នៅថ្ងៃទី៧ មករា សមាជិកគណៈរដ្ឋមន្ត្រីអាមេរិក មួយចំនួនកំពុងពិភាក្សាពីការដកតំណែងលោកប្រធានាធិបតីដូណាល់ ត្រាំ។ ប្រព័ន្ធផ្សព្វផ្សាយអាមេរិកផ្សាយបែបនេះក្រោយការច្របូកច្របល់នៅវិមានកាពីតូល ទីដែលសមាជិកសភាទាំងពីរថ្នាក់កំពុងប្រជុំដើម្បីបញ្ជាក់ជ័យជម្នះរបស់លោក ចូ បៃឌិន ។ យ៉ាងណាមិញ ការព្យាយាមដកតំណែងលោក ត្រាំ ពេលនេះ ទំនងជាពិបាកកើតឡើង ខណៈអាណត្តិប្រធានាធិបតីរបស់លោកកាន់តែខើចស្រាប់ហើយនោះ។
ក្រោយហេតុការណ៍ការអុកឡុកវិមានសភាអាមេរិកពីសំណាក់អ្នកគាំទ្រប្រធានាធិបតី ដូណាល់ ត្រាំ មន្ត្រីជាន់ខ្ពស់បក្សសាធារណរដ្ឋ និងសមាជិកគណៈរដ្ឋមន្ត្រីអាមេរិកខ្លះផងនោះ ក៏ពិភាក្សាគ្នាពីការដកតំណែងប្រធានាធិបតីពីលោក ត្រាំ ដោយមិនបាច់រង់ចាំឲ្យលោកចាកចេញនៅថ្ងៃទី២០ ខែមករាឡើយ។ នេះបើតាមសារព័ត៌មានអាមេរិកមាន CNN និង CNBC ។ យ៉ាងណាក្តី ពុំមានព័ត៌មានដែលគណៈរដ្ឋមន្ត្រីអាមេរិកមានសំឡេងគ្រប់គ្រាន់ក្នុងការដកតំណែងលោក ត្រាំ នៅឡើយទេ។
ការអុកឡុកនៅវិមានសភាដែលបណ្តាលឲ្យមានការប៉ះទង្គិចរវាងប៉ូលិស និងកុបករ នាំឲ្យមនុស្សចំនួន៤នាក់ស្លាប់ និង៥២នាក់ទៀតត្រូវបានចាត់ខ្លួន។ ស្ត្រីម្នាក់ត្រូវប៉ូលិសបាញ់ ចំណែកស្ត្រី និងបុរសជំទង់ពីរនាក់ទៀតស្លាប់នៅកន្លែងសង្គ្រោះបន្ទាន់។ ស្របពេលជាមួយគ្នានេះ តំណាងរាស្ត្រ និងសមាជិកព្រឹទ្ធសភាបក្សប្រជាធិបតេយ្យ ទាមទារឲ្យបើកការស៊ើបអង្កេតពីចន្លោះប្រហោងសន្តិសុខដែលបណ្តាលឲ្យអ្នកគាំទ្រលោក ត្រាំ អាចចូលលុកលុយទីតាំងហាមឃាត់បាន។
លោក William Cohen អតីតរដ្ឋមន្ត្រីការពារជាតិនៃរដ្ឋបាលប្រធានាធិបតី ប៊ីល គ្លីនតុន ក៏អំពាវនាវឲ្យគណៈរដ្ឋមន្ត្រីអាមេរិកដកតំណែងលោក ត្រាំ ផងដែរ។ លោក Cohen ដែលជាអតីតសមាជិកសភា និងព្រឹទ្ធសភាបក្សសាធារណរដ្ឋ អះអាងថា លោកត្រាំមិនមែនជាបុគ្គលដែលអាចបម្រើអាមេរិកបានទៀតឡើយ។ នេះបើតាមការផ្សាយរបស់ទូរទស្សន៍ CNBC ។ មិនត្រឹមអ្នកនយោបាយទេ ផ្នែកឯកជនក៏ចាប់ផ្ដើមមិនពេញចិត្តកាន់តែនឹងទង្វើលោក ត្រាំ ដែលបញ្ចុះបញ្ចូលអ្នកគាំទ្រឲ្យឡោមព័ទ្ធសភាដែរ។
«លោក ត្រាំ ញុះញង់ឲ្យប្រព្រឹត្តហិង្សា ក្នុងគោលបំណងរក្សាអំណាច ហើយមន្ត្រីជាប់ឆ្នោតរូបណាដែលការពារលោកត្រាំ កំពុងក្បត់សម្បថរដ្ឋធម្មនុញ្ញ ទាត់ចោលប្រជាធិបតេយ្យ និងជ្រើសយកភាពអនាធិបតេយ្យ»។ នេះជាការលើកឡើងរបស់លោក Jay Timmons ប្រធានសមាគមផលិតករអាមេរិកតំណាងឲ្យក្រុមហ៊ុនចំនួន១ម៉ឺន៤ពាន់ ដែលប្រាប់ទៅទូរទស្សន៍ CNBC ។ ក្រុមហ៊ុនធំៗមាន Exxon Mobil, Pfizer និង Toyota Motor ជាសមាជិកសមាគមជាដើម។
យោងតាមមាត្រា៤ រដ្ឋធម្មនុញ្ញអាមេរិកដែលកំណត់ក្នុងវិសោធនកម្មទី២៥ ប្រធានាធិបតីអាចនឹងត្រូវដកតំណែងជាបណ្តោះអាសន្ន ឬអចិន្ត្រៃយ៍ បើសិនជាអនុប្រធានាធិបតី និងសមាជិកភាគច្រើននៃគណៈរដ្ឋមន្ត្រីយល់ស្របថា ប្រធានាធិបតីគ្មានលទ្ធភាពក្នុងការអនុវត្តអំណាច និងកាតព្វកិច្ចបាន។ ច្បាប់នេះក៏អនុញ្ញាតឲ្យដកតំណែងក្នុងករណីឈឺ ឬពិការភាពផងដែរ។
ដើម្បីអនុវត្តមាត្រានេះបាន សមាជិកគណៈរដ្ឋមន្ត្រី៨រូបក្នុងចំណោម១៥រូប រួមទាំងអនុប្រធានាធិបតីត្រូវយល់ស្របគ្នាក្នុងការប្រកាសពីអសមត្ថភាពរបស់ប្រធានាធិបតីដើម្បីរដកតំណែង។ ក្នុងករណីនេះ បន្ទាប់នីតិវិធី លោកអនុប្រធានាធិបតីម៉ៃ ផេន នឹងកាន់តំណែងជាប្រធានាធិបតីស្តីទីរហូតចប់អាណត្តិលោក ត្រាំ ។
ប្រធានាធិបតី ក៏អាចជំទាស់ទៅនឹងការប្រកាសនេះ ដោយសសេរលិខិតទៅសភាទាំងពីរថ្នាក់ រីឯប្រធានាធិបតីស្តីទី និងគណៈរដ្ឋមន្ត្រីមានពេល៤ថ្ងៃក្នុងការឆ្លើយតប។ ជាកិច្ចបន្ទាប់ សភាទាំង២ថ្នាក់ ត្រូវជួបប្រជុំក្នុងរយៈពេល៤៨ម៉ោង និងមានពេល២១ថ្ងៃក្នុងការសម្រេចដកហូតអំណាចជាអចិន្ត្រៃយ៍ពីប្រធានាធិបតី ដោយសំឡេង២ភាគ៣ក្នុងសភាទាំង២ថ្នាក់ ពោល៦៧សំឡេងក្នុងព្រឹទ្ធសភា និង២៩០សំឡេងក្នុងសភាតំណាង៕