ជាតិ
នយោបាយជាតិ
មេដឹកនាំកម្ពុជា-ថៃ ផ្ញើលិខិតជូនគ្នាទៅវិញទៅមក បង្ហាញការប្តេជ្ញាចិត្តពង្រឹងទំនាក់ទំនង សម្តេច ហ៊ុន សែន និង លោក ប្រាយុទ្ធ ចន្ទអូចា ស្ថិតក្នុងពិធីចុះហត្ថលេខាលើឯកសារមួយចំនួនរវាងកម្ពុជា-ថៃ កាលអំឡុងខែកញ្ញា ឆ្នាំ២០១៧ នៅវិមានសន្តិភាព រាជធានីភ្នំពេញ។ រូបពីអង្គភាពប្រតិកម្មរហ័សនៃទីស្តីការគណៈរដ្ឋមន្រ្តី
× សម្តេច ហ៊ុន សែន នាយករដ្ឋមន្ត្រីកម្ពុជា បានផ្ញើលិខិតជូនទៅនាយឧត្តមសេនីយ៍ ប្រាយុទ្ធ ចន្ទអូចា នាយករដ្ឋមន្ត្រីថៃ ហើយនាយឧត្តមសេនីយ៍ ប្រាយុទ្ធ ចន្ទអូចា បានផ្ញើលិខិតជូនមកសម្តេច ហ៊ុន សែន ដែរ ដើម្បីអបអរសាទរខួប៧០ឆ្នាំនៃការបង្កើតទំនាកទំនងការទូតកម្ពុជា-ថៃ។ កាលពីថ្ងៃទី២៩ ខែធ្នូ ឆ្នាំ២០២០ ភាគីទាំងពីរ បានរម្លឹកខួប៧០ឆ្នាំនៃការបង្កើតទំនាក់ទំនងការទូតជាមួយគ្នា។
សម្តេចនាយករដ្ឋមន្ត្រី ហ៊ុន សែន សរសេរទៅកាន់នាយឧត្តមសេនីយ៍ ប្រាយុទ្ធ ចន្ទអូចា ថា៖«ខ្ញុំ សូមបញ្ជាក់ពីការប្តេជ្ញាចិត្តរបស់ខ្ញុំជាថ្មី ក្នុងការធ្វើការយ៉ាងចិត្តជិតស្និទ្ធជាមួយឯកឧត្តម [នាយករដ្ឋមន្ត្រី] លើការកម្ពស់ភាពជាដៃគូយូរអង្វែងរបស់យើង ជាពិសេសការយកឈ្នះលើវិបត្តិជំងឺកូវីដ-១៩ ដើម្បីនាំមកនូវសន្តិភាព ស្ថិរភាព និង វិបុលភាព សម្រាប់ប្រជាជាតិយើងទាំងពីរ និងសម្រាប់អាស៊ានផងដែរ»។
ចំណែក លោកនាយករដ្ឋមន្ត្រី ប្រាយុទ្ធ ចន្ទអូចា សរសេរមកកាន់សម្តេច ហ៊ុន សែន ថា៖«ខ្ញុំ ជឿជាក់ថា មិត្តភាពរវាងកម្ពុជានិងថៃ មានភាពរឹងមាំនិងស្ថិតស្ថេរ។ លើសពីនេះ ប្រជាជនរបស់យើង ជាពិសេសយុវជនជំនាន់ក្រោយ នឹងនៅតែបន្តសហការគ្នា ឆ្ពោះទៅអនាគត ដែលកាន់តែល្អប្រសើរ ដើម្បីសន្តិភាព វិបុលភាព និង ការអភិវឌ្ឍរួមគ្នា»។
សូមរម្លឹកថា ទំនាក់ទំនងការទូតកម្ពុជា-ថៃ បានបង្កើតឡើងតាំងពីអំឡុងខែឆ្នំ១៩៥០មក៕
Tag:
កម្ពុជា-ថៃ
ខួបទំនាក់ទំនង៧០ឆ្នាំ
© រក្សាសិទ្ធិដោយ thmeythmey.com