ភ្នំពេញ៖ សាលារាជធានីភ្នំពេញហាមការរៀបចំប្រគំតន្ត្រី និងការរៀបចំស្តង់លក់ផលិតផ្សេងៗនៅតាមទីសាធារណៈនានា រួមទាំងមានការជួបជុំគ្នាលើសពី២០នាក់ឡើងទៅ នាថ្ងៃបុណ្យណូអែល និងបុណ្យចូលឆ្នាំសកលខាងមុខនេះ។ បម្រាមរបស់សាលាក្រុងនេះគឺធ្វើឡើងដើម្បីចូលរួមទប់ស្កាត់ជំងឺកូវីដ-១៩។
លោក ឃួង ស្រេង អភិបាលរាជធានីភ្នំពេញបានបញ្ជាក់ប្រាប់សារព័ត៌មានថ្មីៗតាមទូរសព្ទនាថ្ងៃទី២៣ ខែធ្នូថា នាថ្ងៃបុណ្យណូអែល និងបុណ្យចូលឆ្នាំសកលខាងមុខនេះ សាលារាជធានីភ្នំពេញបានបង្គាប់ឲ្យអាជ្ញាធរគ្រប់ខណ្ឌទាំង១៤ក្នុងរាជធានីភ្នំពេញត្រៀមត្រួតពិនិត្យមើលស្ថានភាពនៅគ្រប់មូលដ្ឋាន និងណែនាំដល់ពលរដ្ឋកុំមានការជួបជុំគ្នាលើសពី២០នាក់ឡើងទៅ។
«ខ្ញុំបានផ្សព្វផ្សាយទៅតាមបណ្តាខណ្ឌទាំង១៤ហើយឲ្យអនុវត្តតាមគោលការណ៍របស់ក្រសួងសុខាភិបាល ឲ្យពួកគាត់ហាមពលរដ្ឋដែលមានការជួបជុំ ដូចជាការប្រគំតន្ត្រី និងពិធីធំៗនៅតាមសាធារណៈដែលយើងមើលទៅមានហានិភ័យឆ្លងវីរុសកូវីដ-១៩ ដែលមានមនុស្សលើស២០នាក់ឡើងទៅ ដោយគ្មានរក្សាគម្លាតសុវត្ថិភាព។ នេះជាការលើកឡើងរបស់អភិបាលរាជធានីភ្នំពេញដែលបញ្ជាក់ថាពលរដ្ឋអាចជួបជុំក្នុងលក្ខណៈគ្រួសារ។ ប៉ុន្តែត្រូវគោរពតាមវិធានការរបស់ក្រសួងសុខាភិបាល។
លោក ឡុង ប៉ុណ្ណាសិរីរត្ន អ្នកនាំពាក្យក្រសួងវប្បធម៌ និងវិចិត្រសិល្បៈ ក៏បានបញ្ជាក់ថាក្រសួងវប្បធម៌នៅតែណែនាំដល់ពលរដ្ឋបន្តផ្អាកការរៀបចំពិធីបុណ្យប្រពៃណីផ្សេងៗដូចជា ពិធីរៀបអាពាហ៍ពិពាហ៍ ពិធីជប់លៀង ឬកម្មវិធីផ្សេងៗដែលប្រមូលផ្តុំដោយមនុស្សច្រើន តាមការណែនាំរបស់ក្រសួងសុខាភិបាលផងដែរ។
នាថ្ងៃទី១៥ ខែធ្នូ សម្តេចនាយករដ្ឋមន្ត្រី ហ៊ុន សែន បានថ្លែងសារណែនាំឲ្យពលរដ្ឋខ្មែរត្រូវបន្តរស់នៅបែបគន្លងថ្មី ដោយមិនត្រូវមានការជួបជុំគ្នាច្រើនឡើយ។ រាជរដ្ឋាភិបាលហាមពលរដ្ឋឲ្យមានការជួបជុំមនុស្សកុះករ ដោយយល់ថាព្រឹត្តិការណ៍សហគមន៍២៨វិច្ឆិកាអាចគ្រប់គ្រងបាន ប៉ុន្តែព្រឹត្តិការណ៍នេះមិនទាន់បញ្ចប់ទាំងស្រុងឡើយ។ ខណៈកម្ពុជាកំពុងគ្រប់គ្រងលើពលករខ្មែរដែលត្រឡប់ពីប្រទេសថៃ ដោយសារក្នុងខេត្តសាមុតសាខននៃប្រទេសថៃកំពុងរាតត្បាតជំងឺកូវីដ-១៩។
