COVID-19
ជាតិ
×![]()
ដោយ: ខន ចំប៉ា
ភ្នំពេញ៖ មនុស្សចំនួន៤នាក់ទៀតហើយ បានជាសះស្បើយពីជំងឺកូវីដ-១៩ ដែលនាំឲ្យកម្ពុជានៅសល់អ្នកជំងឺតែ១៧នាក់ទៀតប៉ុណ្ណោះ។ កម្ពុជា ក៏មិនមានរកឃើញករណីឆ្លងថ្មីទៀតដែរ នៅថ្ងៃតី១៨ ធ្នូ។ នេះបើតាមសេចក្តីប្រកាសព័ត៌មានរបស់ ក្រសួងសុខាភិបាល ចេញផ្សាយនៅព្រឹកថ្ងៃទី១៩ ធ្នូនេះ។
បើតាមក្រសួងសុខាភិបាល ក្នុងចំណោមអ្នកសះស្បើយទាំង៤នាក់ មាន២នាក់ជាអ្នកឆ្លងក្នុងព្រឹត្តិការណ៍សហគមន៍ ២៨វិច្ឆិកា គឺស្ត្រីអាយុ២៤ឆ្នាំ មានអាសយដ្ឋាននៅសង្កាត់ឃ្មួញ ខណ្ឌសែនសុខ ដែលស្វាមីធ្វើការនៅនាយកដ្ឋានព័ត៌មានវិទ្យា នៃក្រសួងមហាផ្ទៃ និងក្មេងអាយុ១ឆ្នាំ ដែលឆ្លងពីឪពុកម្តាយរស់នៅសង្កាត់និរោធ ខណ្ឌច្បារអំពៅ។
ចំណែកអ្នកសះស្បើយ២នាក់ទៀតជាករណីនាំចូល គឺជាបុរសអាយុ៤៦ឆ្នាំ មានអាសយដ្ឋាននៅឃុំសំរោងលើ ស្រុកអង្គស្នួល ខេត្តកណ្តាល ដែលធ្វើដំណើរពីប្រទេសជប៉ុន បន្តជើងហោះហើរនៅកូរ៉េខាងត្បូង មកដល់កម្ពុជានៅថ្ងៃទី១៨ វិច្ឆិកា។ បុរសអាយុ៣២ឆ្នាំ មានអាសយដ្ឋាននៅសណ្ឋាគារមួយនៅភ្នំពេញ ដែលធ្វើដំនើរពីប្រតេសម៉ាលី បន្តជើងហោះហើរនៅកូរ៉េខាងត្បូង មកដល់កម្ពុជានៅថ្ងៃទី១១ ធ្នូ។ នេះបើតាមក្រសួងសុខាភិបាល ដែលបន្តបញ្ជាក់ថានៅថ្ងៃទី១៨ ធ្នូ មិនមានករណីឆ្លងថ្មីនោះទេ។
សូមជម្រាបថា គិតត្រឹមថ្ងៃទី១៩ធ្នូ កម្ពុជាមានករណីឆ្លងកូវីដ-១៩ សរុប ៣៦២ករណី ក្នុងនោះសះស្បើយអស់ ៣៤៥នាក់ហើយ។ បច្ចុប្បន្ន មានអ្នកជំងឺ ១៣នាក់កំពុងសម្រាក់ព្យាបាននៅមន្ទីរពេទ្យមិត្តភាពខ្មែរ-សូវៀត ២នាក់ នៅមណ្ឌលសុខភាពចាក់អង្រែ និង២នាក់ ទៀត នៅមជ្ឈមណ្ឌលជាតិប្រយុទ្ធនឹងជំងឺរបេង និងហង់សិន៕
© រក្សាសិទ្ធិដោយ thmeythmey.com
