សម្ដេច ហ៊ុន សែន ៖ គ្មានការបញ្ចប់តំណែងលោក ឆែម សាវុធ ដែលជាជនរងគ្រោះដោយសារកូវីដ-១៩ឡើយ

COVID-19

ជាតិ

សម្ដេច ហ៊ុន សែន ៖ គ្មានការបញ្ចប់តំណែងលោក ឆែម សាវុធ ដែលជាជនរងគ្រោះដោយសារកូវីដ-១៩ឡើយ

15, Dec 2020 , 9:48 am

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ ថ្លែងចេញពីគេហដ្ឋាន តាមរយៈទូរទស្សន៍ជាតិកម្ពុជា សម្ដេចនាយករដ្ឋមន្ត្រី ហ៊ុន សែន បានប្រកាសថា លោក ឆែម សាវុធ អគ្គនាយកនៃអគ្គនាយកដ្ឋានពន្ធនាគារ ក្រសួងមហាផ្ទៃ គ្មានកំហុសអ្វីឡើយ លើបញ្ហាជំងឺកូវីដ-១៩។ សម្ដេច ថ្លែងបែបនេះ ទៅកាន់អ្នកផ្ដល់យោបល់ឲ្យសម្ដេច ដាក់លោក ឆែម សាវុធ ចូលនិវត្តដោយសារលោកមានកូវីដ-១៩ ដែលបង្កឲ្យមានការឆ្លងចូលសហគមន៍នៃព្រឹត្តិការណ៍ ២៨ វិច្ឆិកា។

សម្ដេច ហ៊ុន សែន បានប្រកាសថា ករណីឆ្លងជំងឺកូវីដ-១៩ មិនមែនជាពេលដែលត្រូវចាប់ទោសពៃរ៍លើអ្នកណាម្នាក់ទេ ព្រោះមនុស្សគ្រប់រូបសុទ្ធតែរងគ្រោះដោយសារជំងឺកាចសាហាវមួយនេះ។ ដូច្នេះសម្រាប់ សម្ដេច លោក ឆែម សាវុធ គ្មានទោសកំហុសអ្វីដែលត្រូវបញ្ចប់តំណែងឡើយ។ «គាត់(លោក ឆែម សាវុធ) មិនមែនជាអ្នកសាងកំហុសទេ គឺកូវីដ-១៩ ជាអ្នកសាងបញ្ហា»។ នេះជាការបញ្ជាក់របស់ប្រមុខរដ្ឋាភិបាល ដែលបានបន្ថែមថា បើសិនជាសម្ដេច ដាក់លោក ឆែម សាវុធ ឲ្យចូលនិវត្តពីអគ្គនាយកពន្ធនាគារនោះ គឺស្មើនឹងទង្វើអសីលធម៌មួយ ចំពោះលោក សាវុធ ដែលជាជនរងគ្រោះដោយសារជំងឺកូវីដ-១៩ នេះ។

ថ្លែងក្នុងសន្និសីទកាសែត នៅព្រឹកថ្ងៃទី១៥ ធ្នូនេះ លោកនាយករដ្ឋមន្ត្រី បានអះអាងថា ករណីជំងឺកូវីដ-១៩ ដែលឆ្លងចូលសហគមន៍ នៃព្រឹត្តិការណ៍២៨ វិច្ឆិកានេះ គឺគួរតែអរគុណលោក ឆែម សាវុធ និងភរិយា ដែលដឹងថាមានបញ្ហាសុខភាព ហើយទៅពិនិត្យសុខភាពទាន់ពេលវេលា ដែលធ្វើឱ្យរដ្ឋាភិបាលអាចឈានទៅដល់ការគ្រប់គ្រង់ស្ថានការណ៍បានភ្លាមៗ។ ដ្បិតសម្ដេច ហ៊ុន សែន អះអាងថា គ្រប់គ្រងព្រឹត្តិការណ៍ ២៨ វិច្ឆិកា បានក្តី ប៉ុន្តែមិនទាន់អាចសន្មត់ថា បញ្ចប់ស្ថានការណ៍នេះឡើយ។

បច្ចុប្បន្ន ព្រឹត្តិការណ៍សហគមន៍២៨វិច្ឆិកា មានអ្នកជំងឺ៤១នាក់ ក្នុងនោះករណីចុងក្រោយ គឺជាទារកអាយុ៧ខែម្នាក់ ដែលឃើញវិជ្ជមានក្រោយតេស្តលើកទី៣ ខណៈម្តាយរបស់ទារកដែលជាសះស្បើយរួចហើយ ត្រូវបន្តនៅមន្ទីរពេទ្យដើម្បីថែទាំកូន។ នេះបើតាមសម្ដេច ហ៊ុន សែន។

គិតត្រឹមថ្ងៃទី១៥ ធ្នូ នេះ អ្នកជំងឺកូវីដ-១៩ ចំនួន៣នាក់ នៃព្រឹត្តិការណ៍ ២៨ វិច្ឆិកា បានជាសះស្បើយហើយ។ ក្នុងនោះ មានលោក ឆែម សាវុធ អគ្គនាយកពន្ធនាគារ , ស្ត្រីជនជាតិខ្មែរ អាយុ៣០ឆ្នាំ សមាជិកគ្រួសាររបស់អ្នកបើកបរឲ្យលោក ឆែម សាវុធ អគ្គនាយកពន្ធនាគារ និងបុរស អាយុ៣៤ឆ្នាំ ធ្វើការនៅក្រសួងមហាផ្ទៃ ដែលជាអ្នកប៉ះពាល់ជាមួយលោកអគ្គនាយកពន្ធនាគារផ្ទាល់។

កម្ពុជា មានអ្នកជំងឺកូវីដ-១៩ ឡើងដល់៣៦២នាក់ ក្នុងនោះ៣១២នាក់ បានជាសះស្បើយ។ អ្នកជំងឺដែលបន្តសម្រាកព្យាបាល មាន៣៣នាក់នៅពេទ្យមិត្តភាពខ្មែរសូវៀត ១០នាក់នៅមណ្ឌលសុខភាពចាក់អង្រែ និង៧នាក់នៅមជ្ឈមណ្ឌលជាតិប្រយុទ្ធនឹងជំងឺរបេង និងហង់សិន៕