ដំណើរការជួសជុលរួតទី៣នៃប្រាសាទបាយ័ន អាចចំណាយពេល១ឆ្នាំ បើគ្មានបញ្ហារារាំង

ជាតិ

ដំណើរការជួសជុលរួតទី៣នៃប្រាសាទបាយ័ន អាចចំណាយពេល១ឆ្នាំ បើគ្មានបញ្ហារារាំង

07, Jan 2021 , 9:59 pm

រូបភាព

ដោយ៖ ហុង ស្រីណា

ភ្នំពេញ៖ អាជ្ញាធរជាតិអប្សារា បានចាប់ផ្តើមជួសជុលរួតទី៣ នៃប្រាសាទបាយ័ន ក្រោយមានការទ្រុឌទ្រោមខ្លាំង ដោយសាររចនាសម្ព័ន្ធថ្មប្រាសាទបានក្រៀកចេញពីគ្នា ដែលបណ្តាលមកពី អាយុកាលបានធ្វើឲ្យគុណភាពសំណង់ប្រាសាទចុះខ្សោយ រួមផ្សំជាមួយបញ្ហាអាកាសធាតុផងដែរ។ ការជួសជុលរួតទី៣ នៃប្រាសាទបាយ័ននេះ នឹងចំណាយរយៈពេល១ឆ្នាំ បើសិនគ្មានបញ្ហារាំងស្ទះអ្វីកើតឡើង។

ប្រាសាទបាយ័ន ជាប្រាសាទមួយដែលមានអាយុកាលរាប់រយឆ្នាំមកហើយ ក្នុងចំណោមប្រាសាទជាច្រើន នៅខេត្តសៀមរាប។ អ្វីដែលពិសេស គឺលម្អទៅដោយក្បូរក្បាច់រចនាយ៉ាងប្រណីត នៅលើសំណង់ស្ថាបត្យកម្មដ៏អស្ចារ្យ ដែលឈរសម្ញែងខ្លួននៅលើទឹកដីសុវណ្ណភូមិ នៃកម្ពុជា។

ជាប្រាសាទដែលមានអាយុកាលច្រើនឆ្នាំ រួមទាំងជួបប្រទះបញ្ហាអាកាសធាតុ និងគុណភាពនៃរចនាសម្ព័ន្ធសំណង់ចុះខ្សោយផងនោះ អាជ្ញាធរជាតិអប្សារា បានរួមសហការជាមួយស្ថាប័ន JASA នៃប្រទេសជប៉ុន និងអង្គការយូណេស្កូ បាន ចាប់ផ្តើមជួសជុលនៅរួតទី៣ នៃប្រាសាទបាយ័ន។

លោក គឹម សុធិន អគ្គនាយករង នៃអាជ្ញាធរជាតិអប្សរា បានឱ្យដឹងថា ប្រាសាទបាយ័ននៅរួតទី៣ នឹង ទល់ទ្រកន្លែងមានហានិភ័យ ដែលអាចដួលរលំចំនួន៥៦ ចំណុចផ្សេងគ្នា និងត្រូវរើសថ្មចេញ រួចរុញចូលគ្នាវិញនៅទិសទី៣ នៃទិសខាងត្បូង។ ក្រៅពីនេះ នឹងមានការរៀបចំបិទភ្ជិតលើថ្នេរថ្មប្រាសាទ មិនឲ្យទឹកជ្រាបចូល រួមទាំងសម្រួលថ្ម ដែលរដិបរដុប មិនរាបស្មើ ដើម្បីការពារ ការបង្កគ្រោះថ្នាក់ដល់ភ្ញៀវទេសចរ ពេលដើរទស្សនាប្រាសាទបាយ័ន។ នេះបើតាមហេ្វសប៊ុកផេកអាជ្ញាធរអប្សរា។

សូមបញ្ជាក់ថា អាជ្ញាធរជាតិអប្សារា គ្រោងចំណាយរយៈពេលមួយឆ្នាំ ក្នុងការជួសជុលរួតទី៣ នៃប្រាសាទបាយ័ន រួចជាស្ថាពរ បើសិនជាគ្មានបញ្ហារាំងស្ទះអ្វីកើតឡើង នេះបើរួមបញ្ចូលទាំងការរៀបចំគូសប្លង់ សិក្សាស្រាវជ្រាវ ចងក្រងឯកសារ និងឆ្លងយោបល់ពីអ្នកជំនាញការ៕