អន្តរជាតិ
សិង្ហបុរី ស្វាគមន៍អាមេរិកចូលរួមកិច្ចព្រមព្រៀងប៉ារីសស្តីពីបម្រែបម្រួលអាកាសធាតុវិញ
×
ដោយ ៖ឈួន ឈីវអ៊ីង
ក្រសួងការបទេសរបស់សិង្ហបុរី នៅថ្ងៃទី២១ មករា ប្រកាសថា សិង្ហបុរី ស្វាគមន៍អាមេរិក នឹងត្រលប់ចូលរួមកិច្ចព្រមព្រៀងទីក្រុងប៉ារីសស្តីពីបញ្ហាបម្រែបម្រូលអាកាសធាតុជាថ្មីម្តងទៀត។ សិង្ហបុរីអះអាងថា វត្តមានអាមេរិកនឹងជួយជំរុញកិច្ចសហប្រតិបត្តិការលើការប្រយុទ្ធនឹងបញ្ហាប្រឈមសាកលមួយនេះ។
សហរដ្ឋអាមេរិកបានចាកចេញពីកិច្ចព្រមព្រៀងទីក្រុងប៉ារីសជាផ្លូវការតាំងពីថ្ងៃទី៤ ខែវិច្ឆិកា ឆ្នាំ២០២០ មកក្រោមរដ្ឋបាលរបស់ប្រធានាធិបតីលោក ដូណាល់ ត្រាំ ។ ប៉ុន្តែអាមេរិក នឹងចូលរួមក្នុងកិច្ចព្រមព្រៀងនេះវិញ ក្នុងអាណត្តិប្រធានាធិបតីថ្មី ចូ បៃឌិន ។ លោក បៃឌិន ដែលស្បថចូលកាន់តំណែងនៅថ្ងៃទី២០ ខែមករា បានចុះហត្ថលេខាលើបញ្ជាមួយដែលនឹងចាប់ផ្ដើមនីតិវិធីចូលរួមឡើងវិញ។
ដែនកោះសិង្ហបុរី ស្វាគមន៍ការសម្រេចចិត្តរបស់រដ្ឋបាលអាមេរិកថ្មី។ ក្នុងសេចក្ដីប្រកាសព័ត៌មានថ្ងៃទី២១ ខែមករា ក្រសួងការបរទេសសិង្ហបុរី បញ្ជាក់ថា បម្រែបម្រួលអាកាសធាតុ ជាការគំរាមកំហែងដ៏ធំមួយរបស់ពិភពលោក មនុស្សជាតិ ហើយដែលតម្រូវឲ្យមានការរួបរួមគ្នាដើម្បីនិរន្តរ៍ភាពនៃសាកលលោក។
«ការសម្រេចចិត្តត្រលប់មកវិញរបស់អាមេរិក ក្នុងកិច្ចព្រមព្រៀងទីក្រុងប៉ារីសជាការវិវត្តវិជ្ជមានមួយដែលនាំមកការជំរុញដ៏សំខាន់មួយដល់កិច្ចខិតខំប្រឹងប្រែងជាសាកលក្នុងការដោះស្រាយបញ្ហាបម្រែបម្រួលអាកាសធាតុរួមគ្នា។» ក្រសួងការបរទេសសិង្ហបុរីលើកឡើងបែបនេះ មុនបន្តថា វាក៏បង្ហាញការតាំងចិត្តរបស់អាមេរិកដើម្បីដឹកនាំពិភពលោកក្នុងការការពារអាកាសធាតុឲ្យទាន់ពេលវេលានិងធ្វើការជាមួយនឹងសហគមន៍អន្តរជាតិសំដៅជំរុញការប្រឹងប្រែងពហុភាគី។
ក្នុងសេចក្ដីប្រកាសដដែល ក្រសួងការបរទេសសិង្ហបុរីក៏ប្រកាសត្រៀមខ្លួនរួចជាស្រេចដើម្បីធ្វើការជាមួយអាមេរិក ក៏ដូចជាភាគីពាក់ព័ន្ធសំខាន់ៗដទៃទៀតក្នុងការសម្រេចបាន គោលដៅរបស់កិច្ចព្រមព្រៀងទីក្រុងប៉ារីស៕
© រក្សាសិទ្ធិដោយ thmeythmey.com