នៅថ្ងៃទី៣១ ខែធ្នូ ចិនបានអនុញ្ញាតឲ្យប្រើប្រាស់ដោយមានលក្ខខណ្ឌវ៉ាក់សាំងបង្ការជំងឺកូវីដ-១៩ ដែលអភិវឌ្ឍដោយក្រុមហ៊ុន CNBG ដែលចំណុះឲ្យក្រុមហ៊ុន Sinopharm សម្រាប់សាធារណៈជនទូទៅ។ វ៉ាក់សាំងនេះ ជាវ៉ាក់សាំងលើកដំបូងដែលចិនអនុញ្ញាតឲ្យប្រើសម្រាប់មនុស្សទូទៅ ខណៈពិធីបុណ្យចូលឆ្នាំចិននឹងមកដល់។
វ៉ាក់សាំងរបស់ក្រុមហ៊ុន Sinopharm គឺជាវ៉ាក់សាំងដំបូងដែលត្រូវបានអនុញ្ញាតឲ្យប្រើប្រាស់ជាទូទៅ នៅចិនពីសំណាក់រដ្ឋបាលផលិតផលវេជ្ជសាស្ត្រជាតិចិន។ វ៉ាក់សាំងនេះ នឹងរួមចំណែកក្នុងការផ្តល់វ៉ាក់សាំងដល់ប្រជាជនចិនប្រមាណ៥០លាននាក់ មុនពេលបុណ្យចូលឆ្នាំចិននាខែកុម្ភៈ ឆ្នាំ២០២១។
ការអនុញ្ញាតឲ្យប្រើប្រាស់ដោយមានលក្ខខណ្ឌ បានន័យថា វ៉ាក់សាំងនេះកំពុងស្ថិតក្នុងការធ្វើតេស្តដំណាក់កាលចុងក្រោយ និងបន្តស្រាវជ្រាវនៅឡើយ ហើយអាជ្ញាធរសុខាភិបាលអាចទាមទារទិន្ន័យបន្ថែមទាក់សុវត្ថិភាព និងប្រសិទ្ធភាពនៃវ៉ាក់សាំងទៅលើក្រុមប្រជាជនណាមួយ។ ដ្បិតសម្រាប់មនុស្សទូទៅមែន ការប្រើប្រាស់វ៉ាក់សាំងនេះ គឺកំណត់សម្រាប់ក្រុមមនុស្សក្នុងវ័យណាមួយប៉ុណ្ណោះ។
លោក Chen Shifei មន្ត្រីរដ្ឋបាលផលិតផលវេជ្ជសាស្ត្រនិយាយថា ការអនុញ្ញាតឲ្យប្រើប្រាស់ដោយមានលក្ខខណ្ឌ អាចធ្វើទៅបានដើម្បីទប់ទល់ទៅនឹងអាសន្នសុខាភិបាលសាធារណៈ និងនៅពេលដែលផលប្រយោជន៍ទៅលើសុខភាពធំជាងបញ្ហាប្រឈម។
អេមីរ៉ាតអារ៉ាប់រួម ជាប្រទេសទីមួយដែលអនុញ្ញាតឲ្យប្រើវ៉ាក់សាំងនេះសម្រាប់សាធារណៈជនទូទៅកាលពីពាក់កណ្ដាលខែធ្នូ។ យោងតាមលទ្ធផលបឋម វ៉ាក់សាំងរបស់ក្រុមហ៊ុន Sinopharm មានប្រសិទ្ធភាព៧៩,៣៤ភាគរយ ក្នុងការបង្ការជំងឺឆ្លង និង៩៩,៥២ភាគរយក្នុងការបង្កើតភាពស៊ាំ។ អាជ្ញាធរចិន ពុំបានបញ្ជាក់ពីតម្លៃពិតប្រាកដនៃវ៉ាក់សាំងនេះឡើយ ប៉ុន្តែធ្លាប់បង្ហើបថា ស្ថិតក្នុងតម្លៃសមរម្យមួយដែលអាចទទួលយកបាន។ វ៉ាក់សាំងនេះ កំពុងស្ថិតក្នុងការផលិតទ្រង់ទ្រាយធំ។
វ៉ាក់សាំង Sinopharm ខុសពីវ៉ាក់សាំងរបស់ក្រុមហ៊ុន Moderna និង Pfizer ដោយសារវ៉ាក់សាំងនេះមិនប្រើបច្ចេកវិទ្យា mRNA ដែលជារបៀបថ្មី ដើម្បីបង្កើតភាពស៊ាំឡើយ។ វ៉ាក់សាំងនេះ ប្រើបច្ចេកវិទ្យាធម្មតាបែបប្រពៃណីដោយបញ្ចូលវីរ៉ុសដែលងាប់ឬ ខ្សោយ និងគ្មានសមត្ថភាពក្នុងការចម្លងជំងឺទៅក្នុងរាងកាយ ដើម្បីដាស់ប្រព័ន្ធការពាររាងកាយឲ្យស្គាល់វីរុស និងបង្កើតភាពស៊ាំតែម្ដង។ វិធីសាស្ត្រនេះ ជារបៀបដែលត្រូវបានបង្កើតវ៉ាក់សាំងច្រើនមកហើយ។
លោកYang Xiaoming ប្រធានក្រុមហ៊ុន CNBG ដែលជាផ្នែកមួយនៃ Sinopharm និយាយថា ដើម្បីអាចបង្កើតភាពស៊ាំសម្រាប់ប្រទេសចិនទាំងមូល ប្រជាជនចាប់ពី៧០០លាននាក់ឡើងទៅត្រូវទទួលវ៉ាក់សាំង ដែលនេះន័យថា ចិនត្រូវផលិតវ៉ាក់សាំងឲ្យបាន១,៤ពាន់លានដូស។ លោកបន្តថា ជាទូទៅ ចិនអាចផលិតវ៉ាក់សាំងបានត្រឹមតែពី៥០០ ទៅ៧០០លានដូសប៉ុណ្ណោះក្នុងមួយឆ្នាំ ដូច្នេះការផលិតឲ្យបានច្រើនក្នុងរយៈពេលខ្លី ជាបញ្ហាប្រឈមមួយ។
បើទោះបីជាមិនទាន់ផ្តល់ការអនុញ្ញាតផ្លូវការ និងដាច់ស្រេចក្នុងការប្រើប្រាស់វ៉ាក់សាំងណាមួយក្ដី ចិនបានចាប់ផ្តើមឲ្យប្រើប្រាស់វ៉ាក់សាំងក្នុងស្ថានការណ៍បណ្តោះអាសន្នចាប់ពីខែកក្កដាមកម្ល៉េះ។ វ៉ាក់សាំងចំនួនបី ដែលក្នុងនោះផលិតដោយក្រុមហ៊ុន CNBG និងមួយទៀតផលិតដោយ Sinovac Biotech ត្រូវបានផ្តល់ឲ្យមនុស្សចំនួន១,៥លាននាក់មានបុគ្គលិកសុខាភិបាល មន្ត្រីរដ្ឋ និងមន្ត្រីតាមព្រំដែនរួចស្រេចទៅហើយ។
ចិន មានវ៉ាក់សាំងចំនួន១១ ដែលកំពុងស្ថិតក្នុងដំណាក់កាលធ្វើតេស្តផ្សេងៗទាំងនៅក្នុងស្រុក និងនៅក្រៅប្រទេស។ ក្នុងចំណោមចំនួន១១ វ៉ាក់សាំងចំនួន២ ស្ថិតក្នុងការវាយតម្លៃរបស់កម្មវិធី COVAX ៕