ជាតិ
អ្នកចិញ្ចឹមចៀមនៅព្រៃនប់ ណែនាំពីវិធីចិញ្ចឹមឲ្យបានផល និងការទប់ស្កាត់ជំងឺឆ្លង
×![]()
លោក ឃឹម សន ជាអ្នកចិញ្ចឹម និងមើលថែចៀម ជាង៩០០ក្បាល នៅកសិដ្ឋានមួយ ដែលមានទីតាំងនៅស្រុកព្រៃនប់ ខេត្តព្រះសីហនុ។ លោក ឃឹម សន បានប្រាប់សារព័ត៌មាន Thmeythmey25 ថាសត្វចៀម ជាសត្វងាយស្រួលចិញ្ចឹម និងងាយស៊ីចំណី តែត្រូវមើលថែឱ្យបានល្អ ព្រោះបើវាមានជំងឺនឹងអាចឆ្លងងាប់តគ្នា។ ដើម្បីចិញ្ចឹមចៀម បានជោគជ័យ ត្រូវគិតពីកត្តា៣គឺចំណី ការមើលថែកូន និងជំងឺ។ នេះបើតាមលោក ឃឹម សន ដែលជាអ្នកមើលថែសត្វចៀម ដែលម្ចាស់កសិដ្ឋានចិញ្ចឹមយកសាច់ ជិត១ឆ្នាំមកហើយ។ 
ក្នុងបទសម្ភាសជាមួយសាព័ត៌មាន ThmeyThmey25 តាមទូរសព្ទ លោក ឃឹម សន បានឱ្យដឹងថា ចៀមជាសត្វដែលងាយស្រួលចិញ្ចឹម ដូចគោ ក្របី ដែរ ប៉ុន្តែអ្នកចិញ្ចឹម ត្រូវគិតពីកត្តាបី គឺចំណី ការមើលថែកូន និងជំងឺ។
លោកបន្តថា សត្វចៀមស៊ីស្មៅជាអាហារ ដូចនេះពេលរដូវប្រាំង ត្រូវត្រៀមស្មៅបម្រុងទុកឱ្យបានគ្រប់គ្រាន់ ដូចខែវស្សាដែរ។ « វាស៊ីតែស្មៅ ពេលខែប្រាំងស្មៅយើងមិនមាន អីចឹងយើងត្រូវត្រៀមស្មៅទុកដល់ខែប្រាំង ដូចជាយើងដាំស្មៅបន្ថែម ឬត្រៀមចំបើងទុក»។ នេះជាការបញ្ជាក់របស់លោក ឃឹម សន។
ចៀម អាចពពោះពីរដងក្នុងមួយឆ្នាំ ហើយការពពោះនេះ អាចមានកូនមួយឬពីរ ដូចនេះអ្នកចិញ្ចឹមត្រូវ មើលថែកូនចៀមឱ្យបានល្អ ព្រោះចៀមខ្លះមានកូនលើកទីមួយ មិនសូវឱ្យកូនបៅនោះទេ ហើយកាលណាយើងមិនឱ្យកូនវាបៅគ្រប់គ្រាន់នឹងធ្វើឱ្យបាក់ទឹកដោះ។
បើតាមអ្នកចិញ្ចឹមចៀមនៅខេត្តព្រះសីហនុរូបនេះ ជំងឺ ជាកត្តាដែលគួរឱ្យបារម្ភជាងគេ ព្រោះបើចៀម កើតជំងឺអាសន្នរោគ ដូចជាអុតក្ដាម ឬជំងឺសាទឹក នឹងអាចធ្វើឱ្យងាប់តគ្នា។ លោក ឃឹម សន បានរៀបរាប់ដូច្នេះថា៖ «ថែទាំសំខាន់គឺថ្នាំ ត្រូវមើលឱ្យដឹងថាចៀមវាកើតជំងឺអីគេ? អីចឹងបានយើងចាក់វ៉ាកសាំងត្រូវ ។ ធម្មតាវ៉ាក់សាំងមិនមែនឃើញអាការហើយបានចាក់ទេ គឺយើងត្រូវចាក់ការពារមុន។ បើរោគប្រចាំថ្ងៃ ដូចជាស៊ីស្មៅប៉ះដង្កូវខ្លះពុល អាហ្នឹង យើងមានថ្នាំព្យាបាលភ្លាមៗមិនសូវបារម្ភទេ តែជំងឺអាសន្នរោគបើការពារមិនទាន់ ឆ្លងងាប់ទាំងអស់»៕
លោក ឃឹម សន អ្នកចិញ្ចឹមចៀម នៅខេត្តព្រះសីហនុ។
Tag:
កសិដ្ឋាន
ចៀម
ឃឹម សន
កសិកម្ម
ព្រះសិហនុ
© រក្សាសិទ្ធិដោយ thmeythmey.com
