សម្ដេច ហ៊ុន សែន៖ អ្នកសារព័ត៌មាន«កុំបំពានសិទ្ធិអ្នកដទៃ កុំបំភ្លៃការពិត» ហើយត្រូវប្រយុទ្ធជំងឺកូវីដ-១៩

ជាតិ

សម្ដេច ហ៊ុន សែន៖ អ្នកសារព័ត៌មាន«កុំបំពានសិទ្ធិអ្នកដទៃ កុំបំភ្លៃការពិត» ហើយត្រូវប្រយុទ្ធជំងឺកូវីដ-១៩

18, Dec 2020 , 11:09 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ សម្ដេច ហ៊ុន សែន រំឭកអ្នកសារព័ត៌មាន«កុំបំពានសិទ្ធិអ្នកដទៃ កុំបំភ្លៃការពិត» នៅក្នុងបរិបទនៃការប្រយុទ្ធប្រឆាំងជំងឺកូវីដ-១៩។ សាររបស់សម្ដេចនេះ បានផ្ញើទៅវេទិកានិពន្ធនាយកសារព័ត៌មានកម្ពុជា ស្តីពី «តួនាទីសារព័ត៌មានក្នុងបរិបទជំងឺរាតត្បាតសកល និងព័ត៌មានក្លែងក្លាយ» ដែលប្រព្រឹត្តទៅនាថ្ងៃទី១៩ ធ្នូ។

សម្ដេច ហ៊ុន សែន ចាត់ទុកប្រធានបទ «តួនាទីសារព័ត៌មានក្នុងបរិបទជំងឺរាតត្បាតសកល និងព័ត៌មានក្លែងក្លាយ» នេះ ជារឿងសំខាន់ និងស្របតាមការវិវត្តនៃសភាពការណ៍ជាក់ស្ដែង ដែលសកលលោកទាំងមូលកំពុងប្រឈមមុខ។

សារលិខិតរបស់នាយករដ្ឋមន្ត្រី ហ៊ុន សែន បានបញ្ជាក់ដូច្នេះថា ៖ «ជាមួយគ្នានេះដែរ ឆ្លងកាត់នូវបទពិសោធន៍ និងឧបសគ្គការរីករាលដាលនៃជំងឺឆ្លងកូវីដ-១៩ ខ្ញុំសង្ឃឹមថា វេទិការនិពន្ធនាយកសារព័ត៌មានឆ្នាំ២០២០នេះ នឹងមានកិច្ចពិភាក្សាស៊ីជម្រៅអំពីការបំពេញភារកិច្ចលើវិស័យសារព័ត៌មានក្នុងបរិបទថ្មីនៃបញ្ហាប្រឈមការរាតត្បាតសកល ដែលជាឧបសគ្គនៃការបំពេញភារកិច្ចរបស់អ្នកសារព័ត៌មាន និងការប្រឆាំងព័ត៌មានក្លែងក្លាយដែលបង្កមហន្តរាយដល់សង្គមជាអាទិភាព»។

សម្ដេច ហ៊ុន សែន ក៏មើលឃើញពីការលះបង់របស់អ្នកសារព័ត៌មាន ក្នុងការជម្នះ និងពុះពាររាល់ឧបសគ្គដែលប្រឈមមុខនឹងគ្រោះថ្នាក់នៃជំងឺកូវីដ-១៩ ដោយបំពេញការងារយ៉ាងសកម្មក្នុងការផ្សព្វផ្សាយពីការរាតត្បាត និងការទប់ស្កាត់ជំងឺកាចសាហាវនេះ ដើម្បីឲ្យពលរដ្ឋបានយល់អំពីសភាពការណ៍ពិតប្រាកដ។ មិនតែប៉ុណ្ណោះសម្ដេច ហ៊ុន សែន បានស្នើឲ្យស្ថាប័នព័ត៌មានទាំងអស់ សហការជាមួយក្រសួងស្ថាប័នជំនាញ ដើម្បីបណ្ដុះបណ្ដាលជំនាញបច្ចេកទេសដល់អ្នកសារព័ត៌មាន ឲ្យដើរទាន់ការវិវឌ្ឍបច្ចេកវិទ្យាឌីជីថល ដែលសម្រួលដល់ការបំពេញការងារប្រកបដោយសុវត្ថិភាព និងប្រសិទ្ធភាពនៅក្នុងបរិបទនៃជំងឺរាតត្បាតសកល ដែលមិនអាចប៉ាន់ស្មានបាននេះ។

អមជាមួយគ្នានេះ សម្ដេច ហ៊ុន សែន ក៏រំឭកឲ្យអ្នកសារព័ត៌មានគោរពច្បាប់ និងវិជ្ជាជីវៈខ្លួនផង។ «ជាថ្មីម្ដងទៀត ខ្ញុំសូមអំពាវនាវដល់ថ្នាក់ដឹកនាំស្ថាប័នសារព័ត៌មាន និងបងប្អូនអ្នកសារព័ត៌មានទាំងអស់សូមប្រកាន់ខ្ជាប់ខ្ជាប់នូវវិជ្ជាជីវៈសារព័ត៌មាន គោរពច្បាប់ និងគោរពគោលការណ៍ “កុំបំពានសិទ្ធិអ្នកដទៃ កុំបំភ្លៃការពិត” និងចូលរួមប្រយុទ្ធប្រឆាំងនឹងជំងឺកូវីដ-១៩ ដោយធ្វើការផ្សព្វផ្សាយព័ត៌មានអប់រំ និងវិធានការសុវត្ថិភាពរបស់ក្រសួងសុខាភិបាល ជូនប្រជាពលរដ្ឋឲ្យបានយល់ដឹងច្បាស់ និងចូលរួមប្រឆាំង ទប់ស្កាត់ និងលុបបំបាត់ការឆ្លងរីករាលដាលនៃជំងឺកូវីដ-១៩ ដែលកំពុងឆ្លងចូលសហគមន៍»។ នេះជាការបញ្ជាក់របស់សម្ដេច ហ៊ុន សែន ដែលស្នើឲ្យស្ថាប័នព័ត៌មានទាំងអស់ ចូលរួមប្រយុទ្ធប្រឆាំងនឹងព័ត៌មានក្លែងក្លាយ ដែលផ្សព្វផ្សាយដោយជនឱកាសនិយម ក្នុងគោលបំណងបំពុលបរិយាកាស និងធ្វើឲ្យចលាចលនៅក្នុងសង្គម។

គួរបញ្ជាក់ថា ក្លិបអ្នកកាសែតកម្ពុជា បានរៀបចំវេទិកានិពន្ធនាយកសារព័ត៌មានកម្ពុជា ដើម្បីពិភាក្សាផ្លាស់ប្ដូរយោបល់ និងបទពិសោធន៍ដែលបានអនុវត្តកន្លងមក និងកំណត់ទិសដៅសម្រាប់អនុវត្តបន្ត ក្នុងគោលបំណងបង្កើនការយល់ដឹងរបស់អ្នកសារព័ត៌មាន ក្នុងការបំពេញការងារតាមសីលធម៌ វិជ្ជាជីវៈ ប្រកបដោយការទទួលខុសត្រូវ។ ជាពិសេសលើកកម្ពស់ប្រសិទ្ធភាព និងសេរីភាពសារព័ត៌មាន ដែលធានាដោយរដ្ឋធម្មនុញ្ញ ស្តីពីរបបសារព័ត៌មានកម្ពុជា៕