COVID-19
ជាតិ
អន្តរជាតិ
UNESCO សម្ពោធសៀវភៅជាភាសាខ្មែរពីរក្បាលស្តីពីការការពារអ្នកសារព័ត៌មាន និងសេរីភាពមតិ
× អង្គការយូណេស្កូ (UNESCO) នៅថ្ងៃទី២៥ ខែមករា បានសម្ពោធសៀវភៅជាភាសាខ្មែរចំនួន ពីរក្បាលស្តីពី «កូវីដ-១៩៖ តួនាទីរបស់តួអង្គក្នុងប្រព័ន្ធយុត្តិធម៌ក្នុងការការពារ និងលើកកម្ពស់សិទ្ធិសេរីភាពបញ្ចេញមតិ» និងសៀវភៅណែនាំ «សុវត្ថិភាពអ្នកសារព័ត៌មាន»។ សៀវភៅទាំងពីរក្បាលនេះ នឹងជាជំនួយសម្រាប់អ្នកសារព័ត៌មានក្នុងពេលបំពេញភារកិច្ច ការការពារខ្លួនលើប្រព័ន្ធឌីជីថល និងការធ្វើផែនការជីវិតជាដើម។
លោក Mikel Aguirre Idiaquez អ្នកជំនាញលើការអភិវឌ្ឍប្រព័ន្ធផ្សព្វផ្សាយ និងសិទ្ធិសេរីភាពនៃការបញ្ចេញមតិនៅយូណេស្កូបានលើកឡើងថា សៀវភៅ «កូវីដ-១៩៖ តួនាទីរបស់តួអង្គក្នុងប្រព័ន្ធយុត្តិធម៌ក្នុងការការពារ និងលើកកម្ពស់សិទ្ធិសេរីភាពបញ្ចេញមតិ» គឺវានឹងផ្ដល់សារប្រយោជន៍សម្រាប់បរិបទកម្ពុជា។
បើតាមលោក Idiaquez សៀវភៅ ដែលមានកម្រស់២៨ទំព័រ បានលើកឡើងពីគោលការណ៍ណែនាំជាច្រើនសម្រាប់ចៅក្រម និងព្រះរាជអាជ្ញា ទាក់ទិននឹងសិទ្ធិសេរីភាពបញ្ចេញមតិ, ការការពារទិន្នន័យឯកជន, ការទប់ស្កាត់ការផ្សព្វផ្សាយព័ត៌មានមិនពិត, ការការពារអ្នកសារព័ត៌មាននៅក្នុងវិបត្តិកូវីដ-១៩ និងជំរុញឲ្យរដ្ឋគោរពតាមលក្ខខណ្ឌ លក្ខណៈវិនិច្ឆ័យ និងនីតិវិធីនានាជាដើម។
ដោយឡែកសៀវភៅស្តីពី«សុវត្ថិភាពអ្នកសារព័ត៌មាន» កម្រាស់ ២៥២ទំព័រនេះ ផ្ដល់ការណែនាំទាក់ទិននឹងសុវត្ថិភាពរូបរាងកាយរបស់អ្នកសារព័ត៌មាន ក្នុងពេលចុះទៅបំពេញភារកិច្ច ក្នុងអំឡុងពេលសង្គ្រាម ជំងឺរាតត្បាត បាតុកម្ម និងការការពារខ្លួនលើប្រព័ន្ធឌីជីថលជាដើម។ សៀវភៅដដែលនេះ ក៏បានណែនាំអ្នកសារព័ត៌មានឱ្យចេះថែទាំងសុខភាព, ការដាក់សម្ភារវេជ្ជសាស្ត្រ ឬសម្ភារសម្រាប់សម្រាក ដើម្បីការពារខ្លួនពីជំងឺផ្សេងទៀត, ការរៀបចំហិរញ្ញវត្ថុ និងវិធានការជាច្រើនទៀត ក្នុងអំឡុងពេលចុះបំពេញភារកិច្ច។ នេះបើតាមលោក Idiaquez។
សូមបញ្ជាក់ថា សៀវភៅណែនាំកូវីដ-១៩៖ តួនាទីរបស់តួអង្គក្នុងប្រព័ន្ធយុត្តិធម៌ក្នុងការការពារ និងលើកកម្ពស់សិទ្ធិសេរីភាពបញ្ចេញមតិ» ត្រូវបានបោះពុម្ភជាភាសាអង់គ្លេសនៅក្នុងខែកញ្ញា ឆ្នាំ២០២០ និងសៀវភៅណែនាំ « សុវត្ថិភាពអ្នកសារព័ត៌មាន» បានបោះពុម្ភជាភាសាអង់គ្លេសនៅក្នុងឆ្នាំ២០១៥ កន្លងមក៕
© រក្សាសិទ្ធិដោយ thmeythmey.com