COVID-19
អន្តរជាតិ
លោក ឌូទើតេ ថា ក្រុមអង្គរក្សចាក់វ៉ាក់សាំងកូវីដ-១៩ ដែលគ្មានការអនុញ្ញាតដើម្បីការពារខ្លួន
ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ។ រូបភាព៖ ការិយាល័យទំនាក់ទំនងប្រធានាធិបតី
×![]()
ដោយ: ធៀន ភារិន្ទ
ប្រធានាធិបតីហ្វីលីពីន លោក រ៉ូឌ្រីហ្គោ ឌូទើតេ នៅថ្ងៃទី៤ ខែមករាបានប្រើពាក្យធ្ងន់ៗដាក់សមាជិកព្រឹទ្ធសភាដែលចង់កោះហៅក្រុមសន្តិសុខប្រធានាធិបតីទៅសួរនាំពាក់ព័ន្ធការចាក់វ៉ាក់សាំងដែលមិនទាន់ទទួលបានការអនុញ្ញាត។ បើតាមលោក ឌូទើតេ ការចាក់វ៉ាក់សាំងទាំងនោះ ជាការពារខ្លួន និងការពាររូបលោកប៉ុណ្ណោះ។ 
ថ្មីៗនេះ រដ្ឋមន្ត្រីមហាផ្ទៃហ្វីលីពីន លោក Eduardo Ano បានអះអាងថា សមាជិកគណៈរដ្ឋមន្ត្រីខ្លះ និងក្រុមសន្តិសុខប្រធានាធិបតី រ៉ូឌ្រីហ្គោ ឌូទើតេ បានចាក់វ៉ាក់សាំងប្រឆាំងកូវីដ-១៩ រួចហើយ ស្របពេលវ៉ាក់សាំងទាំងនោះ មិនទាន់ត្រូវបាននិយ័តករឱសថក្នុងស្រុកទទួលស្គាល់ឡើយ។ មេបញ្ជាការកងអង្គរក្សប្រធានាធិបតី លោក Jesus Durante និយាយថា ក្រុមអង្គរក្ស បានទទួលការចាក់វ៉ាក់សាំងតាំងពីដើមខែកញ្ញាមកម្លេះ ប៉ុន្តែមិនបញ្ជាក់ថា ប្រើប្រាស់វ៉ាក់សាំងណាឡើយ។
លោក Franklin Drilon សមាជិកព្រឹទ្ធសភា នៅថ្ងៃទី៣១ ខែធ្នូ កន្លងទៅ បានលើកឡើងថា មេបញ្ជាការ PSG គួរតែត្រូវកោះហៅមកបំភ្លឺនៅក្នុងព្រឹទ្ធសភា ជុំវិញការចាក់វ៉ាក់សាំង ដែលមិនទាន់ទទួលបានការអនុញ្ញាតលើកងអង្គរក្សប្រធានាធិបតី។ នេះបើតាមការចុះផ្សាយរបស់កាសែត Inquirer ។
លោកប្រធានាធិបតី ឌូទើតេ តបទៅលោក Drilon វិញថា កុំចង់មកពាក់ព័ន្ធជាមួយក្រុមអង្គរក្សរបស់លោក ព្រោះការចាក់វ៉ាក់សាំងនេះ គ្រាន់តែជាការការពារខ្លួនពីកូវីដ-១៩ ប៉ុណ្ណោះ គ្មានអ្វីលើសពីនេះឡើយ។ ទន្ទឹមនេះ ប្រមុខរដ្ឋហ្វីលីពីនរូបនេះ បានបន្តថា ប្រសិនជាហ៊ានហៅកងអង្គរក្សចូលបំភ្លឺក្នុងសភា វានឹងមានបញ្ហាតិចតួចមួយចំនួន។
«តាមខ្ញុំយល់ ពួកគេធ្វើនេះ គឺដើម្បីប្រយោជន៍សម្រាប់ជីវិតគេ»។ លោក ឌូទើតេ បានពន្យល់បែបនេះ ដោយបន្ថែមថា បើសិនបើក្រុមសន្តិសុខប្រធានាធិបតីត្រូវបំភ្លឺនៅក្នុងសភាមែននោះ លោកនឹងប្រាប់មិនឲ្យអ្នកទាំងនោះនិយាយអ្វីទាំងអស់។ លោកថែមទាំងអះអាងថា អង្គរក្សលោក បានបំពេញកាតព្វកិច្ចរបស់ខ្លួន តាមរយៈការចាក់វ៉ាក់សាំង ដើម្បីការពារប្រធានាធិបតីប៉ុណ្ណោះ ហើយអ្វីៗ សុទ្ធតែមានចែងនៅក្នុងច្បាប់។
សូមបញ្ជាក់ថា នៅថ្ងៃទី៤ ខែមករា ហ្វីលីពីន មានករណីឆ្លងចំនួន ៩៥៩ករណី និងអ្នកស្លាប់ចំនួន ៦នាក់។ តួលេខសរុប ហ្វីលីពីនមានអ្នកឆ្លងកូវីដ-១៩ ចំនួន ៤៧៨៧៦១ករណី អ្នកស្លាប់មានចំនួន ៩២៦៣នាក់។ ចំណែកអ្នកជាសះស្បើយមានចំនួន ៤៤៨២៧៩នាក់៕
Tag:
ហ្វីលីពីន
កូវីដ-១៩
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 4 ថ្ងៃ