សម្តេចនាយករដ្ឋមន្ត្រីបានថ្លែងដូច្នេះថា៖«ក្នុងនាមជារាជរដ្ឋាភិបាល សុំការយោគយល់ពីព្រះសង្ឃ ពីប្រជាពលរដ្ឋ ដើម្បីសុំរក្សាស្ថានភាពដូចសព្វថ្ងៃមួយរយៈពេលទៀត ដើម្បីធានាឲ្យប្រាកដថាជំងឺកូវីដ-១៩ដែលបានឆ្លងចូលក្នុងសហគមន៍២៨វិច្ឆិកាបានផុតរលត់ពិតប្រាកដដើម្បីជាប្រយោជន៍ដល់មនុស្សគ្រប់គ្នា។ ពេលនេះជាពេលដែលយើងត្រូវជ្រើសរើសហើយវវាងការឆ្លងមកលើខ្លួនយើង ជាមួយនឹងការកម្សាន្តនៅថ្ងៃបុណ្យណូអែល និងបុណ្យចូលឆ្នាំសកល»។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានណែនាំឲ្យពលរដ្ឋទាំងអស់បន្តអនុវត្តនូវវិធានការ ៣ការពារ គឺពាក់ម៉ាស់ លាងដៃ និងរក្សាគម្លាត និង៣កុំ គឺកុំទៅកន្លែងមានមនុស្សច្រើន កុំទៅកន្លែងដែលបិទជិតគ្មានខ្យល់ចេញចូល និងកុំប៉ះពាល់គ្នា ជួបជុំ កុំចាប់ដៃគ្នា កុំឱបគ្នា កុំកៀកគ្នាដើម ដើម្បីជៀសផុតពីជំងឺកូវីដ-១៩ នាថ្ងៃបុណ្យណូអែល និងបុណ្យចូលឆ្នាំសកលខាងមុខនេះ។
រដ្ឋលេខាធិការនៃក្រសួងសុខាភិបាលរូបនេះបានណែនាំទៅពលរដ្ឋដូច្នេះថា៖«យើងមិនត្រូវមើលស្រាលលើលទ្ធភាពនៃវីរុសកូវីដ-១៩ និងភាពធ្ងន់ធ្ងររបស់ជំងឺនេះឡើយ ដែលអាចកើតឡើងគ្រប់កាលៈទេសៈ គ្រប់ពេលវេលា គ្រប់ទីកន្លែង លើបុគ្គលដែលមិនបានការពារខ្លួនត្រឹមត្រូវតាមការណែនាំរបស់សម្តេចនាយករដ្ឋមន្ត្រី និងក្រសួងសុខាភិបាល។ ការធ្វេសប្រហែសរបស់បុគ្គលនឹងអាចនាំមកនូវការចម្លងវីរុសកូវីដ-១៩ ក្នុងគ្រួសារ និងក្នុងសហគមន៌ដោយមិនដឹងខ្លួន»។
គិតត្រឹមថ្ងៃទី២៣ ខែធ្នូនេះ អ្នកជាសះស្បើយពីជំងឺកូវីដ-១៩ ដែលជាអ្នកពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា មានចំនួន៣២នាក់ហើយ ក្នុងចំណោមអ្នកឆ្លងសរុបចំនួន៤១នាក់ នៅសល់តែអ្នកជំងឺ៩នាក់ទៀត កំពុងបន្តការព្យាបាល។
បច្ចុប្បន្នកម្ពុជាមានអ្នកឆ្លងជំងឺកូវីដ-១៩ ចំនួន៣៦៣នាក់ ក្នុងនោះជាសះស្បើយ ៣៤៩នាក់ ។ ចំណែកអ្នកជំងឺនៅសល់១០នាក់ទៀត កំពុងបន្តព្យាបាលនៅមន្ទីរពេទ្យមិត្តភាពខ្មែរ-សូវៀត , រីឯ១នាក់ព្យាបាលនៅមណ្ឌលសុខភាពចាក់អង្រែ និង៣នាក់ទៀតព្យាបាលនៅមជ្ឈមណ្ឌលជាតិប្រយុទ្ធនឹងជំងឺរបេង និងហង់សិន៕