ការសិក្សា៖ មួយសប្តាហ៍ ពលរដ្ឋខ្មែរស្លាប់ជិត៣០០នាក់ ដោយសារថ្នាំជក់

ជាតិ

សង្គមជាតិ

ការសិក្សា៖ មួយសប្តាហ៍ ពលរដ្ឋខ្មែរស្លាប់ជិត៣០០នាក់ ដោយសារថ្នាំជក់

04, Jul 2019 , 9:59 pm

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ មានពលរដ្ឋ២៩០នាក់ស្លាប់ក្នុងមួយសប្តាហ៍ ដោយសារជំងឺដែលបណ្តាលមកពីការប្រើប្រាស់ថ្នាំជក់។ នេះជាលទ្ធផលសិក្សាប៉ាន់ប្រមាណរបស់ FCTC ឆ្នាំ២០១៩ ដែលថ្លែងដោយលោក អឿន បូរារ័ត្នន៍ រដ្ឋលេខាធិការក្រសួងសុខាភិបាល ក្នុងសិក្ខាសាលាផ្សព្វផ្សាយលទ្ធផលប៉ាន់ប្រមាណស្តីពី «ការសិក្សាអំពីផលប៉ះពាល់នៃការប្រើប្រាស់ថ្នាំផលិតផលថ្នាំជក់មកលើសុខភាព សង្គម សេដ្ឋកិច្ច និងបរិស្ថាន» នាថ្ងៃទី៤កក្កដា នៅសណ្ឋាគារសាន់វេ។

លទ្ធផលនៃការសិក្សានេះ បានឲ្យដឹងថា ជារៀងរាល់ឆ្នាំប្រជាពលរដ្ឋកម្ពុជាប្រមាណ១,៥ម៉ឺននាក់ ពីការប្រើប្រាស់ថ្នាំជក់ ដោយក្នុងនោះមាន៣៣ ជាអ្នកស្លាប់។ ជំងឺដែលកើតឡើងពីថ្នាំជក់ មានជំងឺមហារីក (មាត់ស្បូន, ថ្លើម, សួត,ក្រពះ) ជំងឺទឹកនោមផ្អែម ជំងឺផ្លូវដង្ហើមរ៉ាំរ៉ៃ និងជំងឺសរសៃឈាមបេះដូង។ ហើយរៀងរាល់ឆ្នាំ ការប្រើប្រាស់ថ្នាំជក់ បានធ្វើឱ្យកម្ពុជាខាតបង់សេដ្ឋកិច្ចក្នុងទំហំទឹកប្រាក់ប្រមាណ៦៦០លានដុល្លារ ស្មើនឹង៣ភាគរយនៃចំណូលផលិតផលក្នុងស្រុកសរុប (GDP)។

អត្ថបទទាក់ទង

កម្ពុជាខាតបង់ជាង ៦០០លានដុល្លារក្នុងមួយឆ្នាំ ដោយសារបញ្ហាជក់បារី

អ្នកជំនាញ បន្តទាមទារឲ្យដំឡើងពន្ធលើថ្នាំជក់ ខណៈមានអ្នកស្លាប់ជិត៣០នាក់ក្នុង១ថ្ងៃដោយសារជក់បារី

លោក Rodrigo Samtos Feijo មន្ត្រីបច្ចេកទេសនៃ WHO FRAMEWORK CONVENTION ON TOBACCO CONTRO (FCTC) លើកឡើងថា ការខាតបង់សេដ្ឋកិច្ចកម្ពុជា៣ភាគរយនៃការប្រើប្រាស់ថ្នាំជក់នេះ គឺបានកើនឡើងស្ទើរទ្វេដងបើប្រៀបធៀបទៅនឹងប្រទេសផ្សេងៗក្នុងសកលលោក ដែលខាតបង់សេដ្ឋកិច្ចទៅលើការប្រើប្រាស់ថ្នាំជក់នេះត្រឹមតែ១,៨ភាគរយប៉ុណ្ណោះ។ លោក បន្តថា ថ្វីដ្បិតកម្ពុជាខាតបង់សេដ្ឋកិច្ចជិត២ដងនៃប្រទេសផ្សេងៗទៀត ប៉ុន្តែកម្ពុជាក៏បានអនុវត្តវិធានការល្អៗមួយចំនួនរួចមកហើយ ដូចជាការអនុម័តច្បាប់ស្តីពីការត្រួតពិនិត្យថ្នាំជក់ក្នុងឆ្នាំ២០១៥ ការបង្កើនពន្ធលើផលិតផលថ្នាំជក់ ហើយជាលទ្ធផលក៏មានការធ្លាក់ចុះនៃការប្រើប្រាស់ថ្នាំជក់មួយចំនួនផងដែរ។

លោក Rodrigo Samtos Feijo បានអះអាងដូច្នេះថា៖«ការប្រើប្រាស់ថ្នាំជក់នេះ យើងឃើញថាចំពោះអ្នកក្រីក្រ គឺងាយរងគ្រោះច្រើនជាង ដោយសារការប្រើប្រាស់ថ្នាំជក់ និងការជក់បារីផងដែរ។ មិនត្រឹមតែកម្ពុជានោះ សូម្បីតែប្រទេសដទៃ យើងឃើញថាអត្រានៃការប្រើប្រាស់ថ្នាំជក់កើតឡើងខ្ពស់ចំពោះអ្នកក្រីក្រ ឬអ្នកមានចំណូលទាប។ ចំពោះអ្នកក្រីក្រមានជួបផលលំបាកច្រើន ព្រោះពួកគេត្រូវចំណាយលុយច្រើនទៅលើការទិញផលិតផលថ្នាំជក់ទាំងហ្នឹង។ ប្រសិនបើពួកគេធ្វើឱ្យពួកគេខាត់បង់ប្រាក់ ដែលមិនអាចចំណាយទៅលើចំណីអាហារ ការអប់រំ និងមិនអាចចំណាយលើអ្វីៗដែលមានប្រយោជន៍ជាច្រើនសម្រាប់ការអភិវឌ្ឍខ្លួនឯង និងគ្រួសាររបស់ពួកគេ»។

មន្ត្រីបច្ចេកទេសរូបនេះបានបញ្ជាក់ថា លទ្ធផលនៃការសិក្សាប៉ាន់ប្រមាណអំពីលទ្ធផល នៃការប្រើប្រាស់ផលិតផលថ្នាំជក់នៅកម្ពុជានេះ បានធ្វើឡើងដោយក្រុមអ្នកស្រាវជ្រាវដែលដឹកនាំដោយ WHO UNDP និង FCTC ចាប់ពីខែកុម្ភៈឆ្នាំ២០១៨ ដល់ខែកុម្ភៈ ឆ្នាំ២០១៩។ លទ្ធផលនៃការសិក្សានេះ គឺជាឆ្នាំដំបូងដែលផ្អែកទៅលើទិន្នន័យផ្លូវការរបស់ក្រសួងពាក់ព័ន្ធ រួមមានក្រសួងមហាផ្ទៃ ក្រសួងសេដ្ឋកិច្ច ក្រសួងបរិស្ថាន ក្រសួងកសិកម្ម ក្រសួងពាណិជ្ជកម្ម និងក្រសួងឧស្សាហកម្ម ជាដើម រួមទាំងទិន្នន័យរបស់វិទ្យាស្ថានជាតិស្ថិតិនៃក្រសួងផែនការផងដែរ៕