COVID-19
អន្តរជាតិ
លោកនាយករដ្ឋមន្រ្តីថៃ ប្រាយុទ្ធ ចន្ទអូចា។ រូបភាព៖ វិមានរដ្ឋាភិបាលថៃ
×![]()
ដោយ: ធៀន ភារិន្ទ
ថៃ នៅថ្ងៃទី៦ ខែមករា បានប្រកាសថា មានករណីឆ្លងកូវីដ-១៩ ចំនួន ៣៦៥ករណី និងអ្នកស្លាប់ចំនួន ១នាក់។ ករណីឆ្លងនេះ បានធ្លាក់ចុះច្រើន បើធៀបនឹងប៉ុន្មានថ្ងៃមុន។ ទន្ទឹមគ្នានេះដែរ រដ្ឋាភិបាលថៃ បានបញ្ជាទិញវ៉ាក់សាំងពីក្រុមហ៊ុនឱសថAstraZeneca ជាច្រើនលានដូសបន្ថែមទៀត សម្រាប់ចាក់ឲ្យប្រជាជនខ្លួន ដែលជាផ្នែកមួយនៃការទប់ស្កាត់ការរាតត្បាតកូវីដ-១៩។ 
ប៉ុន្មានថ្ងៃចុងក្រោយនេះ ស្ថានការណ៍កូវីដ-១៩ ហាក់ដូចជាធូរស្រាលបន្តិច ដោយសារករណីឆ្លងបន្តធ្លាក់ចុះ។ យ៉ាងណាក៏ដោយ រដ្ឋាភិបាលនៅតែបន្តចាត់វិធានការយ៉ាងរឹតត្បិត ដើម្បីបង្ការករណីឆ្លងហក់ឡើងជាថ្មី។ នៅថ្ងៃទី៦ ខែមករា ថៃមានករណីឆ្លងចំនួន ៣៦៥ករណី និងអ្នកស្លាប់ ១នាក់ ដែលចំនួននេះ គឺធ្លាក់ចុះមួយភាគធំ បើធៀបនឹងប៉ុន្មានថ្ងៃមុន។ នៅថ្ងៃទី៤ ខែមករា ថៃមានករណីឆ្លង ៧៤៥ករណី និងថ្ងៃទី៥ ខែមករា មានចំនួន ៥២៧ករណី។
តួលេខកូវីដ-១៩ សរុប ថៃមានចំនួន ៩៣៣១ ករណី និងអ្នកស្លាប់មានចំនួន ៦៦ នាក់។ ចំណែកអ្នកជាសះស្បើយមានចំនួន ៤៤១៨នាក់។
ក្នុងករណីឆ្លងថ្មីនេះ អ្នកឆ្លងក្នុងស្រុកមានចំនួន ៣៤៩នាក់ និងអ្នកឆ្លងមកពីក្រៅប្រទេសមានចំនួន ១៦នាក់ ដោយខេត្តជលបុរី មានករណីឆ្លងច្រើនជាងគេ បន្ទាប់ពីខេត្តសមុទ្រសាគរ និងទីក្រុងបាងកក។ នេះបើតាមការចុះផ្សាយរបស់កាសែតបាងកកប៉ុស្តិ៍។
ដើម្បីសម្រេចគោលដៅរបស់ខ្លួន ដែលត្រូវចាក់វ៉ាក់សាំងប្រឆាំងកូវីដ-១៩ លើប្រជាជនចំនួន ៥០ភាគរយនៃប្រជាជនសរុប នៅត្រឹមបំណាច់ឆ្នាំ២០២១ ថៃបានសម្រុកទិញវ៉ាក់សាំងជាបន្តបន្ទាប់។ នៅក្នុងខែវិច្ឆិកា ឆ្នាំ ២០១៩ ថៃ បានទិញវ៉ាក់សាំងAstraZeneca ចំនួន ២៦លានដូស។ នៅថ្ងៃទី៤ មករា ថៃ បានចុះកិច្ចព្រមព្រៀងទិញវ៉ាក់សាំងពីក្រុមហ៊ុនចិនSinovac ពីរលានដូស។ នៅថ្ងៃទី៥ ខែមករា ថៃ បានចុះកិច្ចព្រមព្រៀងជាមួយក្រុមហ៊ុនឱសថAstraZeneca ទិញវ៉ាក់សាំងប្រឆាំងកូវីដ-១៩ ចំនួន ៣៥លានដូសបន្ថែមទៀត។
