ក្រុមយុវសិស្ស និងនិស្សិតជាង១០ ទទួលបានជ័យលាភី និងពានរង្វាន់ក្នុងឆ្នាំ២០២០

ជាតិ

សង្គមជាតិ

ក្រុមយុវសិស្ស និងនិស្សិតជាង១០ ទទួលបានជ័យលាភី និងពានរង្វាន់ក្នុងឆ្នាំ២០២០

05, Jan 2021 , 7:59 am

រូបភាព

ដោយ:

ភ្នំពេញ៖ គិតពីខែមករា រហូតដល់ខែឆ្នូ ឆ្នាំ២០២០នេះ ក្រុមសិស្ស និងនិស្សិតជាង១០ក្រុម នៅតាមបណ្តាគ្រឹះស្ថានសិក្សាមួយចំនួន បានទទួលពានរង្វាន់ ក្នុងកម្មវិធីប្រកួតប្រជែងនានា ដែលរៀបចំឡើងដោយក្រសួងអប់រំ យុវជន និងកីឡា និងបណ្តាក្រសួងផ្សេងៗទៀត ។ ខាងក្រោមនេះជាក្រុមយុវសិស្ស និងនិស្សិតដែលទទួលបានពានរង្វាន់ក្នុងឆ្នាំ២០២០។

នាថ្ងៃទី៥ ខែកុម្ភៈ ក្រសួងការបរទេស និងប្រតិបត្តិការអន្តរជាតិនៃប្រទេសកម្ពុជា បានប្រកាសជ័យលាភីគូនិមិត្តសញ្ញា(logo) សម្រាប់កិច្ចប្រជុំកំពូលអាស៊ី-អឺរ៉ុបលើកទី១៣ដែលកម្ពុជាធ្វើជាម្ចាស់ផ្ទះ គឺបានទៅនិស្សិត សៀង ឆាយលី មកពីសកលវិទ្យាល័យភូមិន្ទវិចិត្រសិល្បៈ ដែលឈ្នះក្នុងចំណោមបេក្ខជនចំនួន២០០ទៅ៣០០នាក់។

និមិត្តសញ្ញានេះ គឺច្នៃចេញជាក្បាច់ខ្មែរទម្រង់ជា ជហ្វា ឬ ដងក្ដារ ដែលជាគ្រឿងដំបូល ឬផ្នែកខាងចុងនៃប្រាសាទ ព្រះវិហារ ឬសាលា មានទម្រង់ក្បាច់ខ្មែរ ដែលធ្លាប់បានប្រើប្រាស់គំរូចាស់ៗពីមុខមក។ ជហ្វា ក្នុងសាសនាសំដៅលើការបួងសួង សុំពរជ័យ ឡើងទៅលើមេឃ។ សញ្ញាLogo ពណ៌ក្រហម តំណាងឲ្យ តំបន់អាស៊ី ហើយពណ៌ខៀវ តំណាង សហព័ន្ធសហភាពអឺរ៉ុប។

នាទិវាវប្បធម៌ជាតិ៣មីនា ឆ្នាំ២០២០ លើកទី២២ បានរកឃើញជ័យលាភីលេខ១ លើវិញ្ញាសារបាំប្រពៃណីថ្នាក់ឧត្តមសិក្សាបានទៅលើនិស្សិតមកពីសាកលវិទ្យាល័យជាតិគ្រប់គ្រង។ ជ័យលាភីលេខ២ បានទៅលើនិស្សិតមកពីសកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងជ័យលាភីលេខ៣បានទៅលើនិស្សិតសកលវិទ្យាល័យកម្ពុជា។

សម្រាប់ជ័យលាភីលេខ១ ផ្នែកទម្រង់ល្ខោនមហោរី បានទៅលើសិស្សមធ្យមសិក្សាមកពីខេត្តបន្ទាយមានជ័យ។ ជ័យលាភីលេខ២បានទៅសិស្សមធ្យមសិក្សាមកពីខេត្តស្ទឹងត្រែង និងជ័យលាភីបានទៅលើសិស្សមធ្យមសិក្សាមកពីខេត្តមណ្ឌលគីរី។

សម្រាប់ជ័យលាភីលេខ១ផ្នែកទម្រង់ល្ខោនយីកេ បានទៅលើសិស្សមកពីខេត្តឧត្តរមានជ័យ។ ជ័យលាភីលេខ២បានទៅលើសិស្សមកពីខេត្តប៉ៃលិន និងជ័យលាភីលេខ៣បានទៅលើសិស្សមកពីខេត្តស្វាយរៀង។ ចំពោះជ័យលាភីលេខ១ផ្នែកទម្រង់ល្ខោនបាសាក់ បានទៅលើសិស្សមកពីខេត្តកំពង់ធំ ជ័យលាភីលេខ២បានសិស្សមកពីខេត្តកំពង់ស្ពឺ និងជ័យលាភីលេខ៣បានទៅលើសិស្សមកពីខេត្តកោះកុង។

