Kylian Mbappe ជាកីឡាករបាល់ទាត់មានតម្លៃខ្លួនថ្លៃជាងគេលើលោក ២១៨លានដុល្លារ គិតត្រឹមឆ្នាំ ២០២០ ខណៈមិត្តរួមក្រុម Paris Saint-Germain កីឡាករ Neymar នៅលេខ៣ មានតម្លៃ ១៥៥លានដុល្លារ។ Raheem Sterling ខ្សែបម្រើ Man City មានថ្លៃខ្លួន ១៥៥លានដុល្លារ ស្ថិតនៅលេខ២ ។ Lionel Messi ស្ថិតនៅលេខរៀងទី៩ ក្នុងចំណោមកីឡាករថ្លៃជាងគេទាំង១០ ស្របពេល Cristiano Ronaldo គ្មានឈ្មោះ។
ខ្សែប្រយុទ្ធអន្តរជាតិបារាំងវ័យ ២១ ឆ្នាំរូបនេះ បានក្លាយជាកីឡាករវ័យក្មេងដ៏មានទេពកោសល្យបំផុតនៅអឺរ៉ុប និងពិភពលោកចាប់តាំងពីលេចធ្លោខ្លាំងជាមួយក្រុម Monaco ម្ល៉េះ។ Mbappe ដែលមានទំនាក់ទំនងយ៉ាងខ្លាំងជាមួយ Real Madrid បានក្លាយជាកីឡាករដែលមានមានតម្លៃផ្ទេថ្លៃជាងគេលំដាប់ទី២ ក្នុងប្រវត្តិសាស្ត្របន្ទាប់ពីផ្លាស់ទៅ PSG ក្នុងតម្លៃ ២១៧ លានដុល្លារកាលពីឆ្នាំ ២០១៧។
នៅឆ្នាំ ២០២០នេះ Transfermarkt បានកំណត់ឲ្យ Mbappe ជាកីឡាករដែលមានតម្លៃបំផុតក្នុងចំនួន ២១៨លានដុល្លារ ដោយនាំមុខ Neymar ដែលធ្លាប់មានការផ្ទេរថ្លៃបំផុត ២៦៩លានដុល្លារកាលពីឆ្នាំ ២០១៧ ដើម្បីទៅចូលរួមក្រុមយក្សបារាំង ពី Barcelona។ សព្វថ្ងៃខ្សែប្រយុទ្ធអន្តរជាតិប្រេស៊ីលវ័យ២៨ឆ្នាំរូបនេះ មានតម្លៃខ្លួនត្រឹម ១៥៥លានដុល្លារ។
Transfermarkt ដែលជាស្ថាប័នវាយតម្លៃក្នុងវិស័យជំនួញកីឡាបាល់ទាត់លំដាប់ពិភពលោក ក៏បានបង្ហាញពីកីឡាករបាល់ទាត់ចំនួន១០រូបដែលមានតម្លៃខ្លួនថ្លៃជាងគេលើលោកប្រចាំឆ្នាំ២០២០នេះផងដែរ ដោយក្នុងនោះមានកីឡាករអន្តរជាតិអង់គ្លេសចំនួន៤រូប រួមមាន Raheem Sterling (Man City), Jadon Sancho (Borussia Dortmund), Trent Alexander-Arnold (Liverpool FC), និង Harry Kane (Tottenham Hotspur)។
ខាងក្រោមនេះយើងនឹងបង្ហាញលោកអ្នកអំពីកីឡាករទាំង១០រូបដែលមានតម្លៃខ្លួនថ្ងៃជាងគេទាំង១០ សម្រាប់ឆ្នាំ២០២០៖
១. Kylian Mbappe (Paris Saint-Germain): ២១៨លានដុល្លារ
២. Raheem Sterling (Manchester City): ១៥៥លានដុល្លារ
៣. Neymar (Paris Saint-Germain): ១៥៥លានដុល្លារ
៤. Sadio Mane (Liverpool): ១៤៥ លានដុល្លារ
៥. Mohamed Salah (Liverpool): ១៤៥ លានដុល្លារ
៦. Harry Kane (Tottenham Hotspur): ១៤៥ លានដុល្លារ
៧. Kevin De Bruyne (Manchester City): ១៤៥ លានដុល្លារ
៨. Jadon Sancho (Borussia Dortmund): ១៤១ លានដុល្លារ
៩. Lionel Messi (Barcelona): ១៣៥,៤៧ លានដុល្លារ
១០. Trent Alexander-Arnold (Liverpool): ១៣៣ លានដុល្លារ៕