មិនត្រឹមតែទិញវ៉ាក់សាំងប៉ុណ្ណោះទេ ថៃក៏បានចុះកិច្ចព្រមព្រៀងជាមួយក្រុមហ៊ុន AstraZenca ដើម្បីផលិតវ៉ាក់សាំងប្រឆាំងកូវីដ-១៩ នៅក្នុងស្រុកផងដែរ។
បើតាមអ្នកនាំពាក្យរដ្ឋាភិបាលថៃ លោកAnucha Burapachaisri វ៉ាក់សាំងទិញពីក្រុមហ៊ុនSinovac ដែលនឹងដឹកមកដល់ខែកុម្ភៈខាងមុខ នឹងចាក់ភ្លាមៗលើគ្រូពេទ្យព្យាបាលអ្នកជំងឺកូវីដ-១៩ និងអ្នកប្រឈមគ្រោះថ្នាក់ខ្លាំងពីកូវីដ-១៩ ។ វ៉ាក់សាំងចំនួនSinovac ចំនួនពីរលានដូសនេះ ត្រូវបានចិន និង រដ្ឋបាលថ្នាំពេទ្យ និងអាហារថៃ អនុញ្ញាតឲ្យប្រើប្រាស់រួចហើយ។
គិតមកទល់ពេលនេះ ថៃបានចុះកិច្ចព្រមព្រៀងទិញវ៉ាក់សាំងបានជាង ៦០លានដូសរួចហើយ ដោយក្រសួងសុខាភិបាលថៃ គ្រោងចាប់ផ្តើមយុទ្ធនាការចាក់វ៉ាក់សាំងប្រឆាំងកូវីដ-១៩ លើប្រជាជនខ្លួន នៅខែឧសភាខាងមុខ។ ថៃមានប្រជាជនសរុបប្រមាណ ៦៩លាននាក់។
បើទោះបីជាទិញវ៉ាក់សាំងបានជាង ៦០លានដូសរួចហើយមែន ប៉ុន្តែលោក Opas Karnkawinpong ប្រធាននាយកដ្ឋានគ្រប់គ្រងជំងឺឆ្លង (DDC) បានព្រមានថា បើទោះបីជាវ៉ាក់សាំងជាក្តីសង្ឃឹមនៃការស្តារសេដ្ឋកិច្ចឡើងវិញមែន តែការរឹតត្បិតមិនអាចដកបានភ្លាមៗទេ ហើយវ៉ាក់សាំងក៏មិនមែនជាអាវុធតែមួយ ក្នុងការប្រយុទ្ធជាមួយកូវីដ-១៩ ដែរ។
ស្របពេលប្រទេសជាច្រើនដូចជាកូរ៉េខាងត្បូង ឥណ្ឌា វៀតណាម បិទជើងហោះហើរជាមួយអង់គ្លេសក៏ដោយ ក្រសួងការបរទេសថៃ បានប្រកាសថា មិនមានការបិទជើងហោះហើរ ជុំវិញអ្នកដំណើរមកពីអង់គ្លេសឡើយ ប៉ុន្តែអ្នកដំណើរមកពីបរទេសទាំងអស់ ត្រូវដាក់ចត្តាឡីស័ករយៈពេល ១៤ថ្ងៃ និងមានឯកសារបញ្ជាក់ថាគ្មានកូវីដ-១៩ បន្ថែម។
សូមបញ្ជាក់ថា អាជ្ញាធរថៃ បានប្រាប់ទៅសាលារៀនរដ្ឋ និងឯកជនទាំងអស់ នៅក្នុងតំបន់មានករណីឆ្លងកម្រិតខ្ពស់ ដែលមានខេត្តចំនួន២៧ និងក្រុងបាងកក ឲ្យបិទសាលា និងប្តូរទៅរៀនអនឡាញវិញរហូតដល់ ដំណាច់ខែមករា ដើម្បីទប់ស្កាត់ការរាតត្បាតកូរ៉ូណាវីរុសនៅក្នុងប្រទេស៕
Tag:
ថៃ
កូវីដ-១៩
© រក្សាសិទ្ធិដោយ thmeythmey.com
