រដ្ឋាភិបាលថៃ នៅថ្ងៃទី៤ ខែមករា បានបញ្ជាក់ថា ថៃមានករណីឆ្លងកូវីដ-១៩ ប្រចាំថ្ងៃចំនួន ៧៤៥ករណី និងអ្នកស្លាប់ចំនួន ១នាក់។ ភាគច្រើននៃករណីឆ្លង គឺជាករណីឆ្លងនៅក្នុងស្រុក។ ស្របពេលករណីឆ្លងកំពុងហក់ឡើង ថៃក៏ត្រៀមទទួលវ៉ាក់សាំងពីក្រុមហ៊ុនចិន និងក្រុមហ៊ុនAstraZeneca ផងដែរ។
មួយរយៈចុងក្រោយនេះ ករណីឆ្លងកូវីដ-១៩ នៅថៃ បានហក់ឡើងយ៉ាងខ្លាំង ស្របពេលវិធានការរឹតត្បិត ត្រូវបានរដ្ឋាភិបាលថៃ ដាក់ចេញជាបន្តបន្ទាប់។ នៅថ្ងៃទី៤ ខែមករា ថៃមានករណីឆ្លង ៧៤៥ករណី និងអ្នកស្លាប់មានចំនួន ១នាក់។ ក្នុងចំណោមនោះ ៧០៩ករណី គឺជាឆ្លងនៅក្នុងស្រុក ដោយ ៥៥៧ករណីជាពលករចំណាកស្រុក និង ១៥២ករណី ជាប្រជាជនថៃ។
ចំនួននេះ មានអត្រាឆ្លងខ្ពស់បំផុត បើគិតចាប់តាំងពីផ្ទុះកូវីដ-១៩ នៅក្នុងផ្សារលក់បង្គា ក្នុងខេត្តសមុទ្រសាគរ នាពេលកន្លងមក។ តួលេខសរុប ថៃមានករណីឆ្លងចំនួន ៨៤៣៩ករណី និងអ្នកស្លាប់មានចំនួន ៦៥នាក់។ ចំណែកអ្នកជាសះស្បើយមានចំនួន ៤៣៥២នាក់។
តាមការចុះផ្សាយរបស់កាសែតបាងកកប៉ុស្តិ៍ ថៃនឹងទទួលវ៉ាក់សាំងប្រឆាំងកូវីដ-១៩ ចំនួន ២លានដូស ពីក្រុមហ៊ុនចិន Sinovac នៅក្នុងខែកុម្ភៈ ខាងមុខ ដែលជាផ្នែកមួយនៃការទប់ស្កាត់ការរាតត្បាតរបស់កូវីដ-១៩ នៅក្នុងប្រទេស។ ការដឹកជញ្ជូននេះ នឹងធ្វើឡើងចំនួន ៣ដំណាក់កាល។ ក្នុងដំណាក់កាលមួយ ចិននឹងដឹកវ៉ាក់សាំង ២០ម៉ឺនដូស នៅក្នុងខែកុម្ភៈ ហើយនៅដំណាក់កាលទីពីរ ចិន នឹងដឹកចំនួន ៨០ម៉ឺនដូសឲ្យថៃ នៅក្នុងមីនា។ ដំណាក់កាលចុងក្រោយគឺ ១លានដូស នៅក្នុងខែមេសាខាងមុខ។
ជាមួយគ្នានេះ ថៃ ត្រូវបានរំពឹងថា អាចចាប់ផ្តើមផលិតវ៉ាក់សាំងប្រឆាំងកូវីដ-១៩ ក្នុងស្រុកផងដែរ ដែលវ៉ាក់សាំងផលិតនៅថៃនោះ ត្រូវបានអភិវឌ្ឍដោយក្រុមហ៊ុនAstraZeneca ដោយមានភ្ជាប់ជាមួយកិច្ចព្រមព្រៀងរួមគ្នាលើការផ្ទេរបច្ចេកវិទ្យា ក្នុងការផលិតវ៉ាក់សាំង។
កន្លងមករដ្ឋាភិបាលថៃ បានដាក់គោលដៅចាក់វ៉ាក់សាំងប្រឆាំងកូវីដ-១៩ លើប្រជាជនខ្លួនឲ្យបាន ៣៣លាននាក់ ឬ ៥០ភាគរយនៃប្រជាជនសរុប នៅត្រឹមដំណាច់ឆ្នាំ២០២១។
គិតត្រឹមថ្ងៃទី៣ ខែមករា ខេត្តថៃ ដែលស្ថិតក្នុងតំបន់ក្រហម បានកើនដល់ ២៨ខេត្តក្រុងហើយ។ ជាផ្នែកមួយនៃការទប់ស្កាត់ការរាតត្បាតកូវីដ-១៩ ថៃបានដាក់ចេញវិធានការថ្មីបន្ថែមទៀត នៅក្នុងខេត្តក្រុងទាំង ២៨ នេះ។ នៅក្នុងបទបញ្ជាដែលបោះពុម្ភក្នុងព្រះរាជកិច្ច ថៃបានហាមឃាត់មិនឲ្យចូលទៅក្នុងអាគារ ឬតំបន់ដែលមានករណីឆ្លងខ្ពស់។ សាលារៀន ឬវិទ្យាស្ថាន ហាមគ្រប់សកម្មភាពទាំងអស់។ សកម្មភាព សម្រាប់ជាប្រយោជន៍សាធារណៈ ត្រូវមានការអនុញ្ញាតពី អភិបាលខេត្ត និងហាមឃាត់សកម្មភាពផ្សេងទៀត។
សូមបញ្ជាក់ថា ថៃ ក៏កំពុងពិចារណាលើការហាមឃាត់អ្នកដំណើរជនជាតិអង់គ្លេស ចូលមកក្នុងប្រទេសថៃផងដែរ បន្ទាប់ពីអាជ្ញាធរសុខាភិបាល បានរកឃើញកូរ៉ូណាវីរុស ដែលវិវដ្ដជាទម្រង់ថ្មី VUI–202012/01 លើជនជាតិអង់គ្លេសចំនួន ៤នាក់។ អ្នកទាំងនោះ បានចូលមកថៃនៅថ្ងៃទី២១ ខែធ្នូ កន្លងទៅ៕