ជាតិ
គម្រោងអាកាសយានដ្ឋានខ្នាតតំបន់នៅមណ្ឌលគិរី សាងសង់លើផ្ទៃដីជាង៣០០ហិកតា
លោក ស៊ីន ចាន់សេរីវុត្ថា អ្នកនាំពាក្យអាកាសចរស៊ីវិល ថ្លែងក្នុងសន្និសីទសារព័ត៌មាន នៅទីស្តីការគណៈរដ្ឋមន្រ្តី កាលពីពាក់កណ្តាលខែមេសា ឆ្នាំ២០២០ ពាក់ព័ន្ធនឹងកិច្ចការរបស់រដ្ឋលេខាធិការអាកាសចរស៊ីវិល (រូបពីអង្គភាពអ្នកនាំពាក្យរដ្ឋាភិបាល)
×![]()
ភ្នំពេញ៖ រដ្ឋាភិបាលកម្ពុជា យល់ព្រមជាផ្លូវការហើយ ឲ្យក្រុមហ៊ុនឯកជន សិក្សាលើគម្រោងសាងសង់ព្រលានយន្តហោះខ្នាតតំបន់ ដែលមានទំហំទឹកប្រាក់ជិត១០០លានដុល្លារ ស្ថិតនៅភូមិពួហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី។ នេះបើតាម លោក ស៊ីន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល។ 
ក្នុងបទសម្ភាសជាមួយសារព័ត៌មានថ្មីៗ តាមទូរសព្ទ នៅថ្ងៃទី៣ ខែមករា ឆ្នាំ២០២១ លោក ស៊ីន ចាន់សេរីវុត្ថា មានប្រសាសន៍ថា ព្រលានយន្តហោះខ្នាតតំបន់នេះ មានទំហំទឹកប្រាក់ជិត ១០០លានដុល្លារ នឹងត្រូវសាងសង់លើផ្ទៃដីជិត៣០០ហិកតា។
យ៉ាងណា មិនទាន់អាចបញ្ជាក់បានទេថា ព្រលានយន្តហោះថ្មីនេះ នឹងត្រូវចាប់ផ្តើមសាងសង់នៅពេលណា ដោយលោក គ្រាន់តែប្រាប់ថា គម្រោងនេះកំពុងស្ថិតនៅដំណាក់ការសិក្សា។ អ្នកនាំពាក្យរូបនេះ ថ្លែងដូច្នេះថា៖«គ្រាន់តែយើងផ្ដល់សិទ្ធិឱ្យគេ [ក្រុមហ៊ុនឯកជន] សាងសង់ ពេលវេលាត្រូវការចរចា និងលក្ខខណ្ឌមានច្រើនទៀត។ ឥឡូវ យើងសិក្សាមិនទាន់ចប់ទេ យើងត្រូវការពេលប្រហែល៦-៨ខែ ទៀត ព្រោះសិក្សាចប់ទៅ យើងយកអាហ្នឹងមកចរចា វាមានច្រើនណាស់ សិក្សាពីប្រសិទ្ធភាពសេដ្ឋកិច្ច ប្រសិទ្ធភាពហិរញ្ញាវត្ថុ ហើយលក្ខខណ្ឌមួយចំនួនធំទៀត»។
នៅថ្ងៃទី៣១ ខែធ្នូ ឆ្នាំ២០២០ ទីស្តីការគណៈរដ្ឋមន្ត្រី បានចេញសេចក្តីជូនដំណឹង (សជណ) ស្តីពីការជ្រើសរើសយកក្រុមហ៊ុន Powerchina International Group ធ្វើជាដៃគូរបស់រដ្ឋាភិបាល ក្នុងការសិក្សាលើគម្រោងសាងសង់ព្រលានយន្តហោះថ្មីនេះ ដោយតម្រូវឲ្យក្រុមហ៊ុនឯកជននេះ។ សជណ បញ្ជាក់ថា រដ្ឋលេខាធិការអាកាសចរស៊ីវិល ជាអ្នកសិក្សាលើគម្រោងសាងសង់ព្រលានយន្តហោះថ្មីនេះ ហើយការចំណាយលើការសិក្សា គឺជាបន្ទុករបស់ក្រុមហ៊ុន Powerchina International Group។
សជណ បន្ថែមថា រដ្ឋលេខាធិការអាកាសចរស៊ីវិល ត្រូវដឹកនាំរៀបចំកិច្ចព្រមព្រៀងក្របខណ្ឌ ជាមួយក្រុមហ៊ុន ក្រុមហ៊ុន Powerchina International Group តាមនីតិវិធីជាធរមាន ដូចបានអនុវត្តកន្លងមក៕
Tag:
ប្រលានយន្តហោះ
មណ្ឌលគិរី
© រក្សាសិទ្ធិដោយ thmeythmey.com
