ជាតិ
ក្រៅពីស្រូវ កម្ពុជាបាននាំចេញផលិតផលដំណាំ ជាង២ពាន់លានដុល្លារ ទៅក្រៅប្រទេស
×![]()
ដោយ: ផាត ដាណេ
ភ្នំពេញ៖ រយៈពេល១ឆ្នាំនៃវិបត្តិកូវីដ-១៩ កម្ពុជាបាននាំចេញផលិតផលកសិកម្មជាង៩លានតោន ក្រៅពីដំណាំស្រូវ ទៅក្រៅប្រទេស ដែលសរុបជាប្រាក់ចំនួន២,១៧ពាន់លានដុល្លារអាមេរិក។ នេះបើតាមហ្វេសប៊ុកលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
លោករដ្ឋមន្ត្រីក្រសួងកសិកម្ម បានបញ្ជាក់ថា ផលិតផលកសិកម្ម ដែលនាំចេញទាំងនោះ រួមមាន ដំឡូងមី ស្វាយចន្ទី ស្វាយ ចេកអំបូងលឿង មៀនប៉ៃលិន ម្រេច រួមទាំងដំណាំមួយចំនួនផ្សេងទៀតផងដែរ។
បើតាមលោក វេង សាខុន កម្ពុជា បាននាំចេញដំឡូងមី ជាង៧លានតោន សរុបទឹកប្រាក់ជាង១ពាន់លានដុល្លារអាមេរិក, ស្វាយចន្ទី បាននាំចេញចំនួន ២៣០ ៩៨១តោន, ដំណាំស្វាយ នាំចេញជាង៩០ម៉ឺនតោន,ចេកអំបូងលឿង នាំចេញចំនួន៣៣៣, ១៤៣តោន, ដំណាំមៀនប៉ៃលិន នាំចេញជាង១០ម៉ឺនតោន។ ចំណែកដំណាំម្រេច បាននាំចេញជាង៥ពាន់តោន និងដំណាំផ្សេងទៀត ជាង៥០ម៉ឺនតោន។
លោក វេង សាខុន បានបញ្ជាក់ថា តម្លៃនៃការនាំចេញផលិតផលសរុបជាប្រភេទដំណាំទាំងនេះ ក្រៅពីស្រូវនោះ មានទឹកប្រាក់ ២,១៧ ពាន់លាន ដុល្លារអាមេរិក។ ប៉ុន្តែបើនិយាយពីបរិមាណផលិតផលសរុបនៃកសិកម្មឆ្នាំនេះវិញ គឺមាន ១៨ ៤៧២ ៨២៥ តោន ដែលមានតម្លៃផលិតផលដំណាំសរុប ក្រៅពីស្រូវ ចំនួនជាង ៤,៤៩ ពាន់លានដុល្លារ។ នេះបើតាមរដ្ឋមន្ត្រីកសិកម្ម៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
