ជាតិ
ផ្ទះសសរ ១០០ អាយុកាលជាង១០០ឆ្នាំនៅខេត្តក្រចេះ នឹងបញ្ចប់ការសាងសង់នៅចុងឆ្នាំនេះ ផ្ទះសសរ១០០ អាយុកាលជាង ១០០ឆ្នាំ ដែលសាងសង់ឡើងវិញ នៅទីតាំងវិហាររកាកណ្ដាល សង្កាត់រការកណ្ដាល ក្រុងក្រចេះ។ (រូបពីមន្ទីរក្រសួងវប្បធម៌ និងវិចិត្រសិល្បៈខេត្តក្រចេះ )
× ដោយ៖ ប៉ូ សុភា
ផ្ទះសសរ១០០ អាយុកាលជាង ១០០ឆ្នាំ ដែលសាងសង់ឡើងវិញដោយមន្ទីរវប្បធម៌ និងវិចិត្រសិល្បៈខេត្តក្រចេះ នឹងសាងសង់រួចរាល់ នៅចុងឆ្នាំ២០២០នេះ។ ផ្ទះនេះ សាងសង់ឡើងវិញ នៅទីតាំងវិហាររកាកណ្ដាល សង្កាត់រការកណ្ដាល ក្រុងក្រចេះ។
ប្រធានមន្ទីរវប្បធម៌ និងវិចិត្រសិល្បៈខេត្តក្រចេះលោក ទេព វាសនា បានបញ្ជាក់ថា ផ្ទះសសរ១០០ ដែល ដំណើរការសាងសង់នេះ បាន៩៥ភាគរយហើយ ។ បើតាមលោក វាសនា ផ្ទះសសរ១០០នេះ ជាផ្ទះបុរាណមួយដែលមានអាយុកាលជាង ១០០ឆ្នាំ ។
ថ្លែងប្រាប់សារព័ត៌មានថ្មីៗ លោក ទេព វាសនា បានបញ្ជាក់ថា ៖«ផ្ទះសសរ១០០ នេះនឹងត្រូវបញ្ចប់ការសាងសង់ទាំងស្រុងនៅចុងឆ្នាំ២០២០នេះ»។
បើតាមគម្រោងមន្ទីរវប្បធម៌ ផ្ទះនេះនឹងត្រូវរៀបចំឱ្យក្លាយទៅជាទីតាំងទេសចរណ៍វប្បធម៌ និងសិល្បៈ ដើម្បីលើកស្ទួយវិស័យទេសចរណ៍នៅក្នុងខេត្តក្រចេះផង។« នៅពេលសាងសង់រួចរាល់ ខាងមន្ទីរនឹងរៀបចំឱ្យមានការដាក់តាំងបង្ហាញ នូវផលិតផលក្នុងស្រុក ដើម្បីបង្ហាញដល់ទេសចរ និងមានបង្កើតឱ្យមានកម្មវិធីនានា ដើម្បីជាការទាក់ទាញអ្នកទេសចរឱ្យទៅកម្សាន្តនៅទីតាំងនេះ »។ នេះជាការបញ្ជាក់របស់លោក ទេព វាសនា ។
ក្រសួងវប្បធម៌ និងវិចិត្រសិល្បៈ បានទិញផ្ទះសសរ១០០នេះ ពីគ្រួសារមួយ នៅក្នុងភូមិកោះកណ្តុរ ស្រុកឆ្លូង ខេត្តក្រចេះ។ ការសម្រេចទិញនេះ ដោយសារម្ចាស់ផ្ទះមានបំណងរើផ្ទះ ព្រោះត្រូវយកដីចែកឲ្យកូនៗបន្តទៀត ខណៈផ្ទះនេះក៏មានសភាពចាស់ទ្រុឌទ្រោមផងដែរ។ នៅពេលដែលក្រសួងវប្បធម៌សម្រេចទិញនេះ ផ្ទះនេះនៅសល់សសរត្រឹមតែ៥០ប៉ុណ្ណោះ ទើបតម្រូវឲ្យមន្ត្រីជំនាញយកទៅសាងសង់ឡើងវិញ តាមទ្រងទ្រាយដើម។
ផ្ទះសសរ១០០នេះ ចាប់ផ្ដើមរើចេញដើម្បីសាងសង់ឡើងវិញ កាលពីថ្ងៃ២១ មិថុនា ២០២០។ ផ្ទះនេះ មិនមានការបរិច្ឆេទច្បាស់លាស់នោះទេ ខណៈម្ចាស់ផ្ទះ ដែលកំពុងរស់នៅបច្ចុប្បន្ននេះ គឺជាកូនចៅជំនាន់ទី៧ ហើយ។ ដោយសារតែផ្ទះរស់នៅតកូនចៅជំនាន់ទី៧នេះហើយ ទើបមន្ទីរវប្បធម៌ខេត្តក្រចេះ សន្មត់ថា ផ្ទះនេះ មានអាយុកាលជាង១០០ឆ្នាំហើយ។ នេះបើតាមប្រធានមន្ទីរវប្បធម៌ខេត្តក្រចេះ លោក ទេព វាសនា ធ្លាប់ប្រាប់កន្លងមក៕
Tag:
ផ្ទះបុរាណ
វិស័យទេសចរណ៍
រួចរាល់
© រក្សាសិទ្ធិដោយ thmeythmey.com