ជាតិ
សង្គមជាតិ
២២២ថ្ងៃ តុលាការដោះស្រាយសំណុំរឿងពន្ធនាគារ ដោយដោះលែងមនុស្សជាង២ម៉ឺននាក់ អ្នកជាប់ឃុំក្នុងពន្ធនាគារខេត្តបន្ទាយមានជ័យ
× ភ្នំពេញ៖ យុទ្ធនាការដោះស្រាយសំណុំរឿងនៅតាមសាលាដំបូងរាជធានី-ខេត្ត រយៈពេល២២២ថ្ងៃ បានដោះស្រាយលើសំណុំរឿងព្រហ្មទណ្ឌដែលកកស្ទះជាង៧ម៉ឺនសំណុំរឿង។ ការដោះស្រាយនេះ បានជួយកាត់បន្ថយភាពចង្អៀតណែនក្នុងពន្ធនាគារ បានជាង២,៦ម៉ឺននាក់។ នេះបើតាមក្រសួងយុត្តិធម៌។
ក្រសួងយុត្តិធម៌ បានចេញរបាយការណ៍ស្ដីពី លទ្ធផលរយៈពេល២២២ថ្ងៃ នៃការអនុវត្តយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត គឺសម្រេចដោះស្រាយសំណុំរឿងចាស់ជាង៣.៥ម៉ឺនករណី ស្មើនឹង៨៩ភាគរយ ហើយសំណុំរឿងថ្មីគឺដោះស្រាយបានជាង៣.៦ម៉ឺនករណី ស្មើនឹង៧៣ភាគរយ។ សំណុំរឿងទាំងនេះ គឺគិតទាំងដំណាក់កាលអយ្យការស៊ើបសួរ និងជំនុំជម្រះរួច។
លោក ជិន ម៉ាលីន អ្នកនាំពាក្យក្រសួងយុត្តិធម៌អះអាងប្រាប់សារព័ត៌មានថ្មីៗថា ការដោះស្រាយបញ្ហាកកស្ទះសំណុំរឿងនេះ គឺដោះស្រាយបទល្មើសព្រហ្មទណ្ឌ ដូចជាករណីឆបោក លួចឆក់ និងគ្រឿងញៀនជាដើម។ លោកបញ្ជាក់បន្ថែមថា៖ «២២២ថ្ងៃនេះ បានជួយកាត់បន្ថយភាពចង្អៀតណែនក្នុងពន្ធនាគារជាង២.៦ម៉ឺននាក់ ក្នុងនោះមានបុគ្គលដែលបានដោះលែងចេញពីពន្ធនាគារជាង១.១នាក់, បុគ្គលនឹងត្រូវដោះលែងជាង៥ពាន់នាក់, បុគ្គលដែលសម្រេចមិនឃុំខ្លួនមានប្រមាណ៣ពាន់នាក់ និងបុគ្គលត្រូវបញ្ជូនទៅមណ្ឌលបន្សាបគ្រឿងញៀនជំនួសឲ្យការចោទប្រកាន់ និងបញ្ជូនទៅមណ្ឌលបន្សាបគ្រឿងញៀនដោយសមត្ថកិច្ច»។
ជុំវិញការដោះស្រាយការកកស្ទះសំណុំរឿងនេះ លោក អំ សំអាត អ្នកសម្របសម្រួលអង្គការ លីកាដូ យល់ថា គឺជារឿងល្អ ហើយសុំឲ្យនិតីវិធីនៃការដោះស្រាយនេះ មានបន្តរហូត ដើម្បីកុំឲ្យមានករណីកកស្ទះច្រើនបន្តទៀត។ លោកថ្លែងយ៉ាងដូច្នេះថា៖ «យើងសាទរជាមួយលទ្ធនេះ ហើយក៏សង្ឃឹមថា នីតិវិធីនេះ អាចនឹងបន្តមានរហូត បើទោះបីយុទ្ធនាការនេះត្រូវបញ្ជប់ក៏ដោយ។ ព្រោះយើងដឹងហើយថា សំណុំរឿងកន្លងមាន ខ្លះត្រូវកកស្ទះអូសបន្លាយពេលយ៉ាងយូរ បានអាចដោះស្រាយបាន»។
សូមជម្រាបថា យុទ្ធាការដោះស្រាយសំណុំរឿងនេះ គឺចាប់ផ្ដើមកាលពីថ្ងៃទី១៨ឧសភា ឆ្នាំ២០២០ ហើយនឹងត្រូវបិទបញ្ចប់នៅរយៈពេល១ឆ្នាំ នៅថ្ងៃទី១៧ឧសភាឆ្នាំ២០២១ខាងមុខ៕
Tag:
យុទ្ធនាការ
កកស្ទះសំណុំរឿង
© រក្សាសិទ្ធិដោយ thmeythmey.com