ជាតិ
នយោបាយជាតិ
លោក សុខ សូកាន លោក សុខ សូកេន និងលោក សុខ សង្វារ ឡើងតំណែង លោក សុខ សូកាន (ឆ្វេង) លោក សុខ សូកេន និងលោក សុខ សង្វារ
× យោងតាមព្រះរាជក្រឹត្យបីដាច់ដោយឡែក លោក សុខ សូកាន ត្រូវបានតែងតាំងជារដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ លោក សុខ សូកេន ឡើងជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ រីឯលោក សុខ សង្វារ ត្រូវតែងតាំងជាអនុរដ្ឋលេខាធិការក្រសួងទេសចរណ៍។ លោកទាំងបីជាកូនប្រុសសម្តេច សុខ អាន អតីតឧបនាយករដ្ឋមន្ត្រី រដ្ឋមន្ត្រីទីស្តីការគណៈរដ្ឋមន្ត្រី។
ក្នុងអណត្តិទី៥ លោក សុខ សូកាន បានក្លាយជាតំណាងរាស្ត្រដែលមានវ័យក្មេងជាងគេ បន្ទាប់ពីលោកត្រូវបានរដ្ឋសភាអនុម័តជ្រើសរើសសម្រាប់មណ្ឌលតាកែវ ជំនួសលោក សូរ ឃុន ដែលបានទទួលមរណភាព។ បច្ចុប្បន្នវ័យ៣៧ឆ្នាំ លោក សូកាន បានក្លាយជារដ្ឋលេខាធិការក្រសួងរៀបចំដែនដី តាមព្រះរាជក្រឹត្យចុះថ្ងៃទី១៦ ខែធ្នូ។
កាលពីថ្ងៃទី១៥ ខែធ្នូ ព្រះករុណា ព្រះមហាក្សត្រ ក៏បានចេញព្រះរាជក្រឹត្យត្រាស់បង្គាប់តែងតាំង លោក សុខ សង្វារ អគ្គនាយករងនៃអាជ្ញាធរជាតិអប្សរា ជាអនុរដ្ឋលេខាធិការក្រសួងទេសចរណ៍ផងដែរ បន្ទាប់ពីមានសេចក្តីក្រាបបង្គំទូលថ្វាយរបស់សម្តេចនាយករដ្ឋមន្ត្រី ហ៊ុន សែន។
នៅថ្ងៃទី១៨ ខែធ្នូ លោក សុខ សូកេន ក៏ត្រូវបានតែងតាំងជារដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ផងដែរ បន្ទាប់ពីលោកកាន់តំណែងជាអនុរដ្ឋលេខាធិការក្នុងក្រសួងនេះ ចាប់តាំងពីឆ្នាំ២០១៦មក។
លោក សុខ សូកាន ជាកូនទី៣ លោក សុខ សូកេន ជាកូនទី៤ និងលោក សុខ សង្វារ ជាកូនពៅ របស់សម្តេច សុខ អាន ក្នុងចំណោមកូនទាំង៥នាក់ (កូនស្រីច្បង)។ លោក សុខ ពុទ្ធិវុធ ដែលជាកូនទី២ បច្ចុប្បន្នជារដ្ឋលេខាធិការក្រសួងប្រៃសណីយ និងទូរគមនាគមន៍៕
Tag:
សុខ សូកាន
សុខ សង្វារ
© រក្សាសិទ្ធិដោយ thmeythmey.com