COVID-19
ជាតិ
សុខភាព
កម្ពុជា សល់អ្នកជំងឺកូវីដ-១៩ តែ៤នាក់ទៀតប៉ុណ្ណោះ
× ភ្នំពេញ៖ កម្ពុជា មានអ្នកជំងឺកូវីដ-១៩ តែចំនួន៤នាក់ទៀតប៉ុណ្ណោះ ដែលកំពុងសម្រាកព្យាបាលនៅមន្ទីរពេទ្យ ក្រោយអ្នកជំងឺ៤នាក់បានសះស្បើយ នៅព្រឹកថ្ងៃទី២៨ ធ្នូ។ នេះបើតាមក្រសួងសុខាភិបាល។
ក្រសួងសុខាភិបាល បានបញ្ជាក់ថា មនុស្ស៤នាក់ដែលជាសះស្បើយពីកូវីដ-១៩នាថ្ងៃនេះ មាន៣នាក់ជាករណីនាំចូល និងម្នាក់ទៀត ជាបុរសវ័យ៣៥ឆ្នាំ ដែលជាអ្នកពាក់ព័ន្ធនឹងព្រឹត្តិការណ៍២៨វិច្ឆិកា។ បុរសម្នាក់នេះ ជាបុគ្គលិកហាងZando សាខាបឹងកេងកង មានអាស័យស្នាក់នៅសង្កាត់បេងកេងកង៣ ខណ្ឌបឹងកេងកង។ ក្រសួងសុខាភិបាល បន្តរៀបរាប់ថា អ្នកជាសះស្បើយពីកូវីដ ចំនួន៣នាក់ ដែលជាករណីនាំចូលនោះមាន ស្ត្រីជនជាតិខ្មែរ-អាមេរិកម្នាក់ មានវ័យ៥៥ឆ្នាំ ដោយធ្វើដំណើរមកពីអាមេរិក បន្តជើងហោះហើរនៅតៃវ៉ាន់ និងមកដល់កម្ពុជា កាលពីថ្ងៃទី២០ធ្នូ។
ចំណែកបុរសជនជាតិជប៉ុន វ័យ២៩ឆ្នាំ បានធ្វើដំណើរមកពីជប៉ុន បន្តជើងហោះហើរនៅកូរ៉េ ដោយបានមកដល់កម្ពុជា នាថ្ងៃទី១៣ធ្នូ និងអ្នកជាសះស្បើយម្នាក់ទៀត ជាបុរសជនជាតិហ្ស៊កដានី អាយុ៤៧ឆ្នាំ ដោយបានធ្វើដំណើរមកប្រទេសហ្ស៊កដានី បន្តជើងហោះហើរនៅកូរ៉េខាងត្បូង ហើយមកដល់កម្ពុជា កាលពីថ្ងៃទី១០ធ្នូ ឆ្នាំ២០២០។ នេះបើតាមក្រសួងសុខាភិបាល ដែលបានអនុញ្ញាតឲ្យមនុស្សទាំង៤នាក់នោះ ចាកចេញពីមន្ទីរពេទ្យ ក្រោយលទ្ធផលតេស្តបង្ហាញអវិជ្ជមាន២ដង នៃជំងឺកូវីដ-១៩។
គិតត្រឹមថ្ងៃទី២៨ធ្នូ កម្ពុជារកឃើញអ្នកឆ្លងជំងឺកូវីដ-១៩ ចំនួន៣៦៤នាក់។ ក្នុងនោះ មាន៣៦០នាក់ បានជាសះស្បើយ និង៤នាក់ទៀតកំពុងបន្តការព្យាបាលនៅមន្ទីរពេទ្យ។ សម្រាប់អ្នកជំងឺដែលនៅសល់៤នាក់នេះ គឺមាន៣នាក់ជាពាក់ព័ន្ធនឹងព្រឹត្តិការណ៍២៨វិច្ឆិកា កំពុងសម្រាក់ព្យាបាលនៅមន្ទីរពេទ្យមិត្តភាពខ្មែរ-សូវៀត៕
© រក្សាសិទ្ធិដោយ thmeythmey.com