ជ័យលាភីលេខ១ផ្នែកប្រកួតការតស៊ូមតិស្តីពីចំណេះដឹងវប្បធម៌ បានទៅនិស្សិតមកពីសកលវិទ្យាល័យជាតិគ្រប់គ្រង។ ជ័យលាភីលេខ២បានទៅនិស្សិតសកលវិទ្យាល័យប៊ែលធីអន្តរជាតិ និងជ័យលាភីលេខ៣បានទៅនិស្សិតសកលវិទ្យាល័យភ្នំពេញអន្តរជាតិ។

ក្រសួងអប់រំ យុវជន និងកីឡា បានរៀបចំកម្មវិធី និងជ្រើសរើសបេក្ខជនដែលតែងនិពន្ធ ស្មូតកំណាព្យ និងអានអត្ថបទ សម្រាប់អបអរទិវាអំណានជាតិលើកទី៥ ដែលប្រព្រឹត្តទៅនៅថ្ងៃទី១១ ខែមីនា ឆ្នាំ២០២០ ក្រោមប្រធានបទស្តីពី«ការអានបណ្តុះបញ្ញា ការស្រាវជ្រាវ និងនាវានុវត្តន៍»។

ក្រោយក្រសួងអប់រំ ជម្រុះអស់បេក្ខជនប្រឡងអស់ជាច្រើនរូប ក្រសួងក៏បានរកឃើញ និងប្រកាសជ័យលាភីតែងនិពន្ធ ស្មូតកំណាព្យ និងអានអត្ថបទទទួលបានពានរង្វាន់សម្តេចហ៊ុនសែនពីលេខ១ ដល់លេខ៣។ ជ័យលាភីលេខ១ផ្នែកតែងនិពន្ធបានទៅលើយុវសិស្សឈ្មោះ ហេង មៀនមៀន ជាសិស្សថ្នាក់ទី១២ នៃវិទ្យាល័យសម្តេចឪ ខេត្តតាកែវ។ សម្រាប់ជ័យលាភីលេខ២បានទៅលើយុវសិស្សថ្នាក់ទី១១ ងួន សុធារីកា នៃវិទ្យាល័យជាស៊ីមអង្គរជ័យ ខេត្តកំពត និងជ័យលាភីលេខ៣បានទៅលើ យុវសិស្ស កាន ស្រីនីត ថ្នាក់ទី១១ នៃវិទ្យាល័យមេសាង ខេត្តព្រៃវែង។

ជ័យលាភីលេខ១ផ្នែកស្មូតកំណាព្យបានទៅលើយុវសិស្ស គុណ គា ជាសិស្សប្រុសម្នាក់គត់ក្នុងចំណោមជ័យលាភីសិស្សស្រីទាំង៨នាក់។ គុណ គា ជាសិស្សថ្នាក់ទី៧ នៃអនុវិទ្យាល័យតេជោ កម្មករ ខេត្តព្រះសីហនុ ដែលស្មូតអំណាព្យមានចំណងជើងថា «និស្ស័យស្នេហ៍អំណាន» បានដណ្តើមជ័យលាភីលេខ១ លើសិស្សស្រី២នាក់ទៀត គឺ ហ៊ុន ធីតា បានជ័យលាភីលេខ២មកពីវិទ្យាល័យសុខអានថ្នល់បំបែក ខេត្តតាកែវ និង ជ័យលាភីលេខ៣ បានទៅលើយុវសិស្ស ខំ ឃុននី ជាសិស្សនៃវិទ្យាល័យហ៊ុនសែនសណ្តាន់ ខេត្តកំពង់ធំ ។

សម្រាប់ជ័យលាភីលេខ១ផ្នែកអានអត្ថបទបានទៅលើយុវសិស្ស នាង អេលីណា ជាសិស្សថ្នាក់ទី៦ នៃអនុវិទ្យាល័យឯកជនគ្រូយើង ខេត្តរតនគិរី ដែលអានអត្ថបទអំពីសេចក្តីថ្លៃថ្នូររបស់មនុស្ស។ ជ័យលាភីលេខ២ គឺឡុង សុដាវត្តី រៀនថ្នាក់ទី៦ នៃសាលាបឋមសិក្សាព្រុំសុនក្តីកណ្តាល ខេត្តព្រៃវែង និងជ័យលាភីលេខ៣ ជុស ស្រីធា ជាសិស្សថ្នាក់ទី៦មកពីសាលាបឋមសិក្សាកំពង់ស្លែង ខេត្តតាកែវ។

កម្មវិធីជជែកដេញដោលយុវជនជាតិ២០២០ ដែលរៀបចំឡើងដោយក្រសួងអប់រំ តាំងពីខែឧសភា ដល់ខែតុលា បានរកឃើញជ័យលាភីលេខ១ ដែលជាយុវសិស្សវិទ្យាល័យទួលទំពូង ជជែកដេញដោលលើប្រធានបទស្តីពី«ការបង្កើតសាលាជំនាន់ថ្មីគឺជាយន្តការដ៏មានប្រសិទ្ធភាពក្នុងការអភិវឌ្ឍសមត្ថភាពយុវជននាយុគសម័យបដិវត្តន៍ឧស្សាហកម្ម៤.០»ជាមួយក្រុមយុវសិស្សវិទ្យាល័យជាស៊ីមសាមគ្គី។

ក្រុមយុវសិស្សទាំងនោះទទួលបានថវិកាសរុបចំនួន៤លានរៀល។ ក្នុងម្នាក់ៗទទួលបានកុំព្យូទ័រយួរដៃមួយគ្រឿង មេដាយមាស និងលិខិតសរសើរ។

នាថ្ងៃទី៣ ខែតុលា ក្រុមនិស្សិតដែលមកពីវិទ្យាស្ថានជាតិពហុបច្ចេកទេសកម្ពុជា (NPIC) ទទួលបានជ័យលាភីលេខ១ ក្នុងកម្មវិធីប្រកួតប្រជែងរ៉ូបូតថ្នាក់ជាតិលើកទី៧ ឆ្នាំ២០២០។ ក្រុមនិស្សិតដែលទទួលបានជ័យលាភីលេខ១នេះ ក៏បានបន្តក្នុងកម្មវិធីប្រកួតរ៉ូប៉ូតអន្តរជាតិប្រចាំទ្វីបអាស៊ីនាថ្ងៃទី១២ ជាមួយ២១ក្រុមដែលពី១១ប្រទេសខុសៗគ្នានៅថ្ងៃទី១២ ខែឆ្នូ ឆ្នាំ២០២០ ដោយលទ្ធផលទទួលបានជ័យលាភីលេខ៥ស្ទួននឹងក្រុមថៃ និងវៀតណាម។

ក្នុងវិធីទិវាជជែកពិភាក្សាអំពីបរិស្ថាននៅខេត្តព្រះវិហារឆ្នាំ២០២០នាថ្ងៃទី១៣ ខែតុលា ដែលបានរៀបចំឡើងនៅខេត្តព្រះវិហារ បានរកឃើញជ័យលាភីលេខ១ ដល់លេខ៤ ដោយជ័យលាភីលេខ១ បានទៅលើក្រុមយុវសិស្សវិទ្យាល័យជាស៊ីមត្បែងមានជ័យខេត្តព្រះវិហារ។ លេខ២ បានទៅលើក្រុមយុវសិស្សវិទ្យាល័យ ប៊ុនរ៉ានី ហ៊ុនសែនវត្និង លេខ៣បានទៅលើក្រុមវិទ្យាល័យច្បារអំពៅ និងជ័យលាភីលេខ៤បានទៅវិទ្យាល័យជាស៊ីមសាមគ្គី។

យុវសិស្សថ្នាក់ទី១១ចំនួន២នាក់ នៅវិទ្យាល័យហ៊ុនសែនកំពង់ចាម បានទទួលជ័យលាភីលេខ២ក្នុងការបង្កើតApp«ឆ្លើយសំណួរពីរបៀបប្រើប្រាស់ទឹកស្អាត និងអនាម័យ» ក្នុងកម្មវិធីប្រកួតប្រជែងអន្តរជាតិផ្នែកបច្ចេកវិទ្យាe-ICONលើកទី១១ ដែលរៀបចំឡើងតាមអនឡាញដោយក្រសួងអប់រំសាធារណៈរដ្ឋកូរ៉េកាលពីថ្ងៃទី៩ ខែកញ្ញា ក្នុងចំណោម១០ក្រុមដែលមកពីប្រទេសចំនួន៨។

សម្រាប់យុវជនក្រុមColor Wheel ក៏ទទួលបានជ័យលាភីលេខ១ក្នុងការផលិតស្នាដៃគំនូរជីវចល ដែលមានចំណងជើងថា«ថ្ងៃនេះសម្រាប់ស្អែក» ក្នុងកម្មវិធីប្រកួតប្រជែងគំនូរជីវចលថ្នាក់ជាតិលើកទី៧ ឆ្នាំ២០២០។ ក្រុមនោះក៏បានបន្តប្រកួតជាមួយក្រុមដែលមកពីបណ្តាប្រទេសដទៃទៀតតាមអនឡាញនៅប្រទេសជប៉ុន។

កាលពីថ្ងៃទី៦ ខែវិច្ឆិកា ក្រសួងអប់រំក៏បានប្រកាសជ័យលាភីលេខ១ ផ្នែកប្រកួតប្រជែងផែនការអាជីវកម្មដែលស្តីពីប្រធានបទ«អាជីវកម្មខ្ញុំ Our business» បានទៅលើក្រុមនិស្សិតដែលមកពីដេប៉ាតឺម៉ង់វិស្វកម្មជីវសាស្ត្រ-Bio Engineering នៃសាកលវិទ្យាល័យភូមិន្ទភ្នំពេញ។

ក្រុមនិស្សិតសកលវិទ្យាល័យភូមិន្ទភ្នំពេញបានជ័យលាភីលេខ១ លើការច្នៃដើមគរធ្វើជាសាប៊ូលាងចាន លើក្រុមអាជីវកម្មចំនួន៤ផ្សេងទៀត។ ក្រុមជ័យលាភីលេខ១នេះ ទទួលបានពានមាសពីរដ្ឋមន្ត្រីក្រសួងអប់រំ យុវជន និងកីឡា៕