UCL៖ Zidane មិនខ្វល់ពីតំណែង តែចង់ជួយ Real ឈ្នះពានលើកទី៣ ក្នុងនាមជាអ្នកចាត់ការ

កីឡាអន្តរជាតិ

អន្តរជាតិ

UCL៖ Zidane មិនខ្វល់ពីតំណែង តែចង់ជួយ Real ឈ្នះពានលើកទី៣ ក្នុងនាមជាអ្នកចាត់ការ

01, May 2018 , 9:59 pm

រូបភាព

រូបភាពពី AFP

ដោយ: ថ្មីៗ

លោក Zinedine Zidane អ្នកចាត់ការទូទៅ Real Madrid មិនគិតថាអនាគតរបស់ខ្លួនត្រូវពឹងផ្អែកទៅលើការឈ្នះពានរង្វាន់ UEFA Champions League នោះទេ ខណៈដែលក្រុមការពារតំណែងជើងឯកមួយនេះត្រៀមខ្លួនសម្រាប់ការប្រកួតវគ្គពាក់កណ្តាលផ្តាច់ព្រ័ត្រជាមួយនឹងក្រុម Bayern Munich ក្នុងជំនួបជើងទី២ នៅរាត្រីថ្ងៃទី ១ ខែឧសភានេះ វេលាម៉ោង ១:៤៥ នាទី [ម៉ោងនៅកម្ពុជា]។

Real Madrid ដែលកំពុងព្យាយាមគ្រងតំណែងជើងឯកពានលំដាប់ទី១អឺរ៉ុបឲ្យបាន ៣រដូវកាលជាប់គ្នា បានយកឈ្នះក្រុមជើងឯកអាល្លឺម៉ង់ Bayern Munich ក្នុងលទ្ធផល ២-១ នៅជើងទីមួយក្នុងទឹកដី Allianz Arena។ សម្រាប់ការប្រកួតជើងទី២ នៅកីឡដ្ឋាន Santiago Bernabeu ក្រុមរបស់ Zidane មានប្រៀបជាងកូនក្រុមរបស់លោក Jupp Heynckes ដ្បិតអាចរកបានដល់ទៅ២គ្រាប់ក្រៅដី (គ្រាប់បាល់ចំណេញក្រៅដី) នៅក្នុងដៃ។

បើទោះបីនាំក្រុមឈានមកដល់វគ្គនេះក្តី ប៉ុន្តែក្រោមការដឹកនាំរបស់ Zidane ក្រុមអធិរាជសធ្វើមិនបានល្អនោះទេក្នុងការប្រកួតក្របខណ្ឌក្នុងស្រុករដូវកាលនេះ ដោយរបូតពាន La Liga ទៅ Barcelona ទៅហើយ និងតាមពីក្រោយរហួត១៥ពិន្ទុថែមទៀត។ លទ្ធផលមិនគាប់ប្រសើរនេះ បានធ្វើឲ្យអនាគតរបស់អ្នកចាត់ការសញ្ជាតិបារាំងនៅអេស្ប៉ាញស្ថិតនៅភាពស្រពេច ស្រពិលនៅឡើយ។

នៅពេលត្រូវបានគេសួរថា តើលោកត្រូវតែឈ្នះពាន Champions League នេះដើម្បីរក្សាតំណែងរបស់ខ្លួននោះ Zidane បានឆ្លើយថា៖«វាជារឿងឯករាជ្យមួយ»។
វីរបុរសក្រុមជម្រើសជាតិបារាំង ដែលបានឡើងដឹកនាំក្រុមយក្សអេស្ប៉ាញរយៈពេលពីរឆ្នាំកន្លះមកហើយ បានបន្ថែមថា៖«ថ្ងៃនេះខ្ញុំជាគ្រូបង្វឹកហើយខ្ញុំចង់បន្តនៅក្លិបនេះ។ ប៉ុន្តែវាមិនសំខាន់ទេថាខ្ញុំត្រូវនៅ ឬចាកចេញ អ្វីដែលជារឿងប្រសើរចំពោះអ្នករាល់គ្នាគឺការគិតអំពីការប្រកួតនេះ ទើបជារឿងសំខាន់»។

អ្នកចាត់ការរហស្សនាម Zizou វ័យ៤៥ឆ្នាំរូបនេះ បានជួយ Real Madrid លើកពានកំពូលអេស្ប៉ាញមួយលើក និង Champions League ២លើករួចមកហើយតាំងពីឡើងកាន់តំណែងកាលពីឆ្នាំ ២០១៦ មក។

សូមបញ្ជាក់ថា លោក Jupp Heynckes អ្នកចាត់ការ Bayern Munich បច្ចុប្បន្ន ក៏ធ្លាប់ត្រូវ Real Madrid បញ្ឈប់ពីតំណែងដែរ បើទោះលោកបាននាំក្រុមនេះឈ្នះពាន Champions League កាលពីឆ្នាំ ១៩៩៨ ក៏ដោយ៕

អត្ថបទទាក់ទង

Real រំពឹងឈ្នះពាន UCL ៣ឆ្នាំជាប់គ្នា ក្រោយស៊ីម្ចាស់ផ្ទះ Bayern ២-១ វគ្គ១/២ជើងទី១