COVID-19
អន្តរជាតិ
UNESCO៖ គ្រូបង្រៀន គួរស្ថិតក្នុងចំណោមអ្នកទទួលបានការចាក់វ៉ាក់សាំងមុនគេ រូបភាព Xinhua
× អង្គការសហប្រជាជាតិលើប្រព័ន្ធអប់រំ វិទ្យាសាស្ត្រ និងវប្បធម៌ (UNESCO) នៅថ្ងៃទី១៤ ខែធ្នូ បានអំពាវនាវឲ្យរដ្ឋាភិបាលនៅបណ្តាប្រទេសមួយចំនួនគិតគូរពីអាទិភាពរបស់គ្រូបង្រៀននៅក្នុងយុទ្ធនាការចាក់វ៉ាក់សាំងប្រឆាំងកូវីដ-១៩ ។ បើតាមអង្គការអន្តរជាតិនេះ គ្រូបង្រៀនក៏ជាបុគ្គលិកជួរមុខ ដែលត្រូវរងផលប៉ះពាល់ខ្លាំងពីកូវីដ-១៩ ផងដែរ។
ក្នុងកិច្ចប្រជុំតាមប្រព័ន្ធវីដេអូជាមួយអង្គការប្រព័ន្ធអប់រំអន្តរជាតិ (EI) ប្រធានអង្គការ UNESCO លោកស្រី Audrey Azoulay បានលើកឡើងថា ពិភពលោកកំពុងតែមានការវិវឌ្ឍដ៏វិជ្ជមានមួយ តាមរយៈវ៉ាក់សាំងប្រឆាំងកូវីដ-១៩។ ក្នុងន័យនេះ លោកស្រី ស្នើឲ្យបញ្ចូលគ្រូបង្រៀនក្នុងក្រុមដែលទទួលបានវ៉ាក់សាំងមុន។
«យើងជឿថា គ្រូបង្រៀន និងបុគ្គលិកប្រព័ន្ធអប់រំ ត្រូវតែត្រូវបានចាត់ទុកថាជាក្រុមអាទិភាព»។ ប្រធានអង្គការ UNESCO បន្ថែមបែបនេះក្នុងសារវីដេអូ។
ក្នុងសារវីដេអូដដែល លោកស្រីប្រធាន UNESCO និងប្រធានអង្គការប្រព័ន្ធអប់រំអន្តរជាតិ លោក David Edwards បានយល់ឃើញដូចគ្នាថា នៅពេលសាលារៀន និងមជ្ឈមណ្ឌលអប់រំផ្សេងទៀត ត្រូវបានបិទក្នុងគោលបំណងទប់ស្កាត់ការរាតត្បាតកូរ៉ូណាវីរុស គ្រូបង្រៀន និងបុគ្គលិកប្រព័ន្ធអប់រំផ្សេងទៀត នៅតែជាបុគ្គលិកជួរមុខ ដែលរងផលប៉ះពាល់ពីកូវីដ-១៩។
តាមការចុះផ្សាយរបស់ទីភ្នាក់ងារព័ត៌មានAFP លោកស្រីAzoulay និង លោក Edwards បន្តទៀតថា នៅពេលបិទសាលា ការសិក្សាតាមប្រព័ន្ធអនឡាញ ត្រូវបានបង្កើតឡើង ហើយគ្រូបង្រៀន ក៏បានរៀនសម្របខ្លួនតាមបែបនោះដែរ ហើយនៅពេលសាលាបើកឡើងវិញ គ្រូបង្រៀន គឺពេញចិត្តជាខ្លាំង ក្នុងការបន្តកិច្ចការងាររបស់ខ្លួននៅសាលា។ សាលារៀន ជាកន្លែងដែលមិនអាចជំនួសបាន។
ការអំពាវនាវខាងលើនេះ ធ្វើឡើងស្របពេលអាមេរិក បានចាប់ផ្តើមយុទ្ធនាការចាក់វ៉ាក់សាំងរបស់ខ្លួនលើក្រុមគ្រូពេទ្យ និងអង់គ្លេសលើក្រុមមនុស្សចាស់ ដែលមានអាយុចាប់ពី ៨០ឆ្នាំឡើងទៅ និងក្រុមងាយរងគ្រោះ។ អាមេរិក គ្រោងនឹងចាក់វ៉ាក់សាំងលើមនុស្សឲ្យបាន ២០លាននាក់ មុនដំណាច់ឆ្នាំ ២០២០ ។
ខណៈក្រុមគ្រូពេទ្យ ជាអ្នកឈរជួរមុខក្នុងការទទួលវ៉ាក់សាំងមុនគេ គ្រូបង្រៀន ក៏ស្ថិតនៅជួរបន្ទាប់នៃការទទួលវ៉ាក់សាំងដែរ។ លើសពីមនុស្សទាំងពីរក្រុមនេះ ក្រុមមនុស្សវ័យចំណាស់ និងអ្នកងាយរងគ្រោះ ក៏ស្ថិតក្នុងចំណោមក្រុមមនុស្សអាទិភាពដែរ៕
© រក្សាសិទ្ធិដោយ thmeythmey.com