សង្គមអន្តរជាតិ
អន្តរជាតិ
លោក ពូទីន សង្ឃឹមថា ទំនាក់ទំនងរុស្សី-អាមេរិកនឹងប្រសើរឡើង ក្រោមរដ្ឋបាលលោក បៃឌិន ប្រធានាធិបតីរុស្ស៊ី វ៉្លាឌីមៀ ពូទីន ក្នុងសន្និសីទសារព័ត៌មានថ្ងៃទី១៧ ខែធ្នូ។ រូបភាពពីវេបសាយប្រធានាធិបតីរុស្ស៊ី
× ប្រធានាធិបតីរុស្ស៊ី វ្ល៉ាឌីមៀ ពូទីន នៅថ្ងៃទី១៧ ធ្នូ សង្ឃឹមថា ប្រធានាធិបតីអាមេរិកថ្មីនឹងនាំមកនូវឱកាសក្នុងការធ្វើឲ្យប្រសើរឡើងនូវទំនាក់ទំនងរវាងអាមេរិក និងរុស្ស៊ី។ ប៉ុន្តែប្រមុខរដ្ឋរុស្ស៊ី បែរជាំរិះគន់គោលនយោបាយរបស់បណ្តាអឺរ៉ុប ដែលមានលក្ខណៈឈ្លានពានមកលើរុស្ស៊ី។
ថ្លែងក្នុងសន្និសីទសារព័ត៌មានប្រចាំឆ្នាំតាមអនឡាញ ប្រធានាធិបតីរុស្ស៊ី លោកវ្ល៉ាឌីមៀ ពូទីន បានផ្ញើសារបែបបោះដៃទៅរកទៅកាន់ប្រទេសលោកខាងលិច ដែលសង្ក្រឺតធ្មេញដាក់រុស្ស៊ី។ ក្នុងរយៈពេលប៉ុន្មានឆ្នាំចុងក្រោយនេះ ទំនាក់ទំនងរវាងរុស្ស៊ី និងអាមេរិក ក៏ដូចជាប្រទេសអឺរ៉ុបធ្លាក់ចុះដល់កម្រិតទាបបំផុតតាំងតែពីចប់សង្គ្រាមត្រជាក់។
ជាមួយអាមេរិក ប្រមុខរដ្ឋរុស្ស៊ីអះអាងថា ទំនាក់ទំនងរវាងប្រទេសទាំងពីរបានក្លាយទៅជាចំណាប់ខ្មាំងនៃនយោបាយក្នុងស្រុកអាមេរិក។ លោកពូទីន សង្ឃឹមថា បញ្ហាដែលកំពុងកើតមានមួយចំនួន នឹងត្រូវដោះស្រាយក្រោមការដឹកនាំរបស់ប្រធានាធិបតីអាមេរិកថ្មី។ នេះបើតាមទីភ្នាក់ងារព័ត៍មាន AFP ។
លោក ពូទីន និយាយថា ប្រធានាធិបតីជាប់ឆ្នោតលោក ចូ បៃឌិន នឹងដោះស្រាយបញ្ហាទាំងនោះ ដោយសារតែលោកមានបទពិសោធគោលនយោបាយក្នុងស្រុក ក៏ដូចជាការបរទេសផង។ លោកសង្ឃឹមដែរថា រដ្ឋបាលអាមេរិកថ្មីនេះ នឹងផ្លាស់ប្តូរវិធីសាស្ត្រក្នុងការធ្វើទំនាក់ទំនងជាមួយរុស្ស៊ី ហើយដោះស្រាយបញ្ហាដែលប៉ះពាល់ដល់ទំនាក់ទំនងទ្វេភាគីក្នុងរយៈពេលប៉ុន្មានឆ្នាំកន្លងមក។
ជាមួយគ្នា មេដឹកនាំរុស្ស៊ី ក៏រំពឹងថា សមភាគីអាមេរិកថ្មី នឹងបន្តសន្ធិសញ្ញាកាត់បន្ថយនុយក្លេអ៊ែរថ្មី (New START)ដែលនឹងអស់សុពលភាពនៅដើមឆ្នាំ២០២១។ អាមេរិកក្រោមការដឹកនាំរបស់លោកប្រធានាធិបតី ដូណាល់ ត្រាំ បានដកខ្លួនចេញពីសន្ធិសញ្ញាយុទ្ធសាស្ត្រជាមួយរុស្ស៊ីដូចជាសន្ធិសញ្ញាចំហមេឃ (Open Sky Treaties) និងសន្ធិសញ្ញានុយក្លេអ៊ែរចម្ងាយមធ្យម (INF) ដែលសុទ្ធសឹងតែជាកិច្ចព្រមព្រៀងសំខាន់ៗក្នុងការគ្រប់គ្រងអាវុធ។
ចំពោះទំនាក់ទំនងជាមួយបណ្តាអឺរ៉ុបវិញ លោក ពូទីន អះអាងថា ប្រទេសទាំងនេះមានគោលនយោបាយប្រឆាំង និងឈ្លានពានរុស្ស៊ី។ ត្រង់នេះ លោក ពូទីន និយាយថា អឺរ៉ុប និងអាមេរិកបានក្បត់សន្យាធានារបស់ខ្លួនពាក់ព័ន្ធនឹងការមិនពង្រីកសមាជិកភាព NATO ទៅកាន់ភាគខាងកើតអឺរ៉ុបជាប់ព្រំដែនរុស្ស៊ី។លោកបន្តថា រុស្ស៊ីជាប្រទេសស្លូត និងតែងតែស្វែងរកការសន្ទនាដើម្បីដោះស្រាយបញ្ហា។
អឺរ៉ុប និងអាមេរិកបានដាក់ទណ្ឌកម្មសេដ្ឋកិច្ចមកលើរុស្ស៊ីក្រោយវិបត្តិគ្រីមៀមក។ រុស្ស៊ី រងទណ្ឌកម្មបន្ថែមទៀតក្រោយត្រូវបានសង្ស័យថា លូកដៃចូលក្នុងការបោះឆ្នោតអាមេរិកនៅឆ្នាំ២០១៦ ដើម្បីជួយឲ្យលោក ត្រាំ ឈ្នះឆ្នោត។ លោក ពូទីន បដិសេធចោលទាំងស្រុងដោយលើកឡើងបែបនេះ និងថាប្រទេសលោកខាងលិចទៅវិញទេដែលតែងតែលូកដៃចូលក្នុងការបោះឆ្នោតនៅជុំវិញពិភពលោក រាប់ទាំងការបោះឆ្នោតសភារុស្ស៊ីនៅពេលខាងមុខផង៕
© រក្សាសិទ្ធិដោយ thmeythmey.com