អន្តរជាតិ
ចិន ប្រឆាំងអាមេរិកដែលអនុម័តច្បាប់គាំទ្រទីបេជ្រើសរើសអ្នកបន្តវេនពីសម្តេចសង្ឃដាឡៃ ឡាម៉ា
សម្តេចសង្ឃទីបេដាឡៃ ឡាម៉ា។រូបភាព៖AFP
×![]()
នៅថ្ងៃទី២២ ខែធ្នូ មេដឹកនាំទីបេដែលនិរទេសខ្លួន បានសាទរការអនុម័តច្បាប់មួយដោយសភាអាមេរិក ដែលទទួលស្គាល់សិទ្ធិរបស់ជនជាតិទីបេក្នុងការជ្រើសរើសអ្នកស្នងតំណែងពីសម្តេចសង្ឃដាឡៃ ឡាម៉ា ។ ការអនុម័តច្បាប់របស់អាមេរិកនេះ ធ្វើឲ្យចិនខឹងសម្បារ ដោយសារតែចិនអះអាងថា មានតែរដ្ឋាភិបាលខ្លួនទេដែលមានសិទ្ធិក្នុងការជ្រើសរើសអ្នកបន្តវេននេះ។
លោក Lobsang Sangya ប្រធានរដ្ឋបាលកណ្តាលទីបេ ដែលជារដ្ឋាភិបាលទីបេនិរទេសនៅឥណ្ឌា និយាយថា ការអនុម័តច្បាប់គោលនយោបាយ និងគាំទ្រទីបេ (TPSA)ដោយសភាតំណាង និងព្រឹទ្ធសភាអាមេរិក ជារឿងប្រវត្តិសាស្ត្រ។ ច្បាប់នេះតម្រូវឲ្យអាមេរិក បង្កើតស្ថានកុងស៊ុលនៅទីក្រុងឡាសា នៃតំបន់ទីបេ ក៏ដូចជាគាំទ្រសិទ្ធិរបស់ជនជាតិទីបេក្នុងការជ្រើសរើសអ្នកបន្តវេនពីសម្តេចសង្ឃដាឡៃ ឡាម៉ា ការជំរុញឲ្យមានសន្ទនារវាងរដ្ឋាភិបាលចិន និងសម្តេចសង្ឃទីបេផង។
«ជាមួយនឹងការអនុម័តច្បាប់នេះ សភាអាមេរិកបានបង្ហាញសារថា ទីបេ បន្តជាអាទិភាពរបស់អាមេរិក ហើយអាមេរិកនឹងបន្តការគាំទ្រចំពោះសម្តេចសង្ឃដាឡៃ ឡាម៉ា និងរដ្ឋបាលកណ្តាលទីបេ»។ លោកSangay លើកឡើងបែបនេះ ដោយបន្តថា នេះជាជ័យជម្នះសម្រាប់សេរីភាពជនជាតិទីបេ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
ការអនុម័តច្បាប់ដោយសភាអាមេរិកក្នុងការគាំទ្រសិទ្ធិជនជាតិទីបេក្នុងការជ្រើសរើសអ្នកស្នងតំណែ ធ្វើឲ្យចិនប្រតិកម្ម និងចោទអាមេរិកពីការជ្រៀតជ្រែកចូលកិច្ចការផ្ទៃក្នុង។ តាំងពីដើមមក ចាត់ទុកសម្តេចសង្ឃដាឡៃ ឡាម៉ា បច្ចុប្បន្ន ជាអ្នកបះបោរដ៏គ្រោះថ្នាក់ក្នុងការផ្តាច់តំបន់ទីបេពីចិន។ ក្នុងសន្និសីទសារព័ត៌មានថ្ងៃទី២២ ខែធ្នូ លោក Wang Wenbin អ្នកនាំពាក្យក្រសួងការបរទេសចិន បានស្នើប្រធានាធិបតីអាមេរិកកុំចុះហត្ថលេខាលើច្បាប់នេះ។
«យើងទទូចឲ្យភាគីអាមេរិក ឈប់លូកលាន់ចូលកិច្ចការផ្ទៃក្នុងចិន និងចៀសវាងការចុះហត្ថលេខាអនុម័តច្បាប់នេះ ដើម្បីបញ្ចៀសការប៉ះពាល់លើកិច្ចសហប្រតិបត្តិការ និងទំនាក់ទំនងទ្វេភាគី»។ នេះជាការលើកឡើងរបស់លោក Wang ។
សូមបញ្ជាក់ថា នៅឆ្នាំ១៩៥០ ចិនបានបញ្ជូនកងទ័ពទៅកាន់កាប់ទីបេ ដោយអះអាងថា ជាការរំដោះដោយសន្តិភាព។ ចាប់ពីពេលនោះមក ទីបេក្លាយជាតំបន់ដែលមានការរឹតត្បិតជាងគេ និងរសើបបំផុតក្នុងប្រទេសចិន។ ចំណែកសម្តេចសង្ឃដាឡៃ ឡាម៉ា បាននិរទេសចេញពីទីបេក្នុងឆ្នាំ១៩៥៩ ក្រោយបរាជ័យក្នុងការបះបោរប្រឆាំងរដ្ឋាភិបាលចិន។
ការជ្រើសរើសសម្ដេចសង្ឃដាឡៃ ឡាម៉ា ថ្មី ជារឿងចម្រូងចម្រាសមួយ។ កន្លងទៅចិន ធ្លាប់បានអះអាងថា រដ្ឋាភិបាលរបស់ខ្លួនមានសិទ្ធិក្នុងការយល់ព្រមលើសំណើក្នុងការតែងតាំងអ្នកស្នងតំណែងពីសម្តេចសង្ឃដាឡៃ ឡាម៉ា ដែលស្នើដោយសម្ដេចសង្ឃ ប៉ានឈិន ឡាម៉ា ។ ប៉ានឈិន ឡាម៉ា ជាបុគ្គលិកមានឥទ្ធិពលទីពីរនៅទីបេ និងជាអ្នកកំណត់បេក្ខភាពសម្ដេចសង្ឃដាឡៃ ឡាម៉ា ថ្មីដែរ។
ប៉ុន្តែប៉ានឈិន ឡាម៉ា ពិតប្រាកដត្រូវឃុំខ្លួនដោយអាជ្ញាធរចិន ហើយក៏តែងតាំងអ្នកថ្មី ដែលបច្ចុប្បន្នជាសមាជិកជាន់ខ្ពស់បក្សកុម្មុយនីស្តចិនផង។ ប្រជាជនទីបេ ពិសេសអ្នកនិរទេសខ្លួន មិនទទួលស្គាល់ប៉ានឈិន ឡាម៉ា ដែលតែងតាំងដោយរដ្ឋាភិបាលចិនឡើយ ហើយទាមទារឲ្យចិនដោះលែងប៉ានឈិន ឡាម៉ា ពិតប្រាកដវិញ៕
Tag:
ទីបេ
ចិន
អាមេរិក
© រក្សាសិទ្ធិដោយ thmeythmey.com
