ភ្នំពេញ៖ វិទ្យាល័យហ៊ុនសែនបូរី១០០ខ្នង ដែលធ្លាប់ដាក់អ្នកចត្តាឡីស័កកន្លងមក អាចបើកដំណើរការឡើងវិញ និងបើកបវេសនកាលឆ្នាំសិក្សាថ្មី នៅថ្ងៃទី១១ ខែមករា ឆ្នាំ២០២១។ នេះបើតាមលោក រស់ សុវាចា អ្នកនាំពាក្យក្រសួងអប់រំ ដែលបញ្ជាក់ប្រាប់អ្នកសារព័ត៌មានថ្មីៗតាមតេឡេក្រាម។
លោក រស់ សុវាចា អ្នកនាំពាក្យក្រសួងអប់រំបានបញ្ជាក់ថា ក្រសួងអប់រំបានអនុញ្ញាតឲ្យវិទ្យាល័យហ៊ុនសែនបូរី១០០ខ្នងបើកដំណើរការឡើងវិញ បន្ទាប់ពីមានការបាញ់ថ្នាំសម្លាប់មេរោគរួចរាល់។ អ្នកនាំពាក្យរូបនេះបញ្ជាក់ថា អ្នកកំពុងតែធ្វើចត្តាឡីស័កនៅវិទ្យាល័យសម្តេចហ៊ុនសែនបុរី១០០ខ្នងត្រូវបានផ្ទេរទៅមណ្ឌលចត្តាឡីស័កថ្មីតាមការគ្រោងទុកហើយ។
ចំពោះអនុវិទ្យាល័យ និងបឋមសិក្សាហ៊ុនសែនពោធិ៍ចិនតុង ដែលជាគោលដៅសម្រាប់ដាក់អ្នកចត្តាឡីស័កផងដែរនោះ ក្រសួងអប់រំមិនទាន់អាចអនុញ្ញាតឲ្យបើកដំណើរការឡើងវិញឡើយ។ នេះជាការលើកឡើងរបស់លោក រស់ សុវាចា ដែលបានថ្លែងដូច្នេះថា៖«អនុវិទ្យាល័យនិងបឋមសិក្សាហ៊ុនសែនពោធិ៍ចិនតុងនឹងចូលរៀនថ្ងៃ១១ មករា ២០២១នៅសាលារៀនមានទីតាំងក្បែរសាលារបស់ខ្លួនសិន»។
បើតាមលោក រស់ សុវាចា សាលារៀនមួយចំនួនទៀត ដែលធ្លាប់ដាក់អ្នកចត្តាឡីស័ក នឹងអាចបើកបវេសនកាលឆ្នាំសិក្សាថ្មីវិញផងដែរ។ ប៉ុន្តែសាលារៀនទាំងនោះ នឹងត្រូវបោសសំអាត និងបាញ់ថ្នាំសម្លាប់មេរោគនៅជុំវិញបរិវេណសាលា និងថ្នាក់រៀន។
លោក រស់ សុវាចា បានថ្លែងដូច្នេះថា៖«សាលារៀនមួយចំនួនតូចដែលធ្លាប់បានប្រើប្រាស់ជាមណ្ឌលចត្តាឡីស័កត្រូវមានការសម្អាតរម្ងាប់មេរោគឲ្យបានរួចរាល់តាមវិធានការក្រសួងសុខាភិបាល និងបន្តអនុវត្តន៍គោលការណ៍ប្រតិបត្តិស្តង់ដាSOP របស់ក្រសួងអប់រំ យុវជន និងកីឡា មុនការបើកបវេសនកាលឆ្នាំសិក្សា២០២០-២០២១ នៅថ្ងៃ១១ មករា ២០២១ តាមទិដ្ឋភាពជាក់ស្តែង»។
ដោយឡែកសាលារៀនផ្សេងទៀត ដែលដាក់អ្នកចត្តាឡីស័កដែលជាកម្មករមកពីប្រទេសថៃនៅក្នុងខេត្តប៉ៃលិន បាត់ដំបង បន្ទាយមានជ័យ និងឧត្តរមានជ័យ មិនទាន់អាចអនុញ្ញាតឲ្យបើកដំណើរការទាំងស្រុងនៅឡើយទេ។ នេះបើការអះអាងរបស់មន្រ្តីនិងអភិបាលខេត្តនៃខេត្តខាងលើ។
លោក យី សុងគី ប្រធានមន្ទីរអប់រំ យុវជន និងកីឡាខេត្តបាត់ដំបង បានបញ្ជាក់ថា សាលារៀនចំនួន៨ដែលកំពុងតែដាក់អ្នកចត្តាឡីស័កលើពលករមកពីប្រទេសថៃ មិនទាន់អាចបើកដំណើរការវិញឡើយ។ បើតាម លោក យី សុងគី សិស្សានុសិស្សប្រមាណ៦ពាន់នាក់ ដែលសិក្សានៅសាលារៀនទាំង៩នោះ នឹងផ្ទេរទៅរៀននៅតាមសាលាផ្សេង និងបន្តរៀនតាមអនឡាញវិញ។
«សម្រាប់ថ្ងៃបើកបវសនកាលថ្ងៃទី១១ ហ្នឹងសាលារៀនទាំងនោះមិនទាន់អាចបើកដំណើរកើតទេ។ ប៉ុន្តែនឹងមានសាលាជាបន្តបន្ទាប់ នៅថ្ងៃទី១៨ នឹងអាចដំណើរការកើត ដោយសារតែការធ្វើចត្តាឡីស័ករបស់ពលករខ្លះគ្រប់១៤ថ្ងៃអាចនឹងជិតចប់។ អ៊ីចឹងយើងទុកពេល២ ទៅ៣ថ្ងៃដើម្បីទុកឲ្យបោសសម្អាត។ សាលាមួយចំនួនគឺដូចៗគ្នា នៅពេលដែលអស់ពលករ គឺយើងចាប់ផ្តើមរៀបចំឲ្យសិស្សចូលរៀនវិញ»។ នេះជាការបញ្ជាក់របស់លោក យី សុងគី។
ចំពោះសាលារៀនចំនួន១០ដែលស្ថិតនៅក្នុងខេត្តឧត្តរមានជ័យ និងសាលារៀន៩ទៀត នៅខេត្តបន្ទាយមានជ័យ ដែលកំពុងតែដាក់អ្នកចត្តាឡីស័កពលករមកពីប្រទេសថៃ ក៏មិនទាន់អាចបើកដំណើរការឡើងវិញដែរ។ បើតាមអាជ្ញាធរតាមខេត្តទាំងនេះ ការមិនទាន់បើកដំណើរការវិញនេះ ដោយសារតែពលករខ្មែរជាច្រើនពីថៃ នៅតែសម្រុកមកកម្ពុជា។
ចំណែកសាលារៀននៅក្នុងខេត្តប៉ៃលិនទាំងអស់ នឹងគ្រោងបើកដំណើរការឡើងវិញ។ នេះជាការបញ្ជាក់របស់លោកស្រី បាន ស្រីមុំ អភិបាលខេត្តប៉ៃលិន ដោយបានបន្ថែមថា ពលករខ្មែរមកពីថៃទាំងអស់ កំពុងតែធ្វើចត្តាឡីស័កនៅតាមផ្ទះសំណាក់ និងមន្ទីរបក្ស៕