អន្តរជាតិ
តួកគី មិនបោះបង់ការទិញប្រព័ន្ធការពារ S-400 ទោះរងទណ្ឌកម្មពីអាមេរិក លោក Mevlut Cavusoglu រដ្ឋមន្ត្រីការបរទេសតួកគី។ រូបភាព៖ AFP
× តួកគី នឹងមិនបោះបង់ការទិញប្រព័ន្ធមីស៊ីលការពារដែនអាកាស S-400 ពីរុស្ស៊ីឡើយ។ រដ្ឋមន្ត្រីការបរទេសតួកគីលើកឡើងបែបនេះបន្ទាប់ពីអាមេរិកដាក់ទណ្ឌកម្មលើឧស្សាហកម្មយោធា និងមន្ត្រីរបស់ខ្លួន។ តួកគី ក៏បានអះអាងផងដែរថាខ្លួននឹងឆ្លើយតបឲ្យសក្តិសម បន្ទាប់ពីពិនិត្យវាយតម្លៃទណ្ឌកម្មរបស់អាមេរិក។
នៅថ្ងៃទី១៤ ធ្នូ រដ្ឋបានអាមេរិក បានសម្រេចដាក់ទណ្ឌកម្មលើតួកគីចំពោះការទិញប្រព័ន្ធការពារដែនអាកាស S-400 ពីរុស្ស៊ី ដោយសំដៅលើឧស្សាហកម្មយោធាតួកគី ដោយហាមមិនឲ្យផ្តល់អាជ្ញាប័ណ្ណនាំចេញ កម្ចី និងឥណទានទៅកាន់ទីភ្នាក់ងារផ្គត់ផ្គង់អាវុធរបស់តួកគី។ កាលពីឆ្នាំ២០១៧ តួកគីបានចុះកិច្ចព្រមព្រៀង ទិញប្រព័ន្ធមីស៊ីលការពារដែនអាកាស S-400 ពីរុស្ស៊ីក្នុងតម្លៃ២,៥ពាន់លានដុល្លារ។
ឆ្លើយតបទៅនឹងការដាក់ទណ្ឌកម្មពីអាមេរិកនេះ រដ្ឋមន្ត្រីការបរទេសតួកគីលោក Mevlut Cavusoglu លើកឡើងថា ការដាក់ទណ្ឌកម្មនេះគឺខុសឆ្គងទាំងផ្នែកនយោបាយ និងផ្លូវច្បាប់។ លោកសង្កត់ធ្ងន់ថា ទណ្ឌកម្មនេះ ជាការវាយប្រហារមកលើសិទ្ធិអធិបតេយ្យភាពរបស់តួកគី ហើយទណ្ឌកម្មនេះក៏នឹងមិនប៉ះពាល់អ្វីមកលើតួកគីឡើយ។ លោកនិយាយបែបនេះ ក្នុងកិច្ចសម្ភាសជាមួយប្រព័ន្ធផ្សព្វផ្សាយKanal 24។
កាលពីឆ្នាំ២០១៩ កន្លងទៅប្រធានាធិបតីតួកគីលោក តៃយីប អ៊ែរដូហ្កាន់ ធ្លាប់ប្រាប់ប្រធានាធិបតីអាមេរិក ដូណាល់ ត្រាំ ក្នុងជំនួបឯសេតវិមានថា តួកគីមិនបោះបង់ប្រព័ន្ធមីស៊ីលការពារដែនអាកាស S-400 ឡើយ។ គ្រានោះលោក Erdogan ប្រាប់លោក ត្រាំ ថា តួកគីត្រូវបង្ខំចិត្តទិញ S-400 ដោយសារតែអាមេរិកមិនព្រមលក់ប្រព័ន្ធការពារដែនអាកាស Patriot ឲ្យខ្លួន។
អាមេរិក ក៏ដូចជាប្រទេសឯទៀតដែលជាសម្ព័ន្ធមិត្ត NATO រិះគន់តួកគីមិនឈប់ឈរចំពោះការទិញ S-400 ពីរុស្ស៊ីនេះ។ អាមេរិក អះអាងថា ប្រព័ន្ធការពាររបស់រុស្ស៊ីនេះ មិនដំណើការជាមួយនឹងប្រព័ន្ធការពាររបស់ NATO ឡើយ ដោយហេតុផលនេះហើយទើបអាមេរិកបានដកតួកគីចេញពីកម្មវិធីអភិវឌ្ឍយន្តហោះចម្បាំង F-35 ។
ជាសមាជិកNATOក្តី តួកគីក្នុងរយៈពេលប៉ុន្មានឆ្នាំចុងក្រោយនេះមើលមុខអាមេរិក និងសម្ព័ន្ធមិត្តមិនចំដោយសារបញ្ហាសង្គ្រាមស៊ីវិលនៅស៊ីរី ជម្លោះរវាងអាមេនី និងអាស៊ែបៃហ្សង់ និងជម្លោះដែនទឹកក្នុងសមុទ្រមេឌីទែរ៉ាណេខាងកើត៕
© រក្សាសិទ្ធិដោយ thmeythmey.com