កីឡាអន្តរជាតិ
អន្តរជាតិ
ក្រោយឈ្នះ Aston Villa, Solkjaer ថា Pogba កាន់តែល្អឡើងហើយ
×
ដោយ៖ជា យូគៀង
អ្នកចាត់ការទូទៅក្រុម Manchester United លោក Ole Gunnar Solkjaer បានសរសើរខ្សែបម្រើសញ្ជាតិបារាំង Paul Pogba ដែលបង្ហាញទម្រង់យ៉ាងល្អក្នុងជំនួបជាមួយ Aston Villa ។ ក្រុមលោក Solkjaer បានឈ្នះដោយលទ្ធផល២ទល់នឹង១ ។
«រូបគេកាន់តែល្អឡើងៗ និងមានទម្រង់ល្អ។» អ្នកចាត់ការក្លិបបិសាចក្រហម Ole Gunnar Solkjaer និយាយបែបនេះក្នុងកិច្ចសម្ភាសជាមួយ Sky Sports ដោយសំដៅដល់ Paul Pogba ។ Solkjaer បន្ថែមថា Pogba លេងបានល្អនៅលើទីលាននាជំនួបទល់ក្លិប Aston Villa ដែលបិសាចក្រហមឈ្នះ ២ទល់នឹង ១ នៅយប់ថ្ងៃទី១ ខែមករា។
Anthony Martial និង Bruno Fernandez ធ្វើបានម្នាក់មួយគ្រាប់ឲ្យ Man Utd ខណៈគ្រាប់របស់ Villa ធ្វើបានដោយ Bertrand Traore ។ ជ័យជម្នះ រុញបិសាចក្រហមឲ្យឈរលេខពីរលើតារាង មាន៣៣ពិន្ទុស្មើក្រុមកំពូលតារាង Liverpool តែគ្រាប់បាល់ចំណេញតិចជាង។
លោក Solkjaer បានប្រាប់ Sky Sports ទៀតថា Pogba បង្ហាញទម្រង់លេងយ៉ាងល្អ Paul ដោយអាចបិទបាំងកីឡាករផ្សេងទៀត ដណ្តើមបាល់មកវិញ ហើយជួយនាំក្រុមលេងបានយ៉ាងល្អផងដែរ។ លោកក៏បានកោតសរសើរកីឡាករនៅក្នុងក្រុមទាំងមូលផងដែរនូវការបង្ហាញទម្រង់លេងយ៉ាងល្អរបស់ពួកគេនិងជួយដល់ក្រុមបានឡើងឈរលេខ២ នៅក្របខណ្ឌ Premier League ។
ខ្សែបម្រើសញ្ជាតិបារាំងរូបនេះ បានទទួលរងការវាយប្រហារខ្លាំង ក្រោយបង្ហាញទម្រង់លេងមិនបានល្អក្នុងពេលប៉ុន្មានខែថ្មីៗនេះ ពេលដែលរូបគេបានទទួលរងរបួស និងជំងឺកូវីដ-១៩ ផងនោះ។
ការប្រកួតបន្ទាប់របស់ក្រុមបិសាចក្រហមគឺ ពានរង្វាន់ league Cup ពាក់កណ្តាលផ្តាច់ព្រ័ត្រទល់នឹងក្រុម Manchester City នៅថ្ងៃទី៦ ខែមករា៕
© រក្សាសិទ្ធិដោយ thmeythmey.com