កីឡាអន្តរជាតិ
អន្តរជាតិ
Solskjaer ថា Pogba សប្បាយចិត្តជាមួយ Man Utd វិញហើយ
× លោក Ole Gunnar Solskjaer ជឿជាក់ថា Paul Pogba សប្បាយចិត្តឡើងវិញហើយ បន្ទាប់ពីខ្សែបម្រើឆ្នើមរូបនេះបានជួយក្រុម និងសាទរយ៉ាងខ្លាំងចំពោះជ័យជម្នះរបស់ Manchester Unitd លើក្រុម Fulham។
Pogba ជាអ្នករកគ្រាប់បាល់ជ័យជម្នះដើម្បីជួយក្រុមបិសាចក្រហមដណ្តើមបានចំណាត់ថ្នាក់កំពូលតារាង Premier League ជាថ្មីវិញ ក្រោយយកឈ្នះ Fulham ២-១ នៅជំនួបលីគសប្តាហ៍ទី១៩ នៅរាត្រីថ្ងៃទី២០ ខែមករា នៅឯ Craven Cottage។
Edinson Cavani ជាអ្នករកគ្រាប់បាល់តាមស្មើឱ្យ Man Utd នៅនាទី២១ បន្ទាប់ពី Ademola Lookman ស៊ុតគ្រាប់បើកឆាកឱ្យ Fulham នៅនាទីទី៥។ Pogba បានក្លាយជាវីរបុរសក្នុងជំនួបដ៏សំខាន់នេះ ក្រោយស៊ុតជើងឆ្វេងពីចម្ងាយសម្រេចគ្រាប់ជ័យជម្នះឱ្យក្រុមលោក Solskjaer នៅនាទី៦៥ ដើម្បីទទួលបាន៣ពិន្ទុបន្ថែម។
កន្លងមក Pogba តាមរយៈពីភ្នាក់ងាររបស់ខ្លួនលោក Mino Raiola ធ្លាប់បានអះអាងថាម្ចាស់ថាខ្សែបម្រើអន្តរជាតិបារាំងរូបនេះ មិនសប្បាយចិត្តក្នុងការបន្តជាមួយបិសាចក្រហមទៀតឡើយ ស្របពេលទំនាក់ទំនងជាមួយអតីតក្លិបចាស់ Juventus និង Real Madrid ក៏កើនឡើងផងដែរ។
យ៉ាងណាក៏ដោយ នៅពេលអ្នកសារព័ត៌មានសួរអំពី Pogba នៅ Old Trafford យ៉ាងមេចទៅហើយនោះ? លោក Solskjaer ឆ្លើយថា៖ «គាត់កំពុងរីករាយនឹងការលេងបាល់របស់គាត់នៅទីនេះ គាត់សប្បាយចិត្តគាត់មានសតិស្មារតីល្អនៅពេលលេងលើទីលាន ហើយយើងពិតជាបានដឹងពីទេពកោសល្យរបស់គាត់។ ថ្ងៃនេះយើងសម្រេចចិត្តឱ្យគាត់លេងនៅតំបន់បម្រើ ហើយគាត់ធ្វើបានល្អ ហើយនឹងសមនឹងតំណែងនេះ»។
ចាប់តាំងពីខ្សែបម្រើវ័យ២៧ឆ្នាំបានវិលទៅកាន់ទឹកដីអង់គ្លេសពី Juventus ឆ្នាំ ២០១៦ គ្មានកីឡាករណាម្នាក់អាចរកគ្រាប់បាល់ស៊ុតពីចម្ងាយច្រើនជាង Pogba ដែលរកបាន៦គ្រាប់ឡើយ។
តាមរយៈជ័យជម្នះនេះ Man Utd បានកើនដល់ដល់៤០ពិន្ទុ ពីការប្រកួត១៩លើក ឈរនៅកំពូលតារាងលីគកំពូលអង់គ្លេស នាំមុខក្រុមលេខ២ Manchester City និងលេខ៣ Leicester City ចំនួនពីរពិន្ទុ។ យ៉ាងណាក៏ដោយ Man City នៅសល់ការប្រកួត១លើកក្នុងដៃ ដែលធ្វើឱ្យពួកគេមានឱកាសដើម្បីឡើងទៅឈរកំពូលតារាងវិញ៕
Tag:
Paul Pogba
Manchester United
© រក្សាសិទ្ធិដោយ thmeythmey.com