COVID-19
ជាតិ
សហគមន៍កសិកម្មនៅកំពង់ឆ្នាំង បានម៉ាស៊ីនដាំស្រូវ១០គ្រឿងពីអូស្ត្រាលី
× រដ្ឋាភិបាលអូស្ត្រាលី កាលពីពេលថ្មីកន្លងមកនេះ បានផ្តល់ម៉ាស៊ីនដាំគ្រាប់ស្រូវជាជួរចំនួន១០គ្រឿងបន្ថែមទៀត ជូនដល់សហគមន៍កសិកម្ម នៅក្នុងស្រុកបរិបូណ៌ ខេត្តកំពង់ឆ្នាំង បន្ទាប់ពីបានផ្តល់២០គ្រឿងនៅខេត្តកំពង់ធំ។ បើតាម លោក Pablo Kang ឯកអគ្គរាជទូតអូស្ត្រាលីប្រចាំកម្ពុជា ជំនួយនេះជាផ្នែកមួយនៃការចូលរួមស្តារផលិតកម្មស្រូវ នៅក្នុងរាជធានី-ខេត្ត ដែលរងគ្រោះដោយជំនន់ទឹកភ្លៀង និងដើម្បីលើកកម្ពស់សន្តិសុខស្បៀងនៅកម្ពុជាបរិបទកូវីដ-១៩។
ម៉ាស៊ីនដាំគ្រាប់ស្រូវជាជួរចំនួន១០គ្រឿង ត្រូវបានរដ្ឋាភិបាលអូស្ត្រាលី ប្រគល់ជូនសហគមន៍កសិកម្ម នៅក្នុងស្រុកបរិបូណ៌ ខេត្តកំពង់ឆ្នាំង តាមរយៈកម្មវិធីខ្សែច្រវាក់តម្លៃកសិកម្មកម្ពុជា-អូស្ត្រាលី ហៅកាត់ថា CAVAC(Cambodia-Australia Agriculture Value Chain Program)។ ពិធីប្រគល់ម៉ាស៊ីនដាំស្រូវនេះ ត្រូវបានរៀបចំឡើង កាលពីថ្ងៃទី១៣ មករា ឆ្នាំ២០២១ ក្រោមវត្តមានចូលរួម ដោយលោក វេង សាខុន រដ្ឋមន្ត្រីក្រសួងកសិកម្ម លោក ផាប្លូ កាង(Pablo Kang) ឯកអគ្គរាជទូតអូស្ត្រាលីប្រចាំកម្ពុជា និងលោកស្រី ប៉ន សុភី អភិបាលរងខេត្តកំពង់ឆ្នាំង និងពាក់ព័ន្ធមួយចំនួនទៀត។
រូបភាពពី ហ្វេសប៊ុក លោក វេង សាខុន រដ្ឋមន្រ្តីក្រសួងកសិកម្ម
តមរយៈគណនីហ្វេសប៊ុក លោក វេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ បានឲ្យដឹងថា នេះជាឧបករណ៍ដាំគ្រាប់ស្រូវទី៣០ ដែលរដ្ឋាភិបាលបានផ្តល់មកឲ្យរដ្ឋាភិបាលកម្ពុជា ខណៈកន្លងមកមានឧបករណ៍ដាំគ្រាប់ស្រូវ២០គ្រឿងហើយ ត្រូវបានប្រគល់ជូនសហគមន៍កសិកម្ម នៅខេត្តកំពង់ធំរួចហើយ។
សម្រាប់ លោក វេង សាខុន ឧបករណ៍ដាំគ្រាប់ស្រូវ ចំនួន១០គ្រឿងបន្ថែមទៀតនេះ នឹងចូលរួមចំណែកពន្លឿនការងារដាំដុះស្រូវរបស់ប្រជាកសិករ កាត់បន្ថយពលកម្មមនុស្ស ចំណេញពេល និងលើកកម្ពស់សេដ្ឋកិច្ចផងដែរ។
លោក ផាប្លូ កាង (Pablo Kang) ឯកអគ្គរដ្ឋទូតអូស្ត្រាលីប្រចាំកម្ពុជា ក៏បានលើកឡើងក្នុងពិធីននេះដែរថា ជំនួយនេះជាផ្នែកមួយនៃការចូលរួមស្តារឡើងវិញ ផលិតកម្មស្រូវនៅក្នុងរាជធានី-ខេត្ត ទាំង ១៩ នៅទូទាំងប្រទេសដែលទទួលរងគ្រោះដោយសារជំនន់ទឹកភ្លៀងកន្លងមក និងដើម្បីចូលរួមលើកកម្ពស់សន្តិសុខស្បៀង ក្នុងខណ:ដែលពិភពលោក ក៏ដូចជាកម្ពុជា កំពុងជួបវិបត្តិនៃជំងឺឆ្លងកូវីដ-១៩។
លោកឯកអគ្គរាជទូតអូស្ត្រាលីប្រចាំកម្ពុជា បានគូសបញ្ជាក់ទៀតថា រដ្ឋាភិបាលអូស្ត្រាលី នឹងនៅតែជាដៃគូយ៉ាងជិតស្និទ្ធ ជាមួយរាជរដ្ឋាភិបាលកម្ពុជា ខណៈដែលកម្មវិធី CAVAC បាន និងកំពុងបំពេញតួនាទីយ៉ាងសំខាន់ និងជាដៃគូចាំបាច់ ជាមួយក្រសួងកសិកម្ម រុក្ខាប្រមាញ់ និងនេសាទ ក្នុងការចូលរួមចំណែក ជំរុញផលិតភាពផលិតកម្មស្បៀងនោះ៕
រូបភាពពី ហ្វេសប៊ុក លោក វេង សាខុន រដ្ឋមន្រ្តីក្រសួងកសិកម្ម
Tag:
កសិកម្ម
ស្រូវ
កំពង់ឆ្នាំង
© រក្សាសិទ្ធិដោយ thmeythmey.com