អន្តរជាតិ
នាវាកងទ័ពជើងទឹកជប៉ុន។ រូបថត៖ AFP
×![]()
រដ្ឋមន្ត្រីក្រសួងការពារជាតិជប៉ុន Nobuo Kishi នៅថ្ងៃទី១៨ ធ្នូ អះអាងថា ជប៉ុននឹងអភិវឌ្ឍមីស៊ីលប្រឆាំងនាវាដែលមានសមត្ថភាពក្នុងការកម្ទេចគោលដៅក្នុងរយៈចម្ងាយឆ្ងាយ។ មីស៊ីលនេះ មានសមត្ថភាពគ្របដណ្តប់ដល់សមុទ្រចិនភាគខាងកើត និងភាគនិរតីនៃកោះអូគីណាវ៉ាឯណោះ។
ដ្បិតមិនអាចធ្វើសង្គ្រាមបានព្រោះរដ្ឋធម្មនុញ្ញសន្តិភាពនិយម ជប៉ុន កំពុងពង្រឹងសមត្ថភាពការពារខ្លួនកាន់តែខ្លាំង។ រដ្ឋមន្ត្រីការពារជាតិជប៉ុន Nobuo Kishi និយាយនៅថ្ងៃទី១៨ ខែធ្នូ ថា ជប៉ុននឹងអភិវឌ្ឍមីស៊ីលកម្ទេចនាវាពីចម្ងាយ។ ការអភិវឌ្ឍមីស៊ីល នឹងពង្រឹងគោលនយោបាយការពារជាតិជប៉ុន ដែលមានបំណងហាមឃាត់មិនឲ្យនាវាបរទេសបើកចូលដោយសេរីក្នុងដែនទឹក និងប្រជុំកោះរបស់ខ្លួន។
«ស្ថានការណ៍សន្តិសុខនៅភាគនិរតីនៃដែនកោះជប៉ុនមានសភាពតឹងតែងជាងមុន។ យើងត្រូវឆ្លើយតបដោយវិធីសាស្ត្រសមស្រប»។ នេះជាការលើកឡើងរបស់លោក Kishi នៅក្នុងសន្និសីទសារព័ត៌មានថ្ងៃទី១៨ ធ្នូ ដកស្រង់ដោយទីភ្នាក់ងារព័ត៌មាន Reuters ។
បើតាមក្រសួងការពារជាតិជប៉ុន មីស៊ីលរយៈចម្ងាយឆ្ងាយភ្ជាប់ទៅនឹងឡាន ហើយនឹងត្រូវបញ្ជូនទៅកោះអូគីណាវ៉ា។ កោះអូគីណាវ៉ា ជាបណ្តុំកោះដែលលាតសន្ធឹងជិតដល់ហ្វីលីពីន និងជារបាំងទប់ទៅនឹងការពង្រីកសកម្មភាពយោធារបស់ចិន។ យ៉ាងណាក្តី ក្រសួងការពារជាតិជប៉ុនមិនបានបង្ហាញពីរយៈចម្ងាយប៉ុន្មានគីឡូម៉ែត្រដែលមីស៊ីលនេះមានសមត្ថភាព ឬពេលវេលានៃការដាក់មីស៊ីលនេះ។
ជុំវិញរឿងមីស៊ីលនេះ លោក Zack Cooper អ្នកស្រាវជ្រាវនៅវិទ្យាស្ថាន American Enterprise និយាយថា ការការពារភាគនិរតីនៃដែនកោះជប៉ុន ចាំបាច់ត្រូវការប្រព័ន្ធដែលមានរយៈចម្ងាយឆ្ងាយដោយសារដែនកោះនោះគ្របដណ្តប់ផ្ទៃក្រឡាយ៉ាងធំ។
ក្នុងរយៈពេលប៉ុន្មានឆ្នាំចុងក្រោយនេះ ជប៉ុនកាន់តែបារម្ភពីសកម្មភាពរបស់ចិន ដែលបើកនាវាចូលដែនទឹកជម្លោះនៅក្នុងសមុទ្រចិនភាគខាងកើត។ ចិន និងជប៉ុនមានជម្លោះដណ្តើមកម្មសិទ្ធិប្រជុំកោះតទាវយូ (Diaoyu) ជាភាសាចិន និង ស៊ិនកាគូ (Senkaku)ជាភាសាជប៉ុន ក្នុងសមុទ្រចិនភាគខាងត្បូងនេះ។
សូមបញ្ជាក់ថា ក្រោយលោក ស៊ូហ្កា យូស៊ីហ៊ីដេ ឡើងកាន់តែតំណែងជានាយករដ្ឋមន្ត្រី ជប៉ុនបានទិញមីស៊ីលបាញ់ពីអាកាសដែលមានសមត្ថភាពក្នុងការកម្ទេចមីស៊ីលផ្លោងរបស់កូរ៉េខាងជើង។ បន្ថែមពីនេះ ជប៉ុនក៏កំពុងពិចារណាក្នុងការទិញមីស៊ីលប្រដេញដែលមានសមត្ថភាពវាយប្រហារដល់ប្រទេសចិនផងដែរ។
កាលពីខែថ្ងៃទី៧ ធ្នូ សារព័ត៌មានក្នុងស្រុកក៏បានចុះផ្សាយថា ទីក្រុងតូក្យូ មានគម្រោងនឹងបំពាក់ប្រព័ន្ធរ៉ាដា Aegis ជំនាន់ថ្មីលើនាវាចម្បាំងថ្មីចំនួន២ ដែលមានសមត្ថភាពលើសប្រព័ន្ធរ៉ាដាចាស់៣ដង។ ការបំពាក់រ៉ាដាជំនាន់ថ្មី នឹងបង្កើនការការពារពីមីស៊ីលផ្លោងរបស់កូរ៉េខាងជើងដែរ ប៉ុន្តែត្រូវចំណាយប្រាក់ច្រើនជាងរ៉ាដាលើដីទ្វេដង និងចំណាយពេល៣ឆ្នាំបន្ថែមទៀត។ គម្រោងនេះ ធ្វើឡើងក្រោយរដ្ឋាភិបាលជប៉ុនបានលុបចោលផែនការដាក់ពង្រាយប្រព័ន្ធរ៉ាដាប្រភេទនេះនៅមូលដ្ឋានយោធាចំនួន២ទីតាំង៕
Tag:
ជប៉ុន
© រក្សាសិទ្ធិដោយ thmeythmey.com
