អ្នកស្រី ម៉ៅ ស៊ីថា តាំងចិត្តដឹកនាំសហគមន៍ផ្គត់ផ្គង់កសិផលស្វាយរៀងឲ្យបោះជំហានទៅមុខ

ជាតិ

អ្នកស្រី ម៉ៅ ស៊ីថា តាំងចិត្តដឹកនាំសហគមន៍ផ្គត់ផ្គង់កសិផលស្វាយរៀងឲ្យបោះជំហានទៅមុខ

02, Jan 2021 , 8:59 am

រូបភាព

អ្នកស្រី ម៉ៅ ស៊ីថា (អាវបៃតង)

ដោយ:

ភ្នំពេញ៖ អ្នកស្រី ម៉ៅ ស៊ីថា គឺជាប្រធានសហគមន៍ផ្គត់ផ្គង់កសិផលស្វាយរៀង តាំងពីឆ្នាំ២០១១មក ពោលគឹតាំងសហគមន៍នេះ ត្រូវបានបង្កើតឡើងម្ល៉េះ។ ប្រធានសហគមន៍ វ័យ៤៩ឆ្នាំរូបនេះ អះអាងប្រាប់ Thmeythmey25 តាមទូរសព្ទថា ដំបូងឡើយរូបគាត់ក៏ជាកសិករធម្មតាមួយរូបដែរ ហើយការក្លាយទៅជាប្រធានសហគមន៍នេះ គឺជាអម្រែកដ៏ធ្ងន់មួយសម្រាប់អ្នកស្រី។ ទោះយ៉ាងណា អ្នកស្រី ម៉ៅ ស៊ីថា មិនបោះបង់ ហើយរឹតតែតស៊ូជម្នះបាននូវឧបស្គនៅក្នុងការងាររបស់ខ្លួន ព្រោះអ្នកស្រី ចង់ផ្តល់ឱកាសដល់ស្ត្រីក្នុងសហគមន៍ផ្សេងទៀតបានចូលរួមក្នុងសហគមន៍ និងក្លាយជាអ្នកដឹកនាំដូចបុរស។

បច្ចុប្បន្ន សហគមន៍ផ្គត់ផ្គង់កសិផលស្វាយរៀង គឺជាអ្នកសម្របសម្រួលកសិផលរបស់កសិករចំនួន ៣៣៨គ្រួសារ នៅភូមិព្នៅ ឃុំតាលួស ស្រុកស្វាយ ខេត្តស្វាយរៀង។ ស្ត្រីវ័យ៤៩ឆ្នាំរូបនេះ អះអាងថា រយៈពេល១០ឆ្នាំ ទទួលបានបទពិសោធច្រើន ពិសេសការផ្ដល់ឱកាសឲ្យស្ត្រីមានចូលរួមក្នុងសហគមន៍ និងក្លាយជាអ្នកដឹកនាំដូចបុរស។

សហគមន៍ផ្គត់ផ្គង់កសិផលស្វាយរៀង បានបង្កើតនៅអំឡុងខែតុលា ឆ្នាំ២០១១ និងដើរតួនាទីសម្របសម្រួលកសិផលរបស់គ្រួសារកសិករ ៣៣៨គ្រួសារ នៅភូមិព្នៅ ឃុំតាលួស ស្រុកស្វាយ ខេត្តស្វាយរៀង។ អ្នកស្រី ម៉ៅ ស៊ីថា ជាប្រធានសមាគមន៍ផ្គត់ផ្គង់កសិផលស្វាយរៀង តាំងពីថ្ងៃបង្កើតសហគមន៍មកម្ល៉េះ។ ការក្លាយជាប្រធានសហគមន៍ មិនមែនជារឿងងាយទេ សម្រាប់ស្ដ្រីវ័យ ៤៩ឆ្នាំរូបនេះ ដោយត្រូវរងការរិះគន់ពីមជ្ឈដ្ឋានជុំវិញព្រោះជាស្ដ្រី។

ការរិះគន់ពីអ្នករួមការងារ ក្លាយជាសម្ពាធរបស់អ្នកស្រី ម៉ៅ ស៊ីថា រហូតចង់បោះបង់តំណែងនេះម្ដងៗ ប៉ុន្តែដោយចិត្តស្រលាញ់ ទើបអ្នកស្រីមិនបោះបង់។ សម្រាប់អ្នកស្រី ពិតជាមានការលំបាក ព្រោះត្រូវទទួលបន្ទុកការងារផង និងត្រូវបំពេញតួនាទីជាម្ដាយ និងប្រពន្ធផង។ អ្នកស្រី ម៉ៅ ស៊ីថា បានប្រាប់ThmeyThmey25 យ៉ាងដូច្នេះ៖«ចាប់ធ្វើ (ប្រធានសហគមន៍) ដំបូងៗ ចង់តែបោះបង់ម្ដងៗ ព្រោះអ្នករួមការងារជាបុរស មិនសូវឲ្យតម្លៃ គេថាជាមនុស្សស្រីមិនគួរធ្វើជាអ្នកដឹកនាំ។ ក្រៅពីហ្នឹង យើងក៏កាត់បន្ថយពេលវេលាជាមួយគ្រួសារទៀត»។

