Pep ថា គ្មានជម្រើសណាល្អជាង Arteta ឡើយសម្រាប់តំណែងគ្រូ Arsenal

កីឡាអន្តរជាតិ

អន្តរជាតិ

Pep ថា គ្មានជម្រើសណាល្អជាង Arteta ឡើយសម្រាប់តំណែងគ្រូ Arsenal

15, Dec 2020 , 5:23 pm

រូបភាព

ដោយ: ទេព ពិទូរ្យ

លោក Pep Guardiola អ្នកចាត់ការ Manchester City បានគាំទ្រអតីតជំនួយការខ្លួនលោក Mikel Arteta បើទោះដឹកនាំ Arsenal ទទួលលទ្ធផលគួរសង្វេគនៅដើមរដូវកាលនេះក៏ដោយ។ Guardiola អះអាងថា គ្មានគ្រូណាល្អជាង Arteta សម្រាប់តំណែងនេះទៀតឡើយ។

ឆ្លងកាត់ការប្រកួត១២លើកក្នុងក្របខណ្ឌ Premier League ក្រោមការដឹកនាំរបស់លោក Arteta កាំភ្លើងធំរកបានតែ១៣ពិន្ទុប៉ុណ្ណោះ និងស្ថិតនៅចំណាត់ថ្នាក់ទី១៥។ យ៉ាងណាក៏ដោយចាប់តាំងពីអ្នកចាត់ការសញ្ជាតិអេស្ប៉ាញឡើងទៅកាន់តំណែងនេះ កាលពីខែធ្នូឆ្នាំមុន បានជួយ Arsenal ឈ្នះ FA Cup និង Community Shield រួចមកហើយ។

លោក Guardiola បាននិយាយនៅមុនការប្រកួតលីគរវាង Man City ទល់ West Brom នៅថ្ងៃទី១៥ ខែធ្នូនថា៖«Arsenal មិនមានអ្នកចាត់ការណាល្អជាងនេះ ដើម្បីអាចដឹកនាំក្រុមនៅឆ្នាំនេះ និងឆ្នាំក្រោយៗទៀតបានទេ។ ខ្ញុំមិនចាំបាច់ផ្តល់ការគាំទ្រជាសាធារណៈទេពីព្រោះគាត់ Arteta មានលក្ខណសម្បត្តិគ្រប់គ្រាន់ហើយ។ គាត់ជាអ្នកចាត់ការដ៏ឆ្នើមម្នាក់ដែលខ្ញុំធ្លាប់ធ្វើការជាមួយ»។

អតីតអ្នកចាត់ការ Barcelona និង Bayern Munich បន្ថែមថា លោកប្រាកដណាស់ថាអតីតជំនួយការរបស់ខ្លួនរូបនេះ នឹងធ្វើអ្វីៗគ្រប់យ៉ាងដើម្បីកែប្រែស្ថានការក្រុមដែលកំពុងយ៉ាន់យ៉ឺនឲ្យល្អប្រសើរវិញបាន។ «ប្រសិនបើខ្ញុំជាសមាជិកក្រុមប្រឹក្សាភិបាលក្លិប ខ្ញុំនឹងមិនមានការសង្ស័យអំពីសមត្ថភាពរបស់ Arteta បើទោះ Arsenal ស្ថិតក្នុងស្ថានភាពនេះក្តី»។

Arsenal កាន់តែធ្លាក់ក្នុងស្ថានភាពយ៉ាប់យ៉ឺន ក្រោយបន្តចាញ់ Burnley ក្នុងដីខ្លួនឯងដោយលទ្ធផល ១-០ និងជាបរាជ័យលើកទី៧ក្នុងការប្រកួតលីគកំពូលអង់គ្លេសរដូវកាលនេះ។ អ្វីដែលគួរឲ្យអាម៉ាសសម្រាប់ក្រុមក្រោមការដឹកនាំរបស់លោក Arteta គឺបរាជ័យក្នុងដីលើកទីបួនជាប់គ្នាជាលើកដំបូងក្នុងរយៈពេល ៦១ ឆ្នាំផងដែរ៕