជួយក្រុមយក្សបារាំងឡើងទៅវគ្គផ្តាច់ព្រ័ត្រ Champions League រដូវកាលមុន ខណៈរដូវកាលក្រុមបានឈានទៅវគ្គ១៦ក្រុមចុងក្រោយផងដែរ។ ដូច្នេះបើសិន Neymar មានរបួសធ្ងន់ធ្ងរនឹងប៉ះពាល់ដល់ក្រុមមិនខាន។

Neymar បានចូលរួមជាមួយ PSG ក្នុងតម្លៃកំណត់ត្រាពិភពលោក ២៦៦ លានដុល្លារពី Barcelona កាលពីខែសីហាឆ្នាំ ២០១៧។ រយៈពេល៣រដូវកាល រូបគេបានជួយក្រុមឈ្នះ Ligu1 បារាំង៣លើកជាប់ៗគ្នា៕