ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ សម្រេចផ្អាកបញ្ជូនពលករ MOU និងពលករ តាមរដូវកាល ទៅធ្វើការនៅប្រទេសថៃ ជាបណ្តោះអាសន្ន ក្រោយនុងរយៈពេល ២៤ម៉ោង ថៃបានរកឃើញមានករណីឆ្លងថ្មីចំនួន៣៨២ករណី។ ក្នុងចំណោមនោះ មនុស្សចំនួន ៣៦០នាក់ គឺជាកម្មករចំណាកស្រុកនៅក្នុងខេត្តសាមុតសាខន។ នេះបើតាមសេចក្តីជូនដំណឹងរបស់ ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី ២១ ខែធ្នូ ឆ្នាំ២០២០។
លោក អ៊ិត សំហេង រដ្ឋមន្ត្រីក្រសួងការងារ បានដាក់វិធានការ ការពារសុខភាព សុវត្ថិភាព និងជីវភាព របស់បងប្អូនពលករខ្មែរ ដែលកំពុងស្នាក់នៅ និងធ្វើការនៅប្រទេសថៃ ក្នុងអំឡុងពេលមានការរាតត្បាតជំងឺកូវីដ-១៩ ក្នុងខេត្តសាមុតសាខន នៃប្រទេសថៃ។
ក្រសួងការងារ បានបញ្ជាក់ថា សម្រាប់បងប្អូនពលករ ដែលកំពុងស្នាក់នៅ និងធ្វើការនៅប្រទេសថៃ ត្រូវរក្សាភាពនឹងនរ និងជឿជាក់ លើសមត្ថកិច្ចថៃ ក្នុងការគ្រប់គ្រង បង្ការ និងព្យាបាលជំងឺកូវីដ-១៩។ មិនត្រូវ ផ្លាស់ប្តូរ កន្លែងស្នាក់នៅ ឬកន្លែងធ្វើការងារ ពីខេត្តមួយទៅខេត្តមួយ ដែលខុសនឹងបម្រាមរបស់អាជ្ញាធរថៃ។
បន្ថែមលើនោះ ត្រូវចូលរួមសហការ និងគោរពឱ្យបាន នូវរាល់បទបញ្ជា និងវិធានការ សុខាភិបាលដែលកំណត់ ដោយអាជ្ញាធរ មានសមត្ថកិច្ចថៃ និងនិយោជកថៃ។ ត្រូវអនុវត្តតាម ការណែនាំ ឬសេចក្តីជូនដំណឹង របស់ស្ថានឯកអគ្គរាជទូត ឬអគ្គកុងស៊ុល ប្រចាំប្រទេសថៃ ប្រសិនជាមាន។ បងប្អូនត្រូវលាងដៃជាមួយនឹងសាប៊ូ ឬដែលឱ្យបានញឹកញាប់ ពាក់ម៉ាស និងរក្សាអនាម័យឱ្យបានល្អ និងជាប្រចាំនៅកន្លែងធ្វើការងារ និងកន្លែងស្នាក់នៅ ព្រមទាំងកុំចេញទៅកន្លែងសាធារណៈដែលមានមនុស្សច្រើន។
ក្រសួង បន្ថែមថា ពលករ ដែលចាំបាច់ត្រូវត្រឡប់មកស្រុកកំណើតវិញ ត្រូវជ្រើសរើសច្រកណាមួយ ក្នុងចំណោមច្រកអូស្មាច់ ច្រកដូង និងច្រកប៉ោយប៉ែត ជាដាច់ខាត ដែលនៅទីនោះរាជរដ្ឋាភិបាលមានរៀបចំការត្រួតពិនិត្យសុខភាព ដើម្បីការពារសុខភាព ក៏ដូចជាបង្ការ និងការពារសុខភាពក្រុមគ្រួសារ របស់បងប្អូន ដែលនៅស្រុកកំណើត។
ពលករទាំងអស់ ត្រូវអនុវត្តវិធានការ ត្រួតពិនិត្យសុខភាព និងត្រូវធ្វើចត្តាឡីស័កចំនួន ១៤ថ្ងៃ ទៅតាមការកំណត់របស់អាជ្ញាធរមានសមត្ថកិច្ចនៅតាមច្រកព្រំដែន និងត្រូវប្រើប្រាស់ រថយន្តដែលកំណត់ដោយមណ្ឌល ចត្តាឡីស័ក ក្រោយពេលបញ្ចប់ ការធ្វើចត្តាឡីស័ក ត្រឡប់ទៅភូមិកំណើត។ ជាមួយគ្នានេះ ពលករទាំងអស់ ត្រូវជូនដំណឹងដល់អាជ្ញាធរភូមិ ឃុំ និងអ្នកជិតខាងថា ខ្លួនទើបវិលត្រឡប់មកពីប្រទេសថៃ។
ក្រសួង បញ្ជាក់បន្ថែមថា ការផ្អាកបញ្ជូនពលករ MOU និងពលករតាមរដូវកាល ទៅប្រទេសថៃនេះ គឺរហូតដល់មានការជូនដំណឹងជាថ្មី និងត្រូវបន្តទំនាក់ទំនង ជាមួយអាជ្ញាធរថៃ ក៏ដូចជាអាជ្ញាធរមានសមត្ថកិច្ចកម្ពុជា ដើម្បីជួយសម្រួលដល់ ពលករ ក្នុងករណីចាំបាច់ តាមការសម្រេចរបស់រាជរដ្ឋាភិបាល។
កម្ពុជាមានអ្នកឆ្លងកូវីដ-១៩ ចំនួន៣៦៣នាក់ ជាសះស្បើយ៣៤៥នាក់ និងនៅសល់១៨នាក់ទៀត កំពុងព្យាបាលនៅមន្ទីរពេទ្យមិត្តភាពខ្មែរ-សូវៀត មណ្ឌលសុខភាពចាក់អង្រែ និងមជ្ឈមណ្ឌលជាតិប្រយុទ្ធនឹងជំងឺរបេង និងហង់សិន៕