COVID-19
អន្តរជាតិ
WHO នឹងពន្លឿនការអនុញ្ញាតឱ្យប្រើប្រាស់បន្ទាន់វ៉ាក់សាំងកូវីដ-១៩ ដើម្បីជួយប្រទេសក្រីក្រ
រូបភាព៖ Reuters
×![]()
ដោយ: ធៀន ភារិន្ទ
អង្គការសុខភាពពិភពលោក (WHO) គ្រោងនឹងអនុម័តឱ្យប្រើប្រាស់បន្ទាន់វ៉ាក់សាំងមួយចំនួននៅពេលខ្លីខាងមុខ ដើម្បីជួយឱ្យប្រទេសក្រីក្រឆាប់ទទួលបានវ៉ាក់សាំង។ នេះបើតាមឯកសាររបស់កម្មវិធី COVAX នៅថ្ងៃទី២០ ខែមករា។ វ៉ាក់សាំងក្រុមហ៊ុនអឺរ៉ុបរបស់ចិន និងរុស្ស៊ី ទំនងជាទទួលបានការអនុញ្ញាតបន្តបន្ទាប់គ្នា ខណៈដែល WHO ពន្លឿនការត្រួតពិនិត្យបេក្ខភាពវ៉ាក់សាំងនានា។ 
អត្ថបទទាក់ទង
មកទល់ពេលនេះ អង្គការសុខភាពពិភពលោក បានទទួលស្គាល់ប្រសិទ្ធភាពវ៉ាក់សាំងរបស់ក្រុមហ៊ុន Pfizer តែមួយប៉ុណ្ណោះតាមរយៈការបញ្ចូលក្នុងបញ្ជីវ៉ាក់សាំងប្រើប្រាស់បន្ទាន់។ ការទទួលស្គាល់ប្រសិទ្ធភាពវ៉ាក់សាំងផ្សេងទៀតពីសំណាក់អង្គការអន្តរជាតិមួយនេះ នឹងក្លាយជាចំណែកមួយនៃការជួយប្រទេសក្រីក្រ ដែលសមត្ថភាពក្នុងការត្រួតពិនិត្យប្រសិទ្ធភាពវ៉ាក់សាំងនៅមានកម្រិត ឱ្យប្រើប្រាស់វ៉ាក់សាំងទាំងនោះបានដូចប្រទេសអ្នកមានដែរ។
នៅក្នុងរបាយការណ៍ផ្ទៃក្នុងមួយរបស់ COVAX ដែលត្រូវបានចុះផ្សាយដោយទីភ្នាក់ងារព័ត៌មាន Reuters នៅថ្ងៃទី២០ ខែមករា អង្គការ WHO នឹងទទួលស្គាល់ប្រសិទ្ធភាពវ៉ាក់សាំងបន្ថែមទៀត នៅក្នុងពេលឆាប់ៗខាងមុខ។ WHO អាចផ្តល់អាជ្ញាបណ្ណដល់វ៉ាកសាំងកូវីដ-១៩ របស់ក្រុមហ៊ុនAstraZeneca ដែលផលិតដោយវិទ្យាស្ថាន Serum នៅឥណ្ឌាក្នុងខែមករា ឬខែកុម្ភៈ។ វ៉ាក់សាំងដដែលនេះ ដែលផលិតដោយក្រុមហ៊ុនកូរ៉េខាងត្បូង SK Bioscience អាចទទួលស្គាល់ប្រសិទ្ធភាពនៅពាក់កណ្តាលខែកុម្ភៈខាងមុខ។
កន្លងមក COVAX បានចុះកុងត្រាទិញវ៉ាក់សាំងរបស់ AstraZeneca ដែលផលិតនៅឥណ្ឌាជាង៤០០លានដូស។
ក្នុងរបាយការណ៍ដដែល WHO ត្រូវបានរំពឹងថា នឹងទទួលស្គាល់វ៉ាក់សាំងរបស់ក្រុមហ៊ុន Moderna នៅក្នុងខែកុម្ភៈ។ វ៉ាក់សាំងរបស់ក្រុមហ៊ុននេះ ត្រូវបានអនុញ្ញាតឲ្យប្រើប្រាស់នៅក្នុងអាមេរិក និងអឺរ៉ុបរួចហើយ។ ដោយឡែក វ៉ាក់សាំងរបស់ Johnson & Johnson អាចត្រូវបានទទួលស្គាល់ប្រសិទ្ធភាពនៅក្នុងខែឧសភា ឬខែមិថុនា។ កន្លងមក កូរ៉េខាងត្បូង បានចុះកុងត្រាទិញវ៉ាក់សាំងនេះ បើទោះបីជាមិនទាន់បង្ហាញលទ្ធផលនៅក្នុងដំណាក់កាលពិសោធន៍ចុងក្រោយក៏ដោយ។
វ៉ាក់សាំងនៅក្នុងតំបន់អាស៊ី ក៏មានឈ្មោះនៅក្នុងបញ្ជីដែលនឹងត្រូវទទួលស្គាល់ប្រសិទ្ធភាពដោយ WHO ដែរ។ វ៉ាក់សាំងរបស់ក្រុមហ៊ុនចិនទាំងពីរ Sinopharm និង Sinovac អាចនឹងត្រូវបានទទួលស្គាល់នៅខែមីនា។ រីឯវ៉ាក់សាំងរបស់រុស្ស៊ី Sputnik V មិនទាន់កំណត់ពេលវេលាទទួលស្គាល់នៅឡើយទេ។
ក្រោមសហដឹកនាំដោយអង្គការសុខភាពពិភពលោក និងសម្ព័ន្ធវ៉ាក់សាំង (GAVI) យន្តការ COVAX ជាគម្រោងមួយ ដែលត្រូវបានបង្កើតឡើង ដើម្បីចែកចាយវ៉ាក់សាំងយ៉ាងហោចណាស់ពី ២ពាន់លានដូស ទៅជុំវិញពិភពលោក។ ក្នុងចំនួននោះ វ៉ាក់សាំងយ៉ាងហោចណាស់ ១,៣ពាន់លានដូស នឹងចែកចាយទៅប្រទេសក្រីក្រ។ ប៉ុន្តែគម្រោងនេះ កំពុងប្រឈមកង្វះមូលនិធិ និងបរិមាណវ៉ាក់សាំង ស្របពេលប្រទេសអ្នកមាន បានចុះកិច្ចព្រមព្រៀងទិញវ៉ាក់សាំងជាច្រើនលានដូសទុក។
គិតមកត្រឹមពេលនេះ ពិភពលោក មានករណីឆ្លងកូវីដ-១៩ សរុបជាង ៩៧លានករណី និងអ្នកស្លាប់មានជាង ២លាននាក់។ ចំណែកអ្នកជាសះស្បើយមានប្រមាណ ៦៩លាននាក់៕
Tag:
WHO
កូវីដ-១៩
ចិន
អឺរ៉ុប
© រក្សាសិទ្ធិដោយ thmeythmey.com
