អន្តរជាតិ
ICC ច្រានចោលបណ្ដឹងរបស់ជនជាតិវីហ្គ័រដែលស្នើឲ្យស៊ើបឧក្រិដ្ឋកម្មនៅស៊ីនជាំង
អគ្គរដ្ឋអាជ្ញាតុលាការព្រហ្មទណ្ឌអន្តរជាតិ Fatou Bensouda ។ រូបភាព AFP
×![]()
ដោយ: ធៀន ភារិន្ទ
តុលាការព្រហ្មទណ្ឌអន្តរជាតិ (ICC) បានច្រានចោលពាក្យបណ្តឹងរបស់ក្រុមជនជាតិភាគតិចវីហ្គ័រ ដែលស្នើឲ្យស៊ើបអង្កេតទៅលើចិនជុំវិញអំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ។ នេះបើតាមការបញ្ជាក់របស់រដ្ឋអាជ្ញាតុលាការ ICC លោកស្រី Fatou Bensouda នៅថ្ងៃទី១៤ ខែធ្នូ។ 
នៅក្នុងខែកក្កដាកន្លងទៅ ក្រុមជនជាតិភាគតិចវីហ្គ័រ បានផ្តល់ឯកសារ និងភស្តុតាងជាច្រើនទៅតុលាការឧក្រិដ្ឋកម្មអន្តរជាតិ ដោយចោទចិនពីការឃុំខ្លួនជនជាតិវីហ្គ័រជាង ១លាននាក់ និងជនជាតិភាគតិចមូស្លីមផ្សេងទៀត នៅក្នុងមណ្ឌលកែប្រែឡើងវិញ និងចាប់បង្ខំមិនឲ្យស្ត្រីជនជាតិភាគតិចអាចបង្កកំណើតបាន។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ជាការឆ្លើយតបនឹងភស្តុតាងរបស់ជនជាតិវីហ្គ័រ ការិយាល័យរបស់លោកស្រី Fatou Bensouda រដ្ឋអាជ្ញាតុលាការ ICC បានបញ្ជាក់ថា ពាក្យបណ្តឹងនេះ មិនអាចទទួលស្គាល់បានឡើយ ដោយសារតែសកម្មភាពទាំងនោះ បានធ្វើឡើងនៅក្នុងទឹកដីចិន ដែលមិនមែនជាប្រទេសហត្ថលេខី នៃតុលាការឧក្រិដ្ឋកម្មអន្តរជាតិ។ «លក្ខខណ្ឌដើមសម្រាប់ការអនុវត្តយុត្តាធិការរបស់តុលាការ គឺមិនត្រូវគ្នាជាមួយពាក្យបណ្តឹងនៃការចោទប្រកាន់ឡើយ»។ នេះបើតាមបញ្ជាក់នៅលើរបាយការណ៍របស់ការិយាល័យលោកស្រី Bensouda។
ទន្ទឹមនេះ រដ្ឋអាជ្ញាតុលាការ ICC បានបញ្ជាក់ផងដែរថា វាគ្មានមូលដ្ឋានណាមួយក្នុងដាក់ពាក្យបណ្តឹងនៅពេលនេះលើការតវ៉ាផ្សេងទៀតដែលថា មានការចាប់បង្ខំឲ្យជនជាតិភាគតិចវីហ្គ័រត្រលប់ពី កម្ពុជា និងតាហ្ស៊ីគីស្ថាន ទៅចិនវិញដែរ។ ទាក់ទងរឿងនេះ ខាងជនជាតិវីហ្គ័រវិញ បានលើកឡើងថា បើទោះបីជា ICC គ្មានយុត្តាធិការនៅក្នុងប្រទេសចិនមែន ប៉ុន្តែតុលាការឧក្រិដ្ឋកម្មអន្តរជាតិ អាចចោទចិនបាន ព្រោះរឿងទាំងនោះ បានកើតឡើងនៅតាហ្ស៊ីគីស្ថាន និងកម្ពុជា ដែលជាហត្ថលេខី។ មេធាវីរបស់ជនជាតិវីហ្គ័រ ក៏បានស្នើទៅ ICC ឲ្យពិចារណាឡើងវិញ លើភស្តុតាងថ្មី ដែលបានដាក់ទៅផងដែរ។
ដោយឡែករដ្ឋាភិបាលទីក្រុងប៉េកាំងវិញ បានហៅការចោទប្រកាន់នេះ ថាគ្មានមូលដ្ឋានច្បាស់លាស់ និងបញ្ជាក់ជាថ្មីថា មណ្ឌលនៅក្នុងតំបន់ស៊ីនជាំង គ្រាន់តែជាកន្លែងបណ្តុះបណ្តាលការងារប៉ុណ្ណោះ ដើម្បីបង្ការជនជាតិភាគតិចវីហ្គ័រពីភេរវកម្ម និងភាពជ្រុលនិយម។
សូមបញ្ជាក់ថា ពាក់ព័ន្ធបញ្ហាជនជាតិភាគតិចវីហ្គ័រនេះ ចិន បានរងការរិះគន់យ៉ាងខ្លាំងពីសហគមន៍អន្តរជាតិ ជាពិសេសអាមេរិក។ កន្លងមករដ្ឋាភិបាលក្រុងវ៉ាស៊ីនតោន បានដាក់ទណ្ឌកម្មលើមន្ត្រីចិន ដែលពាក់ព័ន្ធនឹងជនជាតិវីហ្គ័រនេះ ជាបន្តបន្ទាប់៕
Tag:
វីហ្គ័រ
ចិន
ICC
© រក្សាសិទ្ធិដោយ thmeythmey.com