ដ្បិតមានឧបសគ្គ ក៏ពិតមែនតែស្ត្រីរូបនេះ មិនចុះចាញ់ហើយក៏មិនព្រមបោះបង់ដែរ ព្រោះតែស្រលាញ់ការងារក្នុងសហគមន៍។ មុនក្លាយជាប្រធានសហគមន៍ផ្គត់ផ្គង់កសិផលស្វាយរៀង អ្នកស្រី ម៉ៅ ស៊ីថា ក៏ជាកសិករមួយរូបដែរ។ ក្នុងនាមជាប្រធានសហគមន៍អ្នកស្រី បានឲ្យដឹងថា កន្លងមកសហគមន៍បានធ្វើសកម្មដូចជា រកទីផ្សារឲ្យកសិករ ណែនាំកសិករឲ្យដាំបន្លែសុវត្ថិភាព និងផ្ដល់អ្នកជំនាញចុះបង្រៀន ពីបច្ចេកទេសដាំដុះដល់សមាជិកសហគមន៍។

រយៈពេល១០ឆ្នាំ ជាអ្នកគ្រប់គ្រងសហគមន៍ធ្វើឲ្យអ្នកស្រី ម៉ៅ ស៊ីថា ទទួលបានបទពិសោធច្រើន ពិសេសការផ្ដល់ឱកាសឲ្យស្ត្រីមានចូលរួមក្នុងសហគមន៍ និងក្លាយជាអ្នកដឹកនាំដូចបុរស។ ដ្បិតការចាប់ផ្ដើមជាអ្នកដឹកនាំរបស់អ្នកស្រី ម៉ៅ ស៊ីថា មិនសូវមានការពេញចិត្តពីអ្នកដទៃពិតមែន តែតាមរយៈការបង្ហាញស្នាដៃការងារកន្លងមកបានធ្វើឲ្យសមាជិកសហគមន៍គាំទ្រអ្នកស្រីធ្វើជាប្រធានសហគមន៍រយៈពេល២ អាណត្តិមកហើយ។

អ្នកស្រី ម៉ៅ ស៊ីថា (អាវលឿង) និងសមាជិកសហគមន៍

ប្រធានសហគមន៍រូបនេះបានប្រាប់ Thmeythmey25 ថាទីផ្សារធំសម្រាប់កសិផលក្នុងសហគមន៍គឺផ្គត់ផ្គង់ទៅរាជធានីភ្នំពេញ និងផ្គត់ផ្គង់កាស៊ីណូក្នុងខេត្តស្វាយរៀងផ្ទាល់ក្នុងមួយសប្ដាហ៍ ២ដងនិងក្នុងបរិមាណ ៨០០-១ ០០០គីឡូ។ ដោយឡែកស្ថិតក្នុងវិបត្តិកូវីដ-១៩ នេះខាងកាស៊ីណូតម្រូវឲ្យសហគមន៍ផ្គត់ផ្គង់ត្រឹម ២០០គីឡូប៉ុណ្ណោះក្នុងមួយសប្ដាហ៍។ ដ្បិតមិនបង្ហាញពីតម្លៃតែអ្នកស្រីប្រធានសហគមន៍ថាតម្លៃកសិផលទាំងនោះស្របទៅតាមទីផ្សារ។ អ្នកស្រីបន្តថាមុនកសិករចូលជាសមាជិករបស់សហគមន៍ពួកគាត់ត្រូវដឹកលក់កសិផលទាំងនោះលក់នៅតាមភូមិ ដែលជាការលំបាកព្រោះពេលខ្លះកសិផលពួកគាត់លក់អស់ ហើយមានពេលខ្លះក៏លក់មិនអស់។

បច្ចុប្បន្នសហគមន៍ផ្គត់ផ្គង់កសិផលស្វាយរៀងត្រូវប្រើប្រាស់ទឹកអណ្ដូងសម្រាប់ស្រោចស្រពនៅឡើយដូច្នេះជាផែនការបន្ទាប់របស់សហគមន៍បង្កើតបណ្ដាញទឹកស្អាត ដើម្បីផ្គត់ផ្គង់ដល់ការស្រោចស្រព។ បន្ថែមលើនោះ ប្រធានសហគមន៍ស្ដ្រីរូបនេះក៏នឹងបង្កើនឱកាសទីផ្សារដល់កសិករផងដែរ៕