COVID-19
ជាតិ
សុខភាព
អ្នកជំងឺកូវីដ-១៩ ពីព្រឹត្តិការណ៍សហគមន៍សះស្បើយបន្តបន្ទាប់ដោយនៅសល់តែ១៣ទៀតប៉ុណ្ណោះ
រូបភាពពីនាយកដ្ឋានប្រយុទ្ធនឹងជំងឺឆ្លង
×![]()
នាព្រឹកថ្ងៃទី១៨ធ្នូនេះ ក្រសួងសុខាភិបាលប្រកាសថា មានមនុស្សចំនួន១៧នាក់ទៀត បានជាសះស្បើយពីជំងឺកូវីដ-១៩(COVID-19)។ ករណីជាអ្នកសះស្បើយនេះមាន១៥នាក់ ជាអ្នកពាក់ព័ន្ធនឹងព្រឹត្តិការណ៍២៨វិច្ឆិកា និង២នាក់ទៀត ជាអ្នកធ្វើដំណើរចូលកម្ពុជា។ 
បើតាមក្រសួងសុខាភិបាល មនុស្ស១៥នាក់ ដែលពាក់ព័ន្ធនឹងព្រឹត្តិការណ៍២៨វិច្ឆិកា បានជាសះស្បើយពីកូវីដ-១៩នោះ មានបុគ្គលិកនៅហាងPedro ចំនួន៧នាក់។ ក្នុងនោះមាន ស្ត្រីវ័យ២២ឆ្នាំមា្នក់ មានអាសយដ្ឋានខណ្ឌច្បារអំពៅ, ស្ត្រីវ័យ២៤ឆ្នាំម្នាក់ នៅសង្កាត់ទន្លេបាសាក់ ខណ្ឌចំការមន, ស្ត្រីវ័យ២៣ឆ្នាំម្នាក់,ស្រី្តវ័យ៣៥ឆ្នាំម្នាក់ មានអាសយដ្ឋាននៅភូមិសន្សំកុសល សង្កាត់បឹងទំពុន ខណ្ឌមានជ័យ និងបុរសវ័យឆ្នាំ២០ទៀត មានអាសយដ្ឋានក្នុងសង្កាត់ទឹកល្អក់៣ ខណ្ឌទួលគោក រាជធានីភ្នំពេញ។ សម្រាប់ស្ត្រីវ័យ៣៣ឆ្នាំនិងបុរសវ័យ២០ឆ្នាំម្នាក់នៃបុគ្គលិកនៅហាងPedro មានអាសយដ្ឋានក្រុងតាខ្មៅ ខេត្តកណ្តាល បានសះស្បើយពីជំងឺនេះ ផងដែរ។
ក្រៅពីបុគ្គលិករបស់ហាងPedro ក៏មានបុរសវ័យ២១ឆ្នាំម្នាក់ ជាបុគ្គលិកហាងCarl’s Jr Burger នៅសាខាទួលទំពូង, បុរសវ័យ២២ឆ្នាំម្នាក់ និងស្ត្រីវ័យ២៩ឆ្នាំម្នាក់ទៀត ជាបុគ្គលិកហាង Zando សាខាបឹងកេងកង បានជាសះស្បើយពីជំងឺកូវីដ-១៩។
ទន្ទឹមនឹងគ្នានេះ ស្ត្រីវ័យ៣៦ឆ្នាំម្នាក់ មានអាសយដ្ឋាននៅសង្កាត់ជ្រាវ ក្រុងសៀមរាប ខេត្តសៀមរាប ដែលត្រូវជាកូនស្រីរបស់អគ្គពន្ធនាគារនៃក្រសួងមហាផ្ទៃ, បុរសវ័យ២៣ឆ្នាំម្នាក់,កុមារាអាយុ៧ឆ្នាំម្នាក់ ដែលមានអាសយដ្ឋាននៅសង្កាត់និរោធ ខណ្ឌច្បារអំពៅ ត្រូវជាក្មួយប្រុសរបស់អ្នកបើកបររថយន្តឱ្យអគ្គពន្ធនាគារ ក៏បានជាសះស្បើយពីជំងឺកូវីដ-១៩ រួមទាំងបុរសវ័យ៣៩ឆ្នាំម្នាក់និងកូនប្រុសអាយុ៣ឆ្នាំម្នាក់ទៀត ផងដែរ។
ជាមួយគ្នានេះ បុរសជនជាតិខ្មែរ-អាមេរិក វ័យ៥៦ឆ្នាំ ដែលបានធ្វើដំណើរមកពីអាមេរិកបន្តជើងហោះហើរនៅតៃវ៉ាន់ ហើយមកដល់កម្ពុជាកាលពីថ្ងៃទី១៥វិច្ឆិកា និងបុរសជនជាតិវ័យ២៩ឆ្នាំម្នាក់ទៀត ដែលមកប្រទេសជប៉ុន ក៏បានជាសះស្បើយពីកូវីដ-១៩នេះដែរ។
គិតត្រឹមថ្ងៃទី១៨ធ្នូ កម្ពុជាមានអ្នកឆ្លងជំងឺកូវីដ-១៩សរុប៣៦២នាក់។ ក្នុងមានអ្នកឆ្លងក្នុងព្រឹត្តិការណ៍២៨វិច្ឆិកា ចំនួន៤១នាក់ ដោយមានជាអ្នកសះស្បើយ២៨នាក់។ ដោយឡែក អ្នកជាសះស្បើយនៅទូទាំងប្រទេសបានកើនដល់ចំនួន៣៤១នាក់ហើយ៕
© រក្សាសិទ្ធិដោយ thmeythmey.com
