ជាតិ
នយោបាយជាតិ
អ្នកស្រី ស៊ូលី សារ៉ូ ជាស្ត្រីខ្មែរ-អាមេរិក ដំបូងជាប់ឆ្នោតជាក្រុមប្រឹក្សាក្រុងឡុងប៊ិច រដ្ឋកាលីហ្វញ៉ា
រូបពីកាសែត Los Angeles Time
×![]()
ភ្នំពេញ៖ អ្នកស្រី ស៊ូលី សារ៉ូ ជាស្ត្រីខ្មែរ-អាមេរិក ដំបូង ដែលជាប់ឆ្នោតជាក្រុមប្រឹក្សាក្រុងឡុងប៊ិច រដ្ឋកាលីហ្វញ៉ា សហរដ្ឋអាមេរិក ។ ស្ត្រីខ្មែរ-អាមេរិករូបនេះ បានស្បថចូលកាន់តំណែងជាផ្លូវការ កាលពីថ្ងៃទី១៥ ធ្នូ។ នេះបើតាមការចុះផ្សាយរបស់កាសែត Los Angeles Time។
នយោបាយរបស់អ្នកស្រី ស៊ូលី សារ៉ូ គឺផ្ដោតទៅលើបញ្ហាជាក់ស្ដែងនៅក្នុងសង្គម។ អ្នកស្រី ចង់គូសវាសផ្លូវមួយឲ្យមានភាពប្រសើរឡើង ដោយក្នុងនោះអ្នកស្រី គ្រោងបង្កើនការឆ្លើយតបនៅតាមការិយាល័យ ទទួលពាក្យបណ្ដឹងឲ្យមានប្រសិទ្ធភាព និងគុណភាព ជាពិសេសកាត់បន្ថយអត្រាគ្មានផ្ទះសម្បែងរបស់ពលរដ្ឋ។
ស្បថចូលកាន់តំណែង កាលពីថ្ងៃទី១៥ ធ្នូ អ្នកស្រី សារ៉ូ ដែលមានអាយុ ៤០ ឆ្នាំ នឹងក្លាយជាស្ត្រីខ្មែរ-អាមេរិកបំបូងគេ ដែលជាប់ជាសមាជិកក្រុមប្រឹក្សា នៃទីក្រុងឡុងប៊ិច រដ្ឋកាលីហ្វញ៉ា។ ចាប់តាំងពីទសវត្ស ១៩៨០មក ទីក្រុងឡុងប៊ិច ក្លាយជាកន្លែងដែលមានជនភៀសខ្លួនខ្មែរ-អាមេរិក រស់នៅច្រើនជាងគេ។
ក្រោយទទួលបានតំណែងជាសមាជិកក្រុមប្រឹក្សានេះហើយ អ្នកស្រី សារ៉ូ ក៏លើកទឹកចិត្តឲ្យពលរដ្ឋខ្មែរ ដែលភៀសខ្លួនរស់នៅអាមេរិក ជាពិសេសយុវជនជំនាន់ក្រោយ ត្រូវប្រឹងប្រែងតស៊ូ ដើម្បីទទួលបានភាពជោគជ័យ។
«មនុស្សគ្រប់សុទ្ធតែធ្លាប់ដឹងថា យើងក៏ដូចជាប្រជាជនដទៃទៀត មានតម្រូវការនិងជាជនរងគ្រោះ។ យើងក៏ដូចសហគមន៍ផ្សេងៗទៀតដែរ។ ហើយយើងក៏អាចត្រូវបានជ្រើសតាំងជាមន្ត្រីនិងសិល្បករដូចគ្នា»។ នេះជាការលើកឡើងរបស់អ្នកស្រី សារ៉ូ នៅក្នុងកាសែត Los Angeles Time។
ដើមឡើយ អ្នកស្រី សារ៉ូ បានកើតនៅក្នុងជំរុំជនភៀសខ្លួនមួយនៅប្រទេសថៃ ។ ប៉ុន្តែក្រោយមកគ្រួសាររបស់នាង បានផ្លាស់ទៅរស់នៅអាមេរិកវិញ ក្រោយពីទទួលបានសិទ្ធិជ្រកកោន។ គ្រានោះ ឪពុកម្តាយរបស់នាងក៏បានធ្វើការនៅរោងចក្រមួយកន្លែង បន្ទាប់ពីបានតាំងទីលំនៅនៅអាមេរិក៕
Tag:
នយោបាយ
ស្ត្រីខ្មែរ-អាមេរិក
© រក្សាសិទ្ធិដោយ thmeythmey.com
