អន្តរជាតិ
ជិតមួយឆ្នាំនៃឃាតកម្មឧត្តមសេនីយ៍ Soleimani៖ អាមេរិក ថានឹងតបវិញ បើអ៊ីរ៉ង់ហ៊ានសងសឹក ឧត្តមសេនីយ៍Kenneth Mckenzie។ រូបភាព៖AFP
× អាមេរិកត្រៀមខ្លួនរួចជាស្រេចក្នុងការវាយតបវិញ បើសិនជាអ៊ីរ៉ង់ហ៊ានបើកការវាយប្រហារសងសឹកលើអាមេរិកក្នុងខួបគម្រប់មួយឆ្នាំនៃការសម្លាប់ឧត្តមសេនីយ៍អ៊ីរ៉ង់ដ៏មានឥទ្ធិពល Qasem Soleimani ។ នេះជាការព្រមានទុករបស់មេបញ្ជាការកងទ័ពអាមេរិកប្រចាំមជ្ឈិមបូព៌ា។ ថ្នាក់ដឹកនាំកងទ័ពអាមេរិក បង្ហាញសេចក្តីបារម្ភពីចេតនារបស់អ៊ីរ៉ង់មកលើខ្លួនស្របពេលការស្លាប់របស់លោក Soleimani នៅតែដក់ក្នុងចិត្តរបស់អ៊ីរ៉ង់នឡ។
ឧត្តមសេនីយ៍ Qasem Soleimani ប្រមុខកងកម្លាំង Qud នៃកងឆ្មាំបដិវត្តន៍ ត្រូវបានសម្លាប់ក្នុងការវាយប្រហារផ្លូវអាកាសរបស់អាមេរិកនៅព្រលានយន្តហោះទីក្រុងបាក់ដាដកាលពីដើមខែមករា ឆ្នាំ២០២០ ។ អ៊ីរ៉ង់ធ្លាប់បានព្រមានថា ខ្លួននឹងសងសឹកចំពោះការសម្លាប់មេដឹកនាំយោធាដ៏មានឥទ្ធិពលរបស់ខ្លួននេះ។ ជិតដល់ខួបនៃការស្លាប់នេះ មេទ័ពអាមេរិក ក៏ចេញសារគំរាមអ៊ីរ៉ង់ទុក។
«យើងត្រៀមខ្លួនរួចហើយដើម្បីការពារខ្លួន សម្ព័ន្ធមិត្ត និងដៃគូក្នុតំបន់។ យើងបានប្រុងប្រៀបតបតបើសិនជាចាំបាច់»។ ទីភ្នាក់ងារព័ត៌មាន AFP បានស្រង់សម្ដីលោក ឧត្តមសេនីយ៍ Kenneth McKenzie ប្រមុខទីបញ្ជាការដ្ឋានកណ្តាលប្រាប់ទៅអ្នកសារព័ត៌មានបែបនេះនៅថ្ងៃទី២០ ខែធ្នូ ក្រោយបញ្ចប់ទស្សនកិច្ចក្នុងតំបន់មជ្ឈិមបូព៌ា។
ឧត្តមសេនីយ៍ផ្កាយ៤រូបនេះ វាយតម្លៃថា អាមេរិកស្ថិតក្នុងជំហរដ៏ល្អមួយ ហើយបានត្រៀមរួចរាល់ហើយចំពោះអ្វីដែលអ៊ីរ៉ង់ និងបក្សពួកអាចធ្វើមកលើអាមេរិក។ លោកប្រាប់ទៅកាន់អ្នកសារព័ត៌មានមួយក្រុមតូចតាមរយៈទូរសព្ទ តែមិនប្រាប់ទីតាំងរបស់លោកឡើយ។
ក្នុងដំណើរទស្សនកិច្ចទៅទីក្រុងបាក់ដាដ លោកបានជួបជាមួយក្រុមសម្ព័ន្ធមិត្តដែលប្រឆាំងនិងពួកជីហាដ មេទ័ពអាមេរិកនៅអ៊ីរ៉ាក់ និងឧត្តមសេនីយ Abdul Amir Yarallah នាយសេនាធិការកងទ័ពអ៊ីរ៉ង់។ លោកក៏បានទៅជួបកងកម្លាំងអាមេរិកនៅស៊ីរី ដែលនៅការពារព្រំដែនជាមួយអ៊ីរ៉ាក់ និងហ្ស៊កដានីផងដែរ។
ក្នុងរយៈពេលថ្មីៗនេះ ថ្នាក់ដឹកនាំកងទ័ពអាមេរិកបានបង្ហាញពីការបារម្ភចំពោះចេតនារបស់អ៊ីរ៉ង់ ក្រោយខ្លួនបានសម្លាប់ឧត្តមសេនីយ៍ Soleimani ។ ជាក់ស្តែងដំណើរទស្សនកិច្ចរបស់ឧត្តមសេនីយ៍ McKenzie នៅតំបន់មជ្ឈិមបូពា៍ក៏ពុំបានប្រកាសជាមុនដែរ។ ដូចគ្នានេះដែរ ទស្សនកិច្ចរបស់ឧត្តមសេនីយ៍ Mark Milley អគ្គសេនាធិការចម្រុះទៅកាតា អារ៉ាប៊ីសាអូឌីត និងអេមីរ៉ាត់អារ៉ាប់រួមត្រូវបានរក្សាជាការសម្ងាត់រហូតដល់លោកបញ្ចប់ដំណើរទស្សនកិច្ច។
សូមរំឭកថា លោកប្រធានាធិបតី ដូណាល់ ត្រាំ ទើបបានបញ្ជាឲ្យរក្សាវត្តមានកងទ័ពអាមេរិកត្រឹមតែ២,៥០០នាក់តែប៉ុណ្ណោះនៅអ៊ីរ៉ាក់ និងអាហ្វហ្កានីស្ថាន៕
© រក្សាសិទ្ធិដោយ thmeythmey.com