COVID-19
អន្តរជាតិ
កូរ៉េខាងត្បូង ទិញវ៉ាក់សាំងកូវីដ-១៩ ពីក្រុមហ៊ុន Moderna សម្រាប់ប្រជាជន ២០លាននាក់
ប្រធានាធិបតីកូរ៉េខាងត្បូង លោកមូន ចេអ៊ីន។ រូបភាព៖ Facebook-ប្រធានាធិបតីលោក មូន ចេអ៊ីន
×![]()
ដោយ: ធៀន ភារិន្ទ
កូរ៉េខាងត្បូង បានចុះកិច្ចព្រមព្រៀងទិញវ៉ាក់សាំងប្រឆាំងកូវីដ-១៩ ពីក្រុមហ៊ុន Moderna សម្រាប់ចាក់ឲ្យប្រជាជនចំនួន ២០លាននាក់។ នេះបើតាមការប្រកាសរបស់វិមានប្រធានាធិបតី Cheong Wa Dae នៅថ្ងៃទី២៩ ខែធ្នូ។ មុនសេចក្តីប្រកាសនេះ លោក លោកមូន ចេអ៊ីន បានលើកឡើងថា យុទ្ធនាការចាក់វ៉ាក់សាំង អាចនឹងចាប់ផ្តើម នៅខែកុម្ភៈខាងមុខ។ 
ស្របពេលស្ថានការណ៍កូវីដ-១៩ នៅកូរ៉េខាងត្បូង កំពុងតែហក់ឡើង កូរ៉េខាងត្បូង បានចុះកិច្ចព្រមព្រៀងជាមួយ ក្រុមហ៊ុន Moderna ដែលជាក្រុមហ៊ុនទី៤ លើការផ្គត់ផ្គង់វ៉ាក់សាំងឲ្យប្រទេសស្ថិតនៅតំបន់អាស៊ីខាងកើតមួយនេះ។ កិច្ចព្រមព្រៀងទិញវ៉ាក់សាំង ត្រូវបានធ្វើឡើងតាមប្រព័ន្ធវីដេអូ ដែលមានការចូលរួមពីសំណាក់ប្រធានាធិបតីកូរ៉េខាងត្បូង លោក មូន ចេអ៊ីន និង នាយកប្រតិបត្តិក្រុមហ៊ុន Moderna លោក Stephane Bancel នៅថ្ងៃទី២៨ ខែធ្នូ។
ក្រោមកិច្ចព្រមព្រៀងនេះ ក្រុមហ៊ុន Moderna នឹងផ្គត់ផ្គង់វ៉ាក់សាំងប្រឆាំងកូវីដ-១៩ សម្រាប់ប្រជាជនកូរ៉េខាងត្បូងចំនួន ២០លាននាក់ ដោយចាប់ផ្តើមពីត្រីមាសទីពីរឆ្នាំពី២០២១ តទៅ។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
កន្លងមកកូរ៉េខាងត្បូង បានចុះកិច្ចព្រមព្រៀងទិញវ៉ាក់សាំងពីក្រុមហ៊ុនចំនួន ៣ និងក្រោមគម្រោងអង្គការសុខភាពពិភពលោក (WHO) ។ រដ្ឋាភិបាលបានចុះកិច្ចព្រមព្រៀងទិញវ៉ាក់សាំងពីក្រុមហ៊ុន AstraZeneca ក្នុងខែវិច្ឆិកា និងក្រុមហ៊ុន Janssen និងក្រុមហ៊ុន Pfizer កាលពីសប្ដាហ៍មុន សម្រាប់ចាក់លើប្រជាជនចំនួន ៣៦លាននាក់។ បន្ថែមពីលើនេះ កូរ៉េខាងត្បូង ក៏ត្រៀមទិញវ៉ាក់សាំងក្រោមគម្រោងCOVAX ចំនួន ១០០លានដូសផងដែរ។
ករណីឆ្លងរបស់កូរ៉េខាងត្បូង នៅថ្ងៃទី២៩ ខែធ្នូ បានហក់ឡើងសារជាថ្មី ជាមួយករណីឆ្លងប្រចាំថ្ងៃចំនួន១០៤៦នាក់ ក្នុងនោះករណីឆ្លងក្នុងស្រុកមានចំនួន ១០៣០នាក់។ តួលេខសរុបរបស់កូរ៉េខាងត្បូង មានចំនួន ៥៨៧២៥ករណី ចំណែកអ្នកស្លាប់មានចំនួន ៨៥៩នាក់។ អ្នកជាសះស្បើយមានចំនួន ៤០៧០៣នាក់។
សូមបញ្ជាក់ថា មុនសេចក្តីប្រកាសរបស់វិមានប្រធានាធិបតីខាងលើ លោកមូន នៅថ្ងៃទី២៨ ខែធ្នូ កន្លងទៅ បានប្រកាសថា កូរ៉េខាងត្បូង អាចនឹងចាប់ផ្តើមយុទ្ធនាការចាក់វ៉ាក់សាំង នៅក្នុងខែកុម្ភៈខាងមុខ។ ប្រធានាធិបតីកូរ៉េខាងត្បូងរូបនេះ ក៏បានច្រានចោលការបារម្ភ និងការរិះគន់របស់ប្រជាជន ដែលថា ការផ្គត់ផ្គង់វ៉ាក់សាំងរបស់កូរ៉េខាងត្បូង មានការខ្វះខាត ឬយឺត។ បើតាមលោកមូន វាមិនដូចជាការលើកឡើងឡើយ រដ្ឋាភិបាលកូរ៉េខាងត្បូង បានបង្កើតក្រុមការងារជាអន្តរវិស័យជាស្រេចហើយ ដើម្បីគាំទ្រគោលនយោបាយវ៉ាក់សាំងប្រឆាំងកូវីដ-១៩ និងការផ្គត់ផ្គង់វ៉ាក់សាំង៕
Tag:
កូរ៉េខាងត្បូង
កូវីដ-១៩
© រក្សាសិទ្ធិដោយ thmeythmey.com
