ជាតិ
កម្ពុជា នឹងមានច្បាប់ស្តីពី«សភាកសិឧស្សាហកម្មកម្ពុជា» ដើម្បីដោះស្រាយបញ្ហាក្នុងវិស័យកសិកម្ម លោក វេង សាខុន រដ្ឋមន្ត្រីក្រសួងកសិកម្ម ដឹកនាំកិច្ចប្រជុំជាមួយអ្នកពាក់ព័ន្ធ ពិនិត្យ និងស្វែងរកធាតុចូលបន្ថែមលើសេចក្តីព្រាងច្បាប់ ស្ដីពី សភាកសិឧស្សាហកម្ម កាលពីថ្ងៃទី១៨ ខែធ្នូ ២០២០។ (រូបភាព៖ហ្វេសប៊ុកលោក វេង សាខុន រដ្ឋមន្ត្រីក្រសួងកសិកម្ម)
× ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ និងអ្នកពាក់ព័ន្ធក្នុងវិស័យកសិកម្ម នៅថ្ងៃទី១៨ ធ្នូ បានជួបប្រជុំពិភាក្សា ដើម្បីសុំយោបល់ និងផ្តល់ធាតុចូលសំខាន់ៗ បញ្ចូលទៅក្នុងសេចក្តីព្រាងច្បាប់ស្តីពី «សភាកសិឧស្សាហកម្មកម្ពុជា»។ បើតាមលោក វេង សាខុន ដែលបានសរសរហ្វេសប៊ុក របស់ខ្លួន គណៈរដ្ឋមន្ត្រីបានអនុម័តយល់ព្រមឲ្យបង្កើតច្បាប់នេះ កាលពីថ្ងៃទី៣ ធ្នូកន្លងទៅ។
លោក រដ្ឋមន្ត្រី វេង សាខុន បញ្ជាក់នៅក្នុងហ្វេសប៊ុកទៀតថា កិច្ចប្រជុំជាមួយអ្នកពាក់ព័ន្ធនៅថ្ងៃសុក្រនេះ គឺដើម្បីប្រមូលធាតុចូល ធ្វើយ៉ាងណា ឲ្យសេចក្តីព្រាងច្បាប់ស្ដីពី «សភាកសិឧស្សាហកម្មកម្ពុជា» មានភាពពេញលេញ គ្រប់ជ្រុងជ្រោយ និងបម្រើផលប្រយោជន៍ដល់ក្រុមហ៊ុន សមាគម សហគ្រិន សហព័ន្ធសហភាព សហគមន៍កសិកម្មទាំងអស់។ «សេចក្តីព្រាងច្បាប់នេះ អាចចាត់ទុកបានថា ជាវិធានការគន្លឹះ និងចាំបាច់មួយ សម្រាប់ដោះស្រាយ បញ្ហាប្រឈម ឲ្យបានសមស្រប ទាន់ពេលវេលា និងមានប្រសិទ្ធភាព ស្របតាមទស្សន វិស័យ របស់រាជរដ្ឋាភិបាល ក្នុងការធ្វើកំណែទម្រង់ ស៊ីជម្រៅ ដើម្បីជំរុញកំណើនសេដ្ឋកិច្ច ដែលបានដាក់ចេញកន្លងមក»។ លោក វេង សាខុន រដ្ឋមន្ត្រីកសិកម្ម បញ្ជាក់បន្ថែមដូច្នេះ៕
Tag:
ច្បាប់
កសិឧស្សាហកម្ម
កសិកម្ម
វេង សាខុន
© រក្សាសិទ្ធិដោយ thmeythmey.com