ជាតិ
លោក កឹម សុខា៖ សកម្មភាពមនុស្សធម៌ មិនប៉ះពាល់បម្រាមនយោបាយ ដែលកំពុងបិទសិទ្ធិសេរីភាពខ្ញុំឡើយ
×![]()
ដោយ: សារព័ត៌មានថ្មីៗ
ភ្នំពេញ៖ ២ថ្ងៃមកនេះ លោក កឹម សុខា ប្រធានអតីតគណបក្សសង្គ្រោះជាតិ បានយកជំនួយសប្បុរសធម៌ ទៅចែកពលរដ្ឋ ដែលកំពុងចត្តាឡីស័ក នៅក្នុងខេត្តឧត្តរមានជ័យ និងបន្ទាយមានជ័យ។ លោក កឹម សុខា ហាក់មិនបារម្ភពីបម្រាមនយោបាយ ដែលតុលាការកម្រិតសិទ្ធិ និងសកម្មភាពខ្លួនឡើយ។
«នេះជាសកម្មភាពមនុស្សធម៌ សាមគ្គីធម៌ គុណធម៌ ខ្មែរជួយខ្មែរ ដែលខ្ញុំអាចចូលរួមបាន ដោយមិនប៉ះពាល់បំរាមនយោបាយ ដែលកំពុងបិទសិទ្ធិសេរីភាពខ្ញុំ»។ នេះជាការលើកឡើងរបស់លោក កឹម សុខា ដែលបានយកសម្ភារៈ ដូចជា ម៉ាស់ និងសាប៊ូកម្ចាត់មេរោគ ទៅចែកពលរដ្ឋរស់នៅដោយឡែក១៤ថ្ងៃ ក្នុងខេត្តឧត្តរមានជ័យ និងបន្ទាយមានជ័យ។
មិនតែប៉ុណ្ណោះលោក កឹម សុខា ក៏ផ្ដល់ថវិកា២០លានរៀល សម្រាប់ខេត្តទាំងពីរនេះដែរ។ ជំនួយទាំងនេះ លោក កឹម សុខា ទទួលបានពីសប្បុរសជនខ្មែររស់នៅប្រទេសកាណាដា និងបារាំង ចែកបន្តទៅពលរដ្ឋ។
«នេះជាជំនួយមនុស្សធម៌ ដែលម្ចាស់ជំនួយតម្រូវឲ្យខ្ញុំយកទៅជូនពលករខ្មែរដែលទើបតែវិលត្រឡប់ពីធ្វើការនៅប្រទេសថៃ កំពុងធ្វើចត្តាឡីស័កក្នុងមណ្ឌលនានា»។ នេះជាការបញ្ជាក់របស់លោក កឹម សុខា ដែលបានស្នើឱ្យអាជ្ញាធរបន្តយកចិត្តទុកដាក់ការពារសុខភាពប្រជាពលរដ្ឋ។
ចាប់តាំងពីកម្ពុជា ផ្ទុះកូវីដ-១៩និងមានករណីទឹកជំនន់ និងគ្រោះធម្មជាតិមក លោក កឹម សុខា តែងតែចុះជួបសួរសុខទុក្ខ និងចែកអំណោយសប្បុរសធម៌ដល់ពលរដ្ឋទៀតផង។ លើសពីនេះ លោក កឹម សុខា ក៏បានចូលរួមវិភាគទានជាមួយរដ្ឋាភិបាល ៥ពាន់ដុល្លារ សម្រាប់ជួយដល់ជនរងគ្រោះដោយសារទឹកជំនន់និងគាំទ្រគម្រោងទិញវ៉ាក់សាំងកូវីដ-១៩របស់រដ្ឋាភិបាលផងដែរ។
តាមរយៈសកម្មភាពទាំងនេះ សម្ដេច ហ៊ុន សែន ក៏បានសរសើរចំពោះទង្វើរមនុស្សធម៌របស់ប្រធានអតីតគណបក្សសង្គ្រោះជាតិផងដែរ។ សម្ដេច ចាត់ទុកសកម្មភាពលោក កឹម សុខា ជាការជួយគ្នារវាងខ្មែរនិងខ្មែរ នៅគ្រាមានអាសន្ន។ មិនត្រឹមតែប៉ុណ្ណេះប្រមុខរដ្ឋាភិបាល ក៏បានបញ្ជាឱ្យអាជ្ញាធរជួយសម្របសម្រួល និងសហការដល់ការចុះជួបសួរសុខទុក្ខ និងចែកអំណោយរបស់លោក កឹម សុខា ទៀតផង។
គួរបញ្ជាក់ថា លោក កឹម សុខា កំពុងជាប់ក្តីក្ដាំពីបទ «គប់គិតជាមួយបរទេស» តាំងពីឆ្នាំ២០១៧មកម្ល៉េះ ។ សំណុំរឿងលោក កឹម សុខា បានដំណើរការសវនាការ បាន៣ខែដែរ កាលពីដើមឆ្នាំ២០២០ ប៉ុន្តែដោយសារបញ្ហាកូវីដ-១៩ រាតត្បាតពេកនោះ ទើបតុលាការសម្រេចពន្យាពេលសនវការក្តីនេះ ដោយរង់ចាំស្ថានភាពធូរស្បើយសិន៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
7 ម៉ោង
