COVID-19
អន្តរជាតិ
មន្ត្រីហ្វីលីពីននិងក្រុមអង្គរក្សលោក ឌូទើតេ ចាក់វ៉ាក់សាំងកូវីដ-១៩ ទាំងគ្មានការយល់ព្រម
រូបភាព៖ Reuters
×![]()
ដោយ: ធៀន ភារិន្ទ
សមាជិកគណៈរដ្ឋមន្ត្រីមួយចំនួន កងអង្គរក្សប្រធានាធិបតី រ៉ូឌ្រីហ្គោ ឌូទើតេ និងកងទ័ពមួយចំនួន ត្រូវបានចាក់វ៉ាក់សាំងជំងឺកូវីដ-១៩ ទាំងគ្មានការយល់ព្រមពីនិយ័តករឱសថក្នុងស្រុកអ្វីឡើយ។ ក្រសួងសុខាភិបាលហ្វីលីពីន ព្រមានពីហានិភ័យដែលកើតឡើងពីការចាក់វ៉ាក់សាំងគ្មានការអនុញ្ញាតនេះ ខណៈរដ្ឋមន្ត្រីការពារជាតិអះអាងថា វ៉ាក់សាំងដែលគ្មានការអនុញ្ញាត ជាវ៉ាក់សាំងខុសច្បាប់។ 
«ខ្ញុំដឹងថា សមាជិកគណៈរដ្ឋមន្ត្រីខ្លះ និងក្រុមសន្តិសុខប្រធានាធិបតី (PSG) ត្រូវបានចាក់វ៉ាក់សាំងរួចហើយ»។ រដ្ឋមន្ត្រីមហាផ្ទៃហ្វីលីពីន លោក Eduardo Ano បញ្ជាក់បែបនេះក្នុងកិច្ចសម្ភាសជាមួយវិទ្យុក្នុងស្រុកមួយនៅថ្ងៃទី២៨ ខែធ្នូ។ រដ្ឋមន្ត្រីមហាផ្ទៃហ្វីលីពីនរូបនេះ មិនបានបញ្ជាក់ឡើយ ថាតើវ៉ាក់សាំងមួយណា ត្រូវបានប្រើឡើយ?
ប៉ុន្តែតាមការបញ្ជាក់របស់អ្នកនាំពាក្យប្រធានាធិបតី លោក Harry Roque ទាហានបានស្ថិតក្នុងក្រុមចំណោមអ្នកដែលបានទទួលវ៉ាក់សាំង ដែលផលិតដោយក្រុមហ៊ុនចិន Sinopharm ។ មេបញ្ជាការ PSG លោក Jesus Durante ប្រាប់សារព័ត៌មានក្នុងស្រុក ABS-CBN ថា ក្រុមកងអង្គរក្ស បានទទួលការចាក់វ៉ាក់សាំងតាំងពីដើមខែកញ្ញាមកម្លេះ ប៉ុន្តែលោក រ៉ូឌ្រីហ្គោ ឌូទើតេ មិនបានផ្ដល់ការអនុញ្ញាតឡើយ។
ក្នុងកិច្ចសម្ភាសដដែលនេះ មេបញ្ជាការកងអង្គរក្សប្រធានាធិបតី បានបន្តថា លោកប្រធានាធិបតី ក៏មានការភ្ញាក់ផ្អើលផងដែរ បន្ទាប់ពីទទួលដំណឹងថា កងសន្តិសុខការពារប្រធានាធិបតី បានចាក់វ៉ាក់សាំងរួចរាល់។
បន្ទាប់ពីលេចចេញព័ត៌មានចាក់វ៉ាក់សាំងមុនការអនុម័ត ក្រសួងសុខាភិបាលហ្វីលីពីន បានព្រមានថា វាអាចបង្កឲ្យមានផលប៉ះពាល់ដល់សុខភាព និងសុវត្ថិភាពរបស់អ្នកដែលត្រូវបានចាក់វ៉ាក់សាំង។ ក្រសួងសុខាភិបាលហ្វីលីពីនបានបញ្ជាក់នៅក្នុងសេចក្តីថ្លែងការណ៍ថា៖ «នេះគឺជាហេតុផល ដែលវ៉ាក់សាំង ទាមទារឲ្យមានការត្រួតពិនិត្យ និងរកឃើញថាមានសុវត្ថិភាព ទើបអាចអនុញ្ញាតឲ្យប្រើប្រាស់បាន»។
ចំណែកនិយ័តកររដ្ឋបាលថ្នាំពេទ្យ និងអាហារ បានចេញសេចក្តីថ្លែងការណ៍នាពេលថ្មីៗនេះ ថា ការប្រើប្រាស់វ៉ាក់សាំងដែលគ្មានការទទួលស្គាល់ មិនមានការធានាពីសុវត្ថិភាព ប្រសិទ្ធភាព និងគុណភាពឡើយ ដោយសារមិនបានត្រួតពិនិត្យឲ្យបានត្រឹមត្រូវ។
ជាការឆ្លើយតប អ្នកនាំពាក្យប្រធានាធិបតីហ្វីលីពីន លោក Roque បានបញ្ជាក់ថា និយ័តករ មានតួនាទីត្រឹមតែជាអ្នកកំណត់ពីការលក់វ៉ាក់សាំង និងការចែកចាយ និងការដាក់ទណ្ឌកម្មទាក់ទិននឹងពាណិជ្ជកម្មប៉ុណ្ណោះ។ នេះបើតាមការចុះផ្សាយរបស់សារព័ត៌មាន The Straits Times ។
កន្លងមក ក្រុមហ៊ុន SinoPharm បានប្រកាសថា ការធ្វើតេស្តលើវ៉ាក់សាំងរបស់ខ្លួននៅក្នុងអេមីរ៉ាតអារ៉ាប់រួម មានប្រសិទ្ធភាពប្រមាណ ៨៦ភាគរយ។ ហ្វីលីពីន ក៏សាកល្បងវ៉ាក់សាំងនេះដែរ ប៉ុន្តែមិនទាន់បានអនុញ្ញាតឲ្យប្រើប្រាស់នៅហ្វីលីពីននៅឡើយទេ។ លោក Rogue អះអាងថា វ៉ាក់សាំង មានប្រសិទ្ធភាពរួចហើយ មិនចាំបាច់អនុម័តដោយនិយ័តករឡើយ ហើយវាត្រូវបានប្រើប្រាស់នៅចិន និងអេមីរ៉ាតអារ៉ាប់រួម ក៏បានអនុញ្ញាតឲ្យប្រើប្រាស់ផងដែរ។
គិតត្រឹមថ្ងៃទី២៩ ខែធ្នូ ហ្វីលីពីន មានករណីឆ្លងសរុបចំនួន ៤៧១៥២៦ករណី និងអ្នកស្លាប់មានចំនួន ៩១៦២នាក់។ ចំណែកអ្នកជាសះស្បើយមានចំនួន ៤៣៩០១៦នាក់៕
Tag:
ហ្វីលីពីន
កូវីដ-១៩
© រក្សាសិទ្ធិដោយ thmeythmey.com
