ក្រសួងសុខាភិបាលជប៉ុន៖ពលរដ្ឋ៣នាក់ជម្លៀសពីវូហាន មានកូរ៉ូណាវីរុស, ករណីឆ្លងឡើងដល់១១

អន្តរជាតិ

ក្រសួងសុខាភិបាលជប៉ុន៖ពលរដ្ឋ៣នាក់ជម្លៀសពីវូហាន មានកូរ៉ូណាវីរុស, ករណីឆ្លងឡើងដល់១១

30, Jan 2020 , 10:06 am

រូបភាព

រថយន្តដឹកពលរដ្ឋជប៉ុនដែលជម្លៀសពីវូហាន ពីព្រលានយន្តហោះ Haneda ក្នុងក្រុង តូក្យូ (AP)

ដោយ:

ប្រជាជនជប៉ុន៣នាក់ក្នុងចំណោមជាង២០០នាក់ ដែលបានជម្លៀសចេញក្រុង វូហាន ប្រទេសចិន ត្រូវបានធ្វើតេស្តរកឃើញថា មានឆ្លងណូវែលកូរ៉ូណាវីរុស។ ក្រសួងសុខាភិបាលជប៉ុន បានបញ្ជាក់បែបនេះនៅថ្ងៃព្រហស្បតិ៍ ៣០ ខែមករា។

អត្ថបទទាក់ទង

កូរ៉ូណាវីរុស៖ ចំនួនអ្នកស្លាប់នៅចិនឡើងដល់១៧០នាក់

យន្តហោះដឹកពលរដ្ឋជប៉ុនជាង២០០នាក់ពីវូហាន បានទៅដល់ទីក្រុងតូក្យូ

អ្នកជំងឺទាំង៣នាក់នេះ បានមកដល់ប្រទេសជប៉ុន កាលពីថ្ងៃពុធ ២៩ ខែមករា តាមរយៈជើងហោះជុំទីមួយដើម្បីជម្លៀសពលរដ្ឋជប៉ុនចេញពីក្រុង វូហាន នៃប្រទេសចិន ដែលជាចំណុចផ្តើមនៃការផ្ទុះជំងឺរលាកសួតប្រភេទថ្មី ដែលបង្កឡើងដោយកូរ៉ូណាវីរុស។ គិតត្រឹមព្រឹកថ្ងៃ៣០ មករា នេះ អ្នកស្លាប់ព្រោះវីរុសនេះ បានកើនដល់ ១៧០នាក់ និងឆ្លងវីរុសឡើងដល់៧ពាន់ករណី។

បើតាមការចុះផ្សាយរបស់ទូរទស្សន៍ជប៉ុន NHK ក្រសួងសុខាភិបាលជប៉ុន បានអះអាងថា អ្នកឆ្លងចំនួន២នាក់ក្នុងចំណោម៣នាក់នេះ ពុំទាន់បង្ហាញរោគសញ្ញាណាមួយគួរឲ្យកត់សម្គាល់ឡើយ។ តួលេខនៃអ្នកឆ្លងទាំង៣នាក់ បានបង្កើនករណីឆ្លងណូវែលកូរ៉ូណាវីរុសក្នុងប្រទេសជប៉ុនឡើងដល់ ១១នាក់ហើយ រួមទាំងមនុស្ស ២ នាក់ ដែលបានឆ្លងវីរុសនេះ ដោយពុំធ្លាប់មានប្រវត្តិទៅកាន់ប្រទេសចិន។

ទាក់ទិននឹងករណីនេះ លោកនាយករដ្ឋមន្ត្រីជប៉ុន ស៊ីនហ្សូ អាបេ បានប្រាប់សមាជិកសភាជប៉ុនថា ពលរដ្ឋជប៉ុនទាំងបីនាក់ នឹងទទួលការព្យាបាលយ៉ាងយកចិត្តទុកដាក់បំផុតក្នុងមជ្ឈមណ្ឌលវេជ្ជសាស្ត្រពិសេសមួយ។

សូមបញ្ជាក់ថា ពលរដ្ឋជប៉ុនសរុបចំនួន ២០៦នាក់ ដែលជម្លៀសពីក្រុង វូហាន បានមកដល់ព្រលានយន្តហោះ Haneda របស់តូក្យូ កាលពីព្រឹកថ្ងៃពុធ ២៣ មករា ដោយមានអ្នកជំនាញវេជ្ជសាស្ត្រជាច្រើនត្រួតពិនិត្យសុខភាពពួកគេ ទាំងលើយន្តហោះ និងនៅព្រលាន៕