លោក ប៊ិន មករា បានប្តូរទៅដាំដំឡូងមីវិញ ក្រោយដំណាំស្វាយចន្ទីបានទិន្នផលធ្លាក់ចុះ។ បើតាមលោក មករា ដំឡូងមី ដែលលក់ជាដំឡូងមីស្ងួត ព្រោះតម្លៃខ្ពស់ជាង ដំឡូងមីស្រស់ និងចំណេញច្រើន។
លោក មករា ជាកសិករមួយរូប ស្ថិតនៅភូមិមួយ ឃុំឡាមិញ ស្រុកបរកែវ ខេត្តរតនគិរី ក៏ជាអតីតនិស្សិតកសិកម្មនៅសាលាភូមិន្ទកសិកម្មផងដែរ។ ក្រោយចម្ការស្វាយចន្ទី ចំនួន ៥ហិកតា បន្សល់ពីគ្រួសារ ដែលមានរយៈពេល ១៥ឆ្នាំ បានថយចុះទិន្នផល ក្នុងឆ្នាំបន្តបន្ទាប់) កសិករ ប៊ិន មករា សម្រេចកាប់ស្វាយចន្ទីចេញរួចជំនួស ដោយដំឡូងមីវិញ។
កសិករវ័យ ២៨ឆ្នាំរូបនេះ បានប្រាប់សារព័ត៌មានThmeyThmey25 យ៉ាងដូច្នេះ៖«មុនដាំ ដំឡូងមី ខ្ញុំដាំស្វាយចន្ទី តែស្វាយចន្ទី ដាំច្រើនឆ្នាំហើយ។ ហើយនៅប៉ុន្មានឆ្នាំ ចុងក្រោយ ទិន្នផលចេះតែធ្លាក់ចុះ អីចឹង ក៏កាប់ដើមចន្ទីចោល ទាំងអស់ ហើយដាំដំឡូងមី វិញ»។
លោក មករា បានបន្ថែមថា ការរើសដាំដំឡូងមី ព្រោះក្នុងខេត្តរតនគិរី មានអំណោយផល នឹងដាំណាំប្រភេទេនេះ ម្យ៉ាងក៏ឆ្លើយតបនឹងតម្រូវការទីផ្សារផងដែរ។ លោកថា៖«ការដាំដំណាំដែល ស្របនឹងតម្រូវការទីផ្សារ កសិករអាចចៀសវាង ការជួបបញ្ហាទីផ្សារ»។
អតីតនិស្សិតកសិកម្មរូបនេះ បន្តថា ស្របនឹងតម្រូវការទីផ្សារ វាក៏អាស្រ័យលើ ស្ថានភាពដី ថាវាអំណោយផល លើដំណាំប្រភេទណា។ បន្ទាប់ពីខកខាន ដាំដំឡូងមី ឆ្នាំនេះ លោក មករា សម្រេចដាំដំឡូងមី ឡើងវិញបន្ទាប់ ពីកាប់ស្វាយចន្ទី ដើម្បីត្រៀម ដាំដំណាំកៅស៊ូ។ លោកបានពន្យល់ថា៖«បន្ទាប់ពី កាប់ដើមស្វាយចន្ទី យើងមិនអាចដាំកៅស៊ូ ភ្លាមទេ តែមិនចង់ឲ្យដីទំនេរ ក៏ជ្រើសដាំដំឡូងមី ព្រោះដំណាំប្រភេទនេះ មិនចំណាយពេលយូរ និងងាយស្រួលថែទាំ»។
កសិករ ប៊ិន មករា ថា ឆ្នាំនេះ ទើបសម្រេចចិត្ត ដាំដំឡូងមី ព្រោះមានរយៈពេលខ្លីជាងស្វាយចន្ទី(ទូទៅដំឡូងមីមានរយៈពេល ៨ទៅ៩ខែ)។ ក្រោយខានដាំ ប្រមាណ ៣ឆ្នាំ តែឆ្នាំនេះ ដំឡូងមីហាក់ ទទួលបានទិន្នផលខ្ពស់ មិនមានការបំផ្លាញ ពីសត្វចង្រៃផ្សេងៗ ថែមទាំងមានតម្លៃខ្ពស់ ជាងឆ្នាំមុនផងដែរ។ ឆ្នាំនេះតម្លៃដំឡូងមីស្រស់ ក្នុងខេត្តរតនគិរី តម្លៃ ៧០០រៀល ក្នុងមួយគីឡូក្រាម និងដំឡូងមីស្ងួត តម្លៃ ៣០០រៀល ក្នុងមួយគីឡូក្រាម។
ជាធម្មតា កសិករ ប៊ិន មករា និយមលក់ដំឡូងមីស្ងួត ជាដំឡូងស្រស់ បើទោះត្រូវចំណាយពេល ៤ ទៅ ៥ថ្ងៃ សម្រាប់ហាល ក៏ដោយ ព្រោះការលក់ដំឡូងស្ងួត បានចំពេញច្រើនជាង។ លោកប្រាប់សារព័ត៌មានThmeyThmey25 តាមទូរសព្ទយ៉ាងដូច្នេះ៖«ខ្ញុំលក់តែដំឡូងមីស្ងួតទេ ព្រោះតម្លៃខ្ពស់ជាង ដំឡូងមីស្រស់ បើគិតទៅ វាចំណេញច្រើនជាង»។
រដូវនេះ ជារដូវប្រមូលផលដំឡូងមី(ដើមខែធ្នូ-ចុងខែមករា) ហើយជាមធ្យម ដំឡូងមី ក្នុងមួយហិកតា ទទួលទិន្នផល ២៥តោន ទៅ ៣០តោន។ ដំឡូងមី មិនសូវ ជាពិបាកថែទាំនោះទេ តែត្រូវយកចិត្តទុកដាក់ នឹងសត្វល្អិតចង្រៃ បន្តិចប៉ុណ្ណោះ ។ នេះបើតាមកសិករ ប៊ិន មករា៕