ជាតិ
លោក សាន សំណាង ប្ដូរពីអ្នកនាំភ្ញៀវទស្សនាតាមប្រាសាទ មកដាំបន្លែវិញ
× លោក សាន សំណាង រស់នៅភូមិត្រពាំងថ្នល់ ឃុំកន្ទ្រាំង ស្រុកប្រាសាទបាគង ខេត្តសៀមរាប ជាអតីតអ្នកផ្ដល់សេវាកម្មទេសចរណ៍ ដូចជាការនាំភ្ញៀវបរទេសទស្សនា នៅតាមប្រាសាទនានា ក្នុងខេត្តសៀមរាប។ មានវ័យ ៤១ឆ្នាំ បុរសមានស្រុកកំណើតក្នុងខេត្តសៀមរាប រូបនេះបានប្រាប់សារព័ត៌មានThmeyThmey25 តាមទូរសព្ទថា លោកធ្លាប់រកចំណូលដល់គ្រួសារប្រមាណ ១ពាន់ដុល្លារក្នុងមួយខែ តែត្រូវផ្អាកដោយសារវិបត្តិកូវីដ-១៩ រួចមកដាំបន្លែជាលក្ខណៈគ្រួសារជំនួសវិញ។
អ្នកខេត្តសៀមរាប រូបនេះបានប្រាប់ថា លោកមានការសោកស្ដាយជាខ្លាំង ដែលត្រូវផ្អាកការនាំភ្ញៀវទេសចរ ព្រោះការងារនេះ លោកបានចាប់ផ្ដើមតាំងពីឆ្នាំ២០១៧ មកម្លេះ។ ជាអ្នកដឹកភ្ញៀវផង និងជាអ្នកនាំភ្ញៀវទេសចរផង លោកត្រូវផ្អាកការងារនេះ ចាប់ពីដើមឆ្នាំ២០២០ ដែលធ្វើឲ្យសេដ្ឋកិច្ចគ្រួសាររបស់លោកមានការផ្ដាស់ប្ដូរ យ៉ាងខ្លាំង។ «មុនកូវីដ ធ្លាប់ឲ្យកូនទៅរៀនម្នាក់ ២ពាន់រៀល ត្រូវបន្ថយត្រឹម ១ពាន់រៀលវិញ ហើយក៏ត្រូវជំពាក់ធនាគារទៀត វាប៉ះពាល់ដល់សេដ្ឋកិច្ចខ្លាំង»។ នេះជាការលើកឡើងរបស់លោក សាន សំណាង ប្រាប់ThmeyThmey25។
លោក សំណាង បានប្រាប់ថា លោកដាំលើផ្ទៃដីតិចតួចប៉ុណ្ណោះប្រមាណ ១ពាន់ការ៉េ នៅជុំវិញផ្ទះរបស់លោកផ្ទាល់។ ក្រោយផ្ទុះខ្លាំងវីរុសកូរ៉ូណា លោកបានចាប់យកមុខរបរដាំបន្លែប្រភេទស្ពៃ និងសាលាដ ជាមធ្យមលោកអាចលក់បានក្នុងតម្លៃ ១ ០០០រៀលទៅ ១ ៥០០រៀលក្នុងមួយគីឡូក្រាម។ ដោយឡែកសម្រាប់ទីផ្សារវិញ មិនមានបញ្ហានោះទេ និងមានការគាំទ្រច្រើន ព្រោះលោកដាំបន្លែដោយមិនមានប្រើសារធាតុគីមី និងមានសុវត្ថិភាពដល់អ្នកបរិភោគ។
«ដ្បិតចំណូលនៃការដាំបន្លែជាលក្ខណៈគ្រួសារ មិនអាចប្រៀបនឹងការងារនាំភ្ញៀវ ទស្សនាតាមបណ្ដាប្រាសាទពិតមែន ប៉ុន្តែយ៉ាងហោចវាក៏ជួយដោះស្រាយជីវភាពគ្រួសារ ក្នុងអំឡុងវិបត្តិកូវីដនេះដែរ ហើយបើសិនស្ថានភាពវិលធម្មតា ហើយខ្ញុំអាចទៅធ្វើអ្នកនាំភ្ញៀវវិញ ក៏ខ្ញុំមិនបោះបង់ការដាំបន្លែនេះដែរ»។ នេះជាការបញ្ជាក់របស់អ្នកនាំភ្ញៀវវ័យ ៤១ឆ្នាំរូបនេះ។
លោក សាន សំណាង បានចាប់យករបរដាំបន្លែជាក្ខណៈគ្រួសារ ជំនួសការងារជាអ្នកដឹកភ្ញៀវ និងអ្នកនាំភ្ញៀវទេសចរ នៅតាមប្រាសាទនាពេលបច្ចុប្បន្ន ប៉ុន្តែលោកមិនបោះបង់ការងារជាអ្នកនាំភ្ញៀវនោះទេ ដោយសារតែពេញចិត្តនឹងការងារនេះជាខ្លាំង និងជាចំណង់ចំណូលចិត្តផងដែរ៕
,លោក សាន សំណាង (រូបមុខគេ) កាលពីនៅជាអ្នកនាំភ្ញៀវទេសចរ
រូបភាពពីលោក សាន សំណាង
© រក្សាសិទ្ធិដោយ thmeythmey